To a tamne (17.01.19)
Chětro drohu pytansku akciju je mučny matroza před pobrjohom Awstralskeje zawinił. Na rybjacym kuteru bě so wón w schowanym kućiku spać lehnył. Dokelž tamni na to tukachu, zo je do morja padnył, zahajichu za nim poł dnja trajacu pytansku akciju, na kotrejž so wosom helikopterow a wjacore łódźe wobdźělichu. Hakle potom rybarjo swojeho kolegu pod powjazami ležaceho namakachu. Lochkomyslnosć móhła za namórnika drohe sćěhi měć: Jeničce słužba helikopterow płaćeše 157 000 eurow.
Pjany a bjez jězbneje dowolnosće je šofer awta w Berlinje do parkowaceho awta zrazył a na městnje njezboža dale pił. 39lětny bě w měšćanskim dźělu Rudow chětro dźiwnje jěł a tak zražku zawinił. Jako policija dojědźe, sedźeše muž na chódniku, piješe piwo a měješe w awće hišće dalše bleše chmjeloweje brěčki.
To a tamne (16.01.19)
Wrak stareje łódźe wotkrył je wichor minjenych dnjow na Rujanach. Při powostankach łódźe njedaloko Glowe jedna drje so wo nižozemsku wikowansku łódź z 18. lětstotka, kaž krajny zarjad za kulturu a hladanje pomnikow zdźěla. Fachowcy chcedźa namakanku nětko dokładnišo přepytować. Wichor bě pobrjohej Rujanow chětro zeškodźał a pola Glowe cyły meter pódy wotnjesł. Při tym bě so wrak z pěska wupłokał.
Porod swojeho dźěsća přestorčiła je britiska zapósłanča strony Labour Tulip Siddiq, zo móhła so na wčerawšim wothłosowanju parlamenta wo brexiće wobdźělić. Poprawom chcychu lěkarjo dźěćko wčera wurězać, skónčnje pak su termin na jutře přestorčili. Hač je zapósłanča w parlamenće abo z chorownje wot- hłosowała, wšak njeje cyle wěste.
To a tamne (15.01.19)
Z burgerami a pomfritkami pohosćił je prezident USA Donald Trump footballowe mustwo w Běłym domje, dyrbješe pak party sam zapłaćić. Přičina bě tak mjenowany „shutdown“, kotrehoždla je kuchnja prezidentskeho sydła tuchwilu zawrjena. Trump, znaty jako lubowar tajkich spěšnojědźow, zdźěli, zo je 300 hamburgerow, pizzy a „wjele, wjele pomfritkow“ wobstarał. Jědź steješe w typiskich kartonach na hoberskim blidźe, za to pak na slěbornych tabletach.
Mjaso za grilowanje spakosćiłoj stej kondoraj pola swójby w Chile. Na wideju je widźeć, kak so hoberskej ptakaj do mjasa datej, kotrež bě swójba na kromje stolicy Santiago de Chile za grilowanje na zahrodu połožiła, zo by roztało. Andowe kondory su najwjetše ptaki Južneje Ameriki. Křidła dorosćenych zwěrjatow móža rozměr hač do třoch metrow docpěć.
To a tamne (14.01.19)
W mjenje hač štyrjoch mjeńšinach 29 poschodow přewinył je dobyćer lětušeho 19. „tower-runa“ po najwjetšim bydlenskim domje Berlina w Neuköllnje. Iranjan Ahmad Asadi z Frankfurta nad Mohanom trjebaše mjez 200 běharjemi za 465 schodźenkow jeničce tři mjeńšiny a 46 sekundow. Spěšniši běchu jenož wohnjowi wobornicy, kotřiž startowachu w swójskej klasy. Najspěšniši bě Markus Behrens z Zeuthena w třoch mjeńšinach a 28 sekundach.
Po placki do wobchoda přišoł je dwulětny hólčk w delnjošleskim Celle. Do toho bě wón z bydlenja twochnył, štož njebě mać pytnyła. Zaměrnje poda so wón k regalej słódkosćow a wopušći kupnicu, bjez toho zo by zapłaćił. Na parkowanišću pak lochko zdrasćeny pachołk žonje napadny. Čehodla je doma ćeknył, ma nětko młodźinski zarjad pruwować.
To a tamne (11.01.19)
Přemało nahich hosći dla dyrbja Pariski hosćenc „O‘Naturel“ po dobrym lěće hižo zaso zawrěć. „Z wulkim wobžarowanjom dyrbimy zdźělić, zo hosćenc 16. februara doskónčnje začinimy, dokelž nimamy dosć hosći“, rěka na internetnej stronje. „O‘Naturel“ běchu kónc 2017 jako prěni FKK-hosćenc francoskeje stolicy zwonka wulkich turistiskich centrumow wotewrěli. Hosćo dyrbjachu so do toho přizjewić a drastu při zachodźe wotedać. Pinčnicy wostachu zdrasćeni.
Marathon běhace rjadniske sotry a kardinalojo při lochkoatletice – Vatikan ma wotnětka swójske sportowe mustwo. Prezident bamžowskeje rady za kulturu, kardinal Gianfranco Ravasi, je 60 čłonow wopřijacy cyłk wčera předstajił. Team, kotryž by so rady na mjeńšich sportowych wubědźowanjach wobdźělił, je čłon italskeho lochkoatletiskeho zwjazka.
To a tamne (10.01.19)
Runje 50 lět po legendarnym festiwalu Woodstock, na kotrymž běchu hudźbne hwězdy kaž Jimi Hendrix a Janis Joplin wustupili, planuje jedyn z tehdyšich organizatorow, zarjadowanje lětsa wožiwić. Festiwal ma so wot 16. do 18. awgusta we Watkins Glen na sewjeru zwjazkoweho stata USA New York wotměć, 200 kilometrow wot originalneje městnosće Bethela. Na festiwalu w awgusće 1969 wobdźěli so 400 000 ludźi.
Pedal płuna a borzdźidła zaměnił bě 19lětny w sewjerorynsko-westfalskim Kerpenje a je ze swojim 272 PS sylnym awtom do bydlenskeho domu zrazył. Tam přełama murju a wosta na chódbje stejo. Dom, w kotrymž bydli 72lětny, je na zbožo dale wužiwajomny. Młody šofer njeměješe jězbnu dowolnosć ani hišće lěto. Policija trochuje cyłkownu škodu na něhdźe 60 000 eurow.
To a tamne (09.01.19)
Nowy stan dóstał je před sto lětami załoženy šwicarski „Circus Knie“. Dźakowano crowdfundingej móže so na tradicije bohate předewzaće nětko z nowym stanom na turneju podać. Nimale 500 fanow bě minjene štyri měsacy něhdźe 226 000 eurow znosyło. Nowy stan chcedźa na zahajenju turneje 21. měrca nad Zürichskim jězorom poswjećić. Swójba Knie wjedźe cirkus mjeztym w sedmej generaciji.
Prěni króć woči wočinił je młody běły mjedwjedź w Berlinskim zwěrjencu, pjeć tydźenjow po porodźe. Wot zwěrjenca wozjewjene wobrazy pokazuja mjedwjedźatko z wotewrjenymaj wočomaj při maćeri. Zo by dorost trěbny měr měł, jón sobudźěłaćerjo dotal jeno ze zatwarjenymi kamerami a mikrofonami wobkedźbuja. Spočatk februara chcedźa młodźo prěni króć lěkarsce přepytować.
To a tamne (08.01.19)
Na kwasnym dnju do pasli błyskača zajěł je młody porik na awtodróze A 1 pola Dortmunda. Mjeztym wšak je sej nawoženja pola policije wone swojorazne kwasne foto wuprosył, dokelž bě so loni w meji nastaty original zhubił. „Móžachmy wupomhać“, zastojnicy internetnje zdźěleja. „Přejemy z wutroby zbožowne mandźelstwo.“ Kak spěšnje běštaj runje zwěrowanaj swój čas po puću byłoj a što dyrbještaj za wosebite foto płaćić, wězo njepřeradźeja.
Wjace pjenjez za ćopłu drastu žada sej dźěłarnistwo policije w Berlinje za zastojnikow, kiž dyrbja objekty w měsće wobstražować. Hižo dołho wo to wojuja, stało so dotal ničo njeje, rěčnik dźěłarnistwa zdźěla. Tak su zamołwitych na to skedźbnili, zo kóždolětny drastowy pjenjez 150 eurow dawno njedosaha: Porjadny zymski kabat płaći nimale 250 eurow.
To a tamne (07.01.19)
Whisky jako pomocny srědk wužiwać chce farar w Bayerskej, zo by z mužemi swojeje wosady lěpje do rozmołwy přišoł. Tak je 53lětny duchowny Thomas Eschenbacher, sam lubowar whiskyja, muži 11. januara do Hammelburga přeprosył. Poskitk bě hnydom wuknihowany. Na „whiskyjowych“ eksercicijach chcedźa woni swój poměr k Bohu přepruwować a pohłubšić. Palenc ma wobdźělnikam při studiju biblije impulsy spožčić, so duchowny nadźija.
Jara nuznje na pjaty róžk dyrbješe pječa šofer wosoboweho awta, kotrehož je Berlinska policija na tamnišej měšćanskej awtodróze zadźeržała. 33lětny bě ze 100 km/h město dowolenych 60 po puću. Za jeho wurěč njemějachu zastojnicy scyła žane zrozumjenje: Mužej hroža nětko chłostanka 400 eurow, dwaj dypkaj w Flensburgu a měsac trajacy zakaz jězdźenja.
To a tamne (04.01.19)
W drjewjanym sudźe Atlantik přeprěčić chce 71lětny Jean-Jacques Savin z Francoskeje. Tydźenja je so dyrdomdejnik z Kanariskich kupow na puć podał. Tři metry wysoke žołmy jeho nuzuja připasany spać, kaž na Facebooku piše. Tři metry dołhi a dwaj metraj šěroki sud je kaž bydlenčko zarjadowany. Dźakowano satelitowemu systemej GPS móže kóždy jězbu 71lětneho w interneće sćěhować. Za tři měsacy chce wón Karibiku docpěć.
Jeničku winicu Hamburga chcedźa wotstronić. Kaž rěčnik města zdźěli, ma so tak po 24 lětach plahowanje wina zakónčić. Hłowna přičina toho su twarske dźěła w zwisku z rozšěrjenjom přistawa. Winicu běchu 1995 z połsta winowymi pjenkami wutworili, kotrež běchu Stuttgartscy winicarjo Hamburgej darili. Nadźěłane wino bě město wuzwolenym hosćom jako wosebitostku dariło.
