To a tamne (20.06.23)
Wjace hač 25 000 wopytowarjow ewakuować dyrbjeli su wčera z wólnočasneho parka w badensko-württembergskim Rusće. Akcija traješe něšto wjace hač dwě hodźinje, po tym zo běchu ludźi wohenja dla alarmowali. Ewakuowanje wotběža bjez problemow, park zdźěla. Woheń bě w rumnosći techniki jedneje z atrakcijow parka wudyrił. Wohnjowi wobornicy płomjenja podusychu.
K namócnemu rozestajenju z wjace hač 40 wobdźělenymi je njedźelu popołdnju w lěsnej kupjeli w badensko-württembergskim Mannheimje dóšło. Při tym so 24lětny po kałanju z nožom zrani. Dalši wobdźěleni so snadnje zranichu. Njeznataj běštaj 12lětneho do wody storčiłoj a podnuriłoj. Jako hólc bratromaj wo podawku rozprawješe, so wonaj do njeznateju daštaj. Druzy so do zwady měšachu. Na kóncu so 40 ludźi biješe.
To a tamne (19.06.23)
Na pustym wječoru wotućena žona w Ekuadorje je nětko tola zemrěła. Po sydom dnjach na intensiwnej staciji chorownje je žona wudychała, lěkarjo zdźěleja. W chorowni běchu ju wobšěrnje lěkarsce zastarali a prawidłownje přepytowali. Žonu bě 9. junija Boža ručka zajała. Słužbuwukonjacy lěkar bě smjerć žony zwěsćił. Jako chcychu so přiwuzni na pustym wječoru ze zemrětej rozžohnować, so 76lětna nadobo hibaše.
Na wšě pjeć hodźin w motorowej rumnosći awta wutrała je mała kóčka na jězbje z Madźarskeje do Awstriskeje. Kocor bě so tam schował a cyły čas sobu jěł, organizacija za škit zwěrjatow zdźěla. Šofer bě žałosćace zwěrjo po jězbje wuhladał a do zwěrjatownje dowjezł. Něšto měsacow stare zwěrjo bě wustróžane, ale njezranjene. Nětko chcedźa w Awstriskej noweho wobsedźerja namakać.
To a tamne (16.06.23)
Swójsku kwasnu hosćinu přetorhnyła je 21lětna žona w Indiskej, dokelž bě so jeje nawoženja pobrachowaceho wowčeho mjasa dla hóršił. Tež nan a bratr nawoženje so ze swójbu njewjesty wadźeštaj, dokelž njeměještaj na hosćinje w zwjazkowym staće Odisha pječa dosć k jědźi. Pobrachowaceho respekta napřećo staršim swójbnym dla młoda žona swojeho mandźelskeho nablaku wopušći. Toho zamołwjenje nochcyše wona słyšeć.
Z pistolu w tobole je 72lětny muž z Němskeje do danskeje chorownje přišoł, dokelž nječuješe so derje. Přistajeni kliniki w Odense na juhu Jütlandskeje bróń a wotpowědnu municiju wuhladachu. Policija muža zaja. Muž žanu winu za sebje njewidźeše, wobsydstwo brónje pak přizna. Sudnistwo zasudźi jeho k šěsć měsacam jastwa a jeho z kraja wupokaza.
To a tamne (15.06.23)
Poslednja powjazowa tramwajka swěta w kaliforniskim San Francisku swjeći lětsa 150. róčnicu swojeho wobstaća a je dale woblubowany transportny srědk. W awgusće 1873 ridrowachu prěnje Cable Cars po měsće. Do toho dyrbjachu so konjace zapřahi po nahłych hórkach městach dračować. Tak połožichu woclowy powjaz pod dróhu a ćahachu z nim wozy. Jednory system spěšnje tež druhdźe zasadźichu, w New Yorku, Chicagu, Londonje, Parisu a Melbournje. Zwostali pak su Cable Cars jenož w San Franciscu.
Na hižo jěducy ćah skočił je muž na dwórnišću w hessenskim Fuldźe. 39lětny bě skrótka z ćaha wulězł. Žona a wobě dźěći w ćahu na njeho čakachu. Jako bě ćah hižo wotjěł, chcyše muž hišće do njeho zalězć. Železnicar strach spóznajo sćahny nuzowe borzdźidło. Muž dyrbi nětko z chłostanjom ličić.
To a tamne (14.06.23)
Na pustym wječoru nadobo so hibała je pječa zemrěta žona w Ecuadorje. Přiwuzni chcychu pozdatnje mortwu žonu za smjertnu stražu předrasćić, jako zwěsćichu, zo wona hišće dycha a so samo hiba. Strowotniske ministerstwo chce nětko pruwować, čehodla běchu w chorowni smjerć žony wobswědčili. Boža ručka bě žonu zajała. W chorowni njemóžachu ju wjace wožiwić a tuž smjerć žony dokumentowachu. Wona leži tuchwilu na intensiwnej staciji chorownje.
Z telefonatom sej žiwjenje wuchowała je 101lětna žona w Plauenje. Wona zazwoni njeznatu žonu, prošu ju wo pomoc, dokelž sylnje krawješe. Zazwonjena informowaše policiju, kotraž pósła chorobne awto k bydlenju staruški w Plauenskim měšćanskim dźělu Neundorf. Lěkarjo dowjezechu žonu, kotraž sylnje krawješe, do chorownje.
To a tamne (13.06.23)
Britiskeho krosnowarja po fasadach su zajeli, jako spyta, bjez powjaza na 555 metrow wysoki mróčelak w južnokorejskej stolicy Seoulu zalězć. 24lětny krosnowar George King-Thompsom bě so hižo k 72. poschodej předrěł, jako jeho wohnjowa wobora zadźerža. Jeho dowjezechu z liftom technikarjow na třěchu 123 poschodowysokeho Lotte World Towera na juhu města. King-Thompson bě po informacijach hižo chětro wučerpany a ma nětko problemy z policiju. Jemu wumjetuja, zo je bjez dowolnosće wobsedźerja po fasadźe po puću był. Lotte World Tower běchu lěta 2017 wotewrěli.
Sylneho třichanja wosrjedź jězby dla je šofer wosoboweho awta w delnjobayerskim Passauskim wokrjesu z jězdnje zjěł a do płota zrazył. Kaž policija zdźěla, so muž při zražce njedźelu popołdnju snadnje zrani. Wuchowanska słužba dowjeze 79lětneho do chorownje. Na awće nasta škoda 20 000 eurow, porjedźenje płotu płaći znajmjeńša 10 000 eurow.
To a tamne (12.06.23)
Dźiwje swinjo w basenku na priwatnej ležownosći w Neuenhagenje pola Berlina je zasadźenje policije a wohnjoweje wobory zawinowało. Wobydlerjo běchu zwěrjo sobotu rano w poolu wuhladali. Něhdźe 40 kilogramow ćežke zwěrjo bě prawdźepodobnje za wochłódźenjom pytało, njemóžeše pak wjace z basenka wulězć. Wobornicy wodu wotpušćichu a swinjo z pasami wućahnychu. Zwěrjo bě po wuchowanju chětru wučerpane a so bórze na to w bliskim lěsu zminy.
Hara motorowych piłow bě kónc tydźenja w Heinersdorfje we wokrjesu Wódra-Sprjewja prezentna. Tam wubědźowaše so 20 wobdźělnikow we wowčerni wo myto najspěšnišeho a najlěpšeho rězbarja z motorowej piłu „Speedcarving“. Při tym dyrbjachu w 45 mjeńšinach ze 1,10 metrow wysokeho a 30 centimetrow tołsteho zdónka wuměłsku twórbu rězbarić.
To a tamne (09.06.23)
Ćeknjeny kenguru w Rostockskim wokrjesu je z pomocu susodow zaso puć domoj namakał. Wulět „Berryja“ po wsy Rethwisch traješe runje dźeń. Po informacijach rozhłosa bě dospołnje běłe zwěrjo srjedu wječor twochnyło. Wobydlerjo běchu je drje wobkedźbowali, popadnyć pak kenguru njemóžachu. Wčera nadeńdźechu „Berryja“ w bliskosći statoka, wottam přewodźachu jeho domoj. Wobsedźerka boješe so wosebje nadróžneho wobchada dla, kiž njeje běły kenguru zwučeny.
Mjezu 30 stopnjow překročili su prěni króć w tutym lěće w Podstupimje. Tam naměrichu wčera 30,7 stopnjow, sobudźěłaćer Němskeje wjedrarnje wječor w Offenbachu zdźěli. Tež wokoło Berlina pokazowachu stacije wjedrarnje wjace hač 30 stopnjow. Z blakami mějachu tam šwihele a njewjedra. Dźensa liča z dalšimi zdźěla sylnymi njewjedrami.
To a tamne (08.06.23)
Starodawny són spjelniła je sej bywša wučerka francošćiny Evelyn Haupt při wopyće francoskeho prezidenta Emmanuela Macrona a zwjazkoweho kanclera Olafa Scholza (SPD) w Podstupimje. Wona bě jeno za to z Hannovera přijěła a prošeše wobeju politikarjow wo zhromadny foto, jako wobaj po Nowym torhošću dźěštaj. Macron a Scholz njedaštaj so dołho prosyć a so za selfie zestupištaj.
Na wšě 23 dźiwich swini je so wčera dopołdnja do parka w sewjerorynsko-westfalskim Hagenje zabłudźiło. Při tym jednaše so wo dwě rancy z młodźatami, město zdźěla. Park su zawrěli. Šulerjo bliskeje šule njesmědźachu twarjenje wopušćić. Hajnicy črjódu swini z parka do bliskeho lěsa přewodźachu. Hakle w nalěću běchu dźiwje swinje w Hagenje njeměr zbudźili, jako so do bydlenja zadobychu a je dospołnje zapusćichu.
To a tamne (07.06.23)
Trut policije w powětře nadběhowali su tonuški w zapadnofrancoskim Rennesu. Policisća chcychu demonstraciju přećiwo rentowej reformje wobkedźbować, jako so ptački za wšěch widźomnje do lětaceho pomocnika zastojnikow dachu. Demonstranća, kotřiž prawidłownje přećiwo kontrolowanju z powětra protestuja, nowych zwjazkarjow wótře witachu a podawk filmowachu a komentowachu.
Zabyty budźak w lětadle je na Hamburgskim lětanišću zasadźenje fachowcow za znješkódnjenje bombow zawinował. Personal lětanišća bě podhladne tikotanje při rjedźenju mašiny z Züricha słyšał a policiju informował. Přiwołani fachowcy njestrašny budźak spěšnje namakachu a zrumowachu. Nětko pytaja za pasažěrom, kiž je nastroj w lětadle zabył, zo móhli jemu zličbowanku za dosć drohe poł hodźiny trajace zasadźenje pósłać.
