To a tamne (04.10.19)
Schód podzemskeje železnicy ze zajězdom parkowanskeho domu zaměniłoj staj chinskaj turistaj z awtom w Mnichowje. Wonaj wostaštaj ze swojim wupožčenym awtom na schodźe tčacy. Kaž šofer pozdźišo rjekny, bě jeho tafla zamyliła, pokazowaca na parkowanišćo. Wohnjowa wobora je snadnje wobškodźene awto skónčnje ze schoda zběhnyła. Hižo spočatk awgusta běštaj francoskaj mandźelskaj na samsnym městnje pytajo za parkowanišćom na schód zajěłoj.
Na balkonje kurić je wotnětka w Ruskej zakazane. To předwidźi noworjadowanje wohnjoškitneho zakonja, kotryž płaći wot 1. oktobra. Štóž zakaz njedodźerži, dyrbi z pokutu 3 000 rublow (42 eurow) ličić. Dyrbjała-li cigareta woheń zawinić, je pokuta wyša. Palace swěčki su na balkonach nětko runje tak zakazane kaž grilowanje šašlykow.
To a tamne (02.10.19)
Z cirkusa ćeknjenej cebraj stej w Mecklenburgsko-Předpomorskej zasadźenje policije zawinowałoj. Jedyn z njeju bě samo do wobchadneho njezboža splećeny. Wobydlerka bě zwěrjeći minjenu nóc w Tessinje wuhladała a policiju informowała. Zastojnicy móžachu jednoho cebru spěšnje popadnyć. Tamny twochny na awtodróhu, hdźež do wosoboweho awta zrazy. Na zbožo so nichtó njezrani.
Šulerske towarstwo „Cyle normalni super-rjekojo“ je za swoje zasadźenje na dobro wobswěta a přećiwo zanjerodźenju přirody Němske susodske myto Braniborskeje dóstało. Ministerski prezident Dietmar Woidke (SPD) móžeše šulerjam w havellandskim Rathenowje myto wčera přepodać. „Cyle normalni super-rjekojo“ su młodźi ludźo, kotřiž so mjeztym sydom lět za wobswěto- a přirodoškit kaž tež za dobru zhromadnosć angažuja.
To a tamne (01.10.19)
Za njespožčenu jědnatku wosobinsce pola hrajerja zamołwił je so koparski sudnik w Awstriskej. Do toho bu hrajer mustwa SK Rapid foulowany, na čož pak sudnik njereagowaše. Hakle po hrě wón situaciju hišće raz při wobrazowce analyzowaše a spózna swój zmylk. Připadnje nimo ducemu foulowanemu koparjej wón ruku zawda a so pola njeho ze słowami „Mój zmylk, to bě jasna jědnatka“ zamołwi. A hrajer wotmołwi: „Žadyn problem.“
Paducha z ptačkom na ramjenju je policija w nižozemskim Utrechće zajała. Do toho běchu muža při kradnjenju we wobchodźe lepili. Dokelž bě ptačk stajny přewodnik muža, dyrbješe sobu na policajsku stražu. Tam njemóžachu ptaču klětku wobstarać. Tak so rozsudźichu, jeho zhromadnje z mužom do cele zamknyć, „wězo derje zastaraneho“, kaž policija piše. Ptačk dósta běły chlěb.
To a tamne (30.09.19)
Nimale 70 kilometrow daloko je skupina pjeć młodostnych z awtom před policiju ćěkała, po tym zo běchu so w Kölnje do kompjuteroweho wobchoda zadobyli. Zastojnicy awto z policajskimi jězdźidłami a helikopterom přesćěhachu, doniž njemóžachu paduchow w Essenje dosahnyć. Dwaj ze skupiny hólcow w starobje dwanaće do 14 lět spytaštaj na to pěši ćeknyć. Jeju pak móžachu runja tamnym třom zajeć. Jězbnu dowolnosć wězo žadyn z nich njeměješe.
Stadło 30 wowcow su wčera po prastarej tradiciji po mosće London Bridge ćěrili. Akciju jónu wob lěto pěstuja. Wona dopomina na stary nałožk: Čestni wobydlerjo mějachu prawo, skót a grat do Londona přinjesć, bjeztoho zo bychu dawki za to płaćić dyrbjeli. Wosebity podawk přiwabja kóžde lěto wjele turistow. Zwjazk plahowarjow wołmy jón organizuje.
To a tamne (27.09.19)
Njekorektnych powěsćow dla chcyše muž z Oldenburga zawčerawšim radijoweho rěčnika wukrajneho sćelaka policiji přizjewić. A je to tam nimale 40 razow pod nuzowym čisłom spytał. Na kóncu je chětro nerwowany zastojnik k mužej domoj jěł a jemu handy sćazał. Nětko přepytuja přećiwo 51lětnemu znjewužiwanja nuzoweho telefonoweho čisła dla.
Na sanitetnej staciji Mnichowskeho oktoberskeho swjedźenja bywa lětsa wjele lubosćinskich mjetelčkow po puću. Po tym zo bě sanitetarka hakle minjeny kónc tydźenja wot hosća prašenje wšěch prašenjow dóstała, je nětko dalši pacient kłok amora začuwał. Jako Jendźelčana Johna zranjenja dla runje zastarachu, dósta wón lubosćinski list Awstralčanki. Nablaku měješe John njesměrnje nuzne, byrnjež wulke bolosće měł, zo móhł swoju najlubšu na lětanišću hišće dosćahnyć.
To a tamne (26.09.19)
Kedźbu, w Sakskej su zaso łosy (Elche) po puću. Jedna žónka w lěsach wokoło Zhorjelca za partnerom pyta, kaž Radijo Łužica tele dny informowaše. Připosłucharjo su so tam mjenujcy přizjewili a powědali, zo běchu tajkeho wołojelenja při awtodróze A 4 wuhladali. Kaž fachowc towaršnosće za škit přirody a slědźenje Lutra w Hamoru wobkrući, so łosy tuchwilu kóća, a tak je bjeze wšeho móžno, zo ludźo tele zwěrjata tuž hdys a hdys wuhladaja.
Pospyt, so w towaršnosći integrować, je z Afriki pochadźacy muž po wšěm zdaću cyle wopak interpretował. Tak je wón puć w italskim Venedigu mjetł a sej wot pasantow za to pjenjezy wuprosył. Policija pak napołoži jemu pokutu 350 eurow. Wjacori wobydlerjo, kotřiž wo tymle padźe zhonichu, sej integraciski pospyt porno tomu jara chwalachu a so na policiji za Afričana zasadźichu. Tak njetrjebaše wón pokutu zapłaćić.
To a tamne (25.09.19)
Z piwom najhóršemu zadźěwał je šofer wčera w Bayerskej. Jako poča jeho awto njezwučene zwuki wot so dawać, wón na awtodróze A 3 zasta, zo by za zmylkom pohladał. Wočini motorowu hawbu, a to jemu hižo płomjenja napřećo sapachu. Na zbožo měješe někotre bleše piwa sobu. Z drohotnej ječmjenjowej brěčku je muž woheń skónčnje zhašał. A wohnjowa wobora njebě hižo trěbna.
Wjac hač 3 700 eurow je 19lětna młodostna na Mnichowskim hłownym dwórnišću we wočinjenym kašćiku za zamknjenje našła. Poprawom chcyše tam swój wačok nutř zamknyć, nańdźe pak móšnju. W njej bě hoberska suma pjenjez, samo mjeno wobsedźerja móšnje bě podate. Pinčnik oktoberskeho swjedźenja bě sej, kaž pozdźišo rjekny, w ćahu wusnył. Kak je so jeho móšnja do mjenowaneho kašćika dóstała, pak njemóžeše sej rozkłasć.
To a tamne (24.09.19)
Medicinsku pomoc trjebał a lubosć namakał je Awstričan minjeny kónc tydźenja na oktoberskim swjedźenju w Mnichowje. Tam jeho 27lětna sanitetarka zastara, dokelž bě so na noze zranił. Wot młodeje pomocnicy cyle přemóženy so muž jeje hišće w sanitetnym awće wopraša, hač chce so z nim woženić. Poskitk drje wona hnydom njepřiwza, ale po wšěm zdaću njebě cyle wotchilena, znajmjeńša staj sej wučiniłoj so najprjedy raz zetkać.
Wopušćeny wodomjetak wosrjedź Drježdźan je wčera policiju zaběrał. Kaž zastojnicy na to zwěsćichu, słušeše jězdźidło Hamburgskej policiji, a zhonichu tež, zo šofer w bliskim hotelu wotpočuje, dokelž je jězdźenski čas překročił. Wón bě z wodomjetakom po puću z Awstriskeje do braniborskeho Luckenwalde, hdźež tajke jězdźidła wuporjedźeja.
To a tamne (23.09.19)
Měsac po rozžohnowanskej ceremoniji z islandskim lodowcom Okjökull nětko tež Šwicarjo žaruja. Wčera wopominachu swój lodowc Pizol, kotryž je dale a mjeńši. Organizatorojo su sej wot wobdźělnikow přeli, so žarowansku drastu woblec. Wot Züricha 100 kilometrow zdaleny lodowc lětsa posledni raz wuměrja. Wšako tón hižo wjele lodu njewopřijima. Wina na tym je klimowa změna, kaž lodowcowa iniciatiwa měni.
Dołhi rynk awtow sobotu rano při Drive-in-hosćencu Mc-Donalds njeje so ani kuska dale pohibował. Prěni w rynku – 52lětny šofer – bě sej wusnył. Wodźer jězdźidła za nim, jeho kedźbliwje wubudźi a wědźeše tež hnydom přičinu „mučnoty“. Kaž so wukopa, bě 52lětny chětro natutkany. Policija jemu hišće na městnje klučik awta wotewza, zwěsćiwši 1,26 promilow alkohola w jeho kreji.
To a tamne (20.09.19)
Kedźbu, němske piwo je sylne! Tak warnuje konsulat USA w Mnichowje swojich ameriskich wobydlerjow před wopytom na Oktoberskim swjedźenju, kotryž tam tónle kónc tydźenja zahaja. Dale su krótke wideja natočili, kak měli so ludźo na swjedźenju zadźeržeć. K tomu słuša mjez druhim na blidach njerejować abo piwowe karany njemjetać. Tohorunja skedźbni konsulat na paduchow. Něhdźe 500 wupokazow su wopytowarjo loni zhubili abo bu pokradnjenych.
Emocionalna wadźeńca wokoło kozy je Mnichowske zarjadniske sudnistwo wčera zakónčiło. Kozoł z mjenom Hui Buh budźe přichodnje dale na burskim statoku bydlić a nic w bydlenju. Skoržiłoj běštej žona a jeje dźowka, kotrymajž bě krajny zarjad zwěrjo wzał. Wonej stej kozoła z ruku wotćahnyłoj a Hui Buh spaše sobu we łožu dźowki. Zarjad měješe to za njezamołwite zadźerženje.
