To a tamne (02.05.18)
Chětro fatalne diplomatiske misnjenje je sej francoski statny prezident Emmanuel Macron w Awstralskej dowolił. Při zetkanju z ministerskim prezidentom Macolmom Turnbullom w Sydneyju chwaleše Macron toho mandźelsku jako „delicius“, potajkim „słódnu“. Měnił bě drje „delightful“, štož rěka „powabna“. Posłownje Macron rjekny: „Dźakuju so wam a wašej słódnej žonje“.
Ćěkajo před policajskej kontrolu je šofer wosoboweho awta w Berlinje do Sprjewineho kanala zajěł. Do toho bě 21lětny z 16- a 17lětnymaj sobujěducymaj wjacore čerwjene ample ignorował. Wšitcy třo w awće so snadnje zranichu, móžachu pak so sami wuswobodźić a k brjohej płuwać. Berlinska wohnjowa wobora awto z pomocu krana z wody wućahny. Wokolne dróhi běchu w tym času zawrjene. Komentar policije: „By radšo zastał.“
To a tamne (30.04.18)
Pytajo za do wody padnjenymi klučemi je wodosportowc w Ruppinskim jězoru staru granatu namakał. Z pomocu magneta bě muž sobotu njedaloko pobrjoha za klučemi pytał a při tym němsku granatu z Druheje swětoweje wójny z wody wućahnył. Fachowcy za znješkódnjenje municije granatu zrumowachu.
Powostanki stareho Romskeho sydlišća su w Bołharskej namakali. Při twarskich dźěłach za nowu awtodróhu na juhozapadźe storčichu dźěłaćerjo na zbytki twarjenjow, kupjele, cyrkwje a kanalizacije. Namakanki pochadźeja z 3. hač do 6. lětstotka. Hakle njedawano běchu derje zdźeržane rownišćo z časa Romjanjow wotkryli. Archeologiska drohoćinka drje twar awtodróhi do Grjekskeje nachwilnje přetorhnje. Iniciatiwa žada sej přepołoženje trasy a wobydlerski referendum wo awtodróze.
To a tamne (27.04.18)
Dźewjeć kilogramow šokolody pod suknju měješe žona w Braunschweigu, jako ju w předawarni žiwidłow při kradnjenju lepichu. To pak njebě hišće wšitko. W awće kumpana, kiž njedaloko kupnicy na nju čakaše, ležeše dalšich 50 kilogramow šokolody: praliny, sta taflow šokolody a worješko-nugatowa krema. 35lětna padušnica bě słódkosće we wjacorych worštach suknje schowała, policija zdźěli. Hač chcyštaj wšu šokolodu sami jěsć abo dale předawać, njeje dotal znate.
Swoju mać njewotpohladnje na balkon wuzamknyła je dwulětna holčka w Magdeburgu. Po misnjenju njemóžeše dźěćo durje hižo wočinić, wohnjowa wobora zdźěli. Mać prošeše z balkona pěškow wo pomoc, kotřiž na to wohnjowu woboru wołachu. Wobornicy dyrbjachu durje bydlenja namócnje wotewrěć a móžachu mać skónčnje z balkona wuswobodźić.
To a tamne (26.04.18)
Flety z morchejow a bubony z kirbsow: Při kulinariskim festiwalu Solanum w braniborskim Rheinsbergu w meji chcedźa woprawdźe z pomocu zeleniny hudźić. Za to je so The Vegetable Orchestra z Wiena přizjewiło, kaž zarjadowarjo zdźěleja. Hudźbnicy, kotřiž chcedźa 26. meje w Rheinsbergu wustupić, su hižo we Waršawje, Parisu a Madridźe hudźili. Instrumenty dyrbja do kóždeho koncerta cyle čerstwje zhotowić.
Hoberske jejo dawno wotemrěteho elefantoweho ptačka je sobudźěłaćerka New-Yorkskeho přirodowědneho muzeja skerje připadnje našła. Wona bě runje při tym, eksponaty w składźe katalogizować, jako na kistu storči. W njej bě 30 centimetrow wulke a połdra kilogramow ćežke jejo. Elefantowe ptački běchu hač do třoch metrow wulke. Jejo chcedźa spočatk meje we wustajeńcy prezentować.
To a tamne (25.04.18)
7 000 kwadratnych metrow wulki hóčkowany přikryw z wobličom narodneho rjeka Nelsona Mandele su w Južnej Africe wotkryli. Twórba bě na česć wojowarja přećiwo apartheid nastała, kotryž by lětsa 18. julija swoje stoćiny woswjećił. Tysacy ludźi ze wšeho swěta běchu měsacy dołho cyłkownje 3 000 jednotliwych dźělow přinošowali. Na akciji wobdźěliło bě so tež 1 600 jatych w 62 jastwach kraja.
Z domjacymi nadawkami přežadany dźesaćlětny šuler w Badensko-Württembergskej je policiju zawołał. „Słyšachmy rozpjeršeneho a žałosćaceho hólca“, rěčnik policije zdźěli. Prjedy hač móžachu z nim rěčeć, bě zwisk přetorhnjeny. Dokelž tukachu na nuzowu situaciju, zastojnicy přez telefonowe čisło adresu hólca wuslědźichu a k njemu jědźechu. Kaž so wukopa, běchu domjace nadawki hólca tak rozhorili, zo njewidźeše druheje móžnoće, hač policiju wołać.
To a tamne (24.04.18)
Z runje šěsć km/h na awtodróze po puću był je muž w Hessenskej. Traktor bě tuž wo wjele pomałši hač dowolene, policija rozprawja. „Jězdźidła dyrbja znajmjeńša 60 km/h docpěć, zo móhli awtodróhu wužiwać“, policija wujasni. Zastojnicy traktor zadźeržachu. Prawdźepodobnje njebě 83lětny wodźer ani pytnył, zo bě na awtodróze jěł. Policisća zwěsćichu pola njeho prěnje zjawy demency a sćazachu klučik traktora.
Na toaleće spěšnika zamknjeny był je politikar Berlinskich Zelenych. „Z někajkeje přičiny durje blokuja. Móžeće mi pomhać?“, zdźěli Matthias Oomen na internetnej platformje Twitter. Tole sobudźěłaćerjo železnicy woprawdźe móžachu. Na Drježdźanskim hłownym dwórnišću politikarja z njelubeje situacije wuswobodźichu. Oomen bě z Berlina přijěł. Čehodla durje blokowachu, njewědźa.
To a tamne (23.04.18)
Na tribunu přihladowarjow so dóstał bě nětko kóń na jěchanskim dworje blisko Lipska. Wšitke pospyty, zwěrjo tam dele pohibować, zwrěšćichu. Tuž dyrbješe wohnjowa wobora pomhać. Z mnoho pomocnikami a rěblowym wozom su konja z tribuny kedźbliwje dele zběhnyli. Do toho bu štyrinohač wězo pohłušeny. Kóń so na zbožo zranił njeje.
Njejapcy rozestajenje mandźelskeju w Mannheimje skónčiła bě zašły kónc tydźenja šklička. 14lětna dźowka, kotraž bě rozkoru słyšała, zawoła policiju. Jako zastojnicy bydlenje docpěchu, nańdźechu 57lětneho bjez wědomja na špundowanju. W běhu werbalneje rozkory dyri jemu žona ze škličku na hłowu. Muž dyrbješe zranjenjow dla do chorownje. 53lětna mandźelska pak ma nětko z přepytowanjom ćežkeho zranjenja ćěła dla ličić.
To a tamne (20.04.18)
Něhdźe 2 300 zběrarjow twjerdych pjenjez je so w Berlinje-Charlottenburgu nastupiło, zo bychu sej nowy pjećeurowski pjenjez Zwjazkoweje banki kupili. Wot wčerawšeho wudawa pjenježny institut nowu ediciju „Subtropiske pasmo“, wobstatk pjećdźěloweje serije „Klimowe cony zemje“. Hižo rano w 4 hodź. so zajimcy nastupichu. Nawala dla předawaja kóždemu jenož jedyn pjenjez wob dźeń.
Drjewjane třěski w cyrkwi lětaja zajutřišim, njedźelu, we Wjernarjecach pola Załomja. Tamniša ewangelska wosada zarjaduje Božu słužbu rjemjeslnikow. Z rudnohórskeho Seiffena přijědźe tružer Christian Werner. Wón demonstruje zhotowjenje w hodownym času woblubowanych drjewjanych zwěrjatow a chce wo swojim dźěle a wěrje porěčeć.
To a tamne (19.04.18)
Blachowy kašćik z pozdatnje radioaktiwnym wobsahom je we Freitalu wulkozasadźenje wohnjoweje wobory zawinował. Žona bě ze symbolom radioaktiwity woznamjenjene sudobjo pola mobila za škódne maćizny wotedała, na čož sobudźěłaćerjo wohnjowu woboru alarmowachu. Pomocnicy namakachu pak w tyzce jenož zběrku mineralijow
40 kilogramow twjerdych pjenjez wšelakich krajow su w starym zamróžaku wulkowikow w Dortmundźe našli. Sobudźěłaćerjo firmy běchu čapor z prózdnje stejaceho składźišća wurumowali a při tym wjacore toboły z pjenjezami namakali. Policija njewuzamkuje, zo pochadźeja pjenjezy z chłostajomneho njeskutka.
To a tamne (18.04.18)
Nócny spěwar je susodam w badensko-württembergskim Lörrachu dny dołho spar rubił, doniž njeje policija přijěła. Ludźo běchu zastojnikow wołali, dokelž 29lětny stajnje zaso w nócnych hodźinach swoje arije zanošowaše. Policisća na to pola spěwarja klinkachu a jemu do swědomja rěčachu. 29lětny hnydom přilubi, zo swoje nócne spěwanje přichodnje wostaji a dźěše spać.
Žónske koleso z motorom trawusyčawy wudospołnił je 37lětny w mecklenburgskim Groß Teetzlebenje. Policisća jeho zadźeržachu, jako runje nimo smaleše. „Tak je z kolesa motorizowane jězdźidło nastało, za kotrež nima muž ani jězbnu ani wužiwansku dowolnosć“, policija piše. Kolesowarjej dalejězbu zakazachu. Test zastojnikow měrješe spěšnoć 52 km/h. Kreatiwny muž dóstanje nětko skóržbu jězdźenja bjez dowolnosće dla.
