To a tamne (24.02.22)
Kaž bychu sej to dorěčeli: Předwčerawšim, 22. februara 2022, je we woběmaj uniwersitnymaj chorownjomaj Sakskeje dokładnje 22 dźěći na swět přišło, jědnaće w Lipšćanskej uniwersitnej klinice a jědnaće w Drježdźanskej. Tak bě druha palencowa ličba woblubowaniša hač prěnja 2.2.22. Tón dźeń bě so w Lipšćanskej klince pjeć ćěšenkow narodźiło, w Drježdźanskej wosom.
Wikowarja falšowanych šćěpjenskich wupokazow je policija w Berlinje lepiła. 19lětny bě z bydlenja swojeju staršeju w měšćanskim dźělu Kreuzberg z wopačnymi dokumentami wikował. Wón bě wupokazy z nalěpkami, lěkarskim kołkom a podpismom w interneće poskićał. Jako chcyše štyri tajke šćěpjenske wupokazy na Dieffenbachowej přepodać, jeho zastojnikaj zaještaj. W bydlenju namakaštaj na to kołki a nalěpki.
To a tamne (23.02.22)
Naročny projekt plahowanja je so w Južnej Africe radźił. Wón měješe zaměr, wutupjenu družinu quagga – měšeńcu konja a cebry – zaso wožiwić. Je to poddružina cebry bjez smuhow. Lěta 1883 wotemrěty quagga słušeše něhdy do typiskeho wobraza južnoafriskich stepow. Ze zaměrnym plahowanjom su wot lěta 1987 spytali družinu wožiwić. Mjeztym maja jich něhdźe 200 zwěrjatow.
Ludźi wobćežowace dźiwje swinjo je so na stanowanišću Boek nad jězorom Müritz wo zasadźenje policije postarało. Wone bě tak njemdre, zo dyrbješe swójba před nim ćeknyć. Wšitke pospyty, je z wołanjom, hałzami abo gestami wuhnać, zwrěšćichu. Tuž so zastojnicy rozsudźichu skoćo zatřělić. Po prěnich wutřělach ze słužbneje pistole zranjene dźiwje swinjo do rohodźe ćekny. Hajnik z psom dyrbješe na to za nim pytać.
To a tamne (22.02.22)
W paslach tčacy paduch je w Bielefeldźe policiju wołał. 19lětny bě so do lěkarskeje praksy zamknyć dał, zo by ju za pjenjezami přeslědźił. Přez balkony zalěze wón do dalšeje praksy, njemóžeše pak durje běrowa přewinyć. Na to so do prěnjeje praksy nawróći, zwrěšći pak při zamknjenych durjach. Po hodźinach so rozsudźi, nuzowe čisło wolić. Sudnik pósła jeho nablaku do jastwa, dokelž je w jědnaće dalšich tajkich padach podhladny.
Zawěru železniskeho přechoda přełamał je rentnar ze swojim awtom na Rujanach – a je so ze swojim wobškodźenym awtom zminył. Zastojnikomaj, kotrajž 86lětneho krótko po tym w porjedźerni awtow nańdźeštaj wón rozłoži, zo njebě zawěru na přechodźe widźał. Policija chce nětko pruwować dać, hač je starc scyła hišće kmany awto wodźić. Nimo toho dyrbi so zasahnjenja do wobchada dla zamołwić.
To a tamne (21.02.22)
Wohnjowych wobornikow jako třěchikryjerjow zasadźić chcyše muž w sewjerofriziskim Brookmerlandźe w Aurichskim wokrjesu. Do toho bě wón pomocnikow z nuzowym čisłom přiwołał. Woni zwěsćichu, zo bě wichor štyri třěšne cyhele wotnjesł. Wobsedźer sej wot nich žadaše třěchu sporjedźeć, štož wobornicy wotpokazachu. Nimo toho wón chcyše, zo křiwy štom na zahrodźe pušća, štož pak tohorunja wotpokazachu.
Ze samotwarjenym mopedom je muž w braniborskim Fürstenwaldźe kedźbnosć policije zbudźił. 29lětny měješe swojemu kolesu pomocny motor přitwarjeny a bě wočiwidnje spěšnišo hač 25 km/h po puću był. Nimo toho njeměješe zawěsćensku tafličku. Spodźiwneho zadźerženja muža dla přewjedźeny test na drogi bě pozitiwny na amfetaminy, a tak dyrbješe mopedist-kolesowar na test kreje.
To a tamne (18.02.22)
Po nasypje lećacu kruwu dale přez wuchodofrizisku krajinu pokazuje wobrazowa montaža, kotruž je policija wčera wozjewiła. Tónle wobraz dyrbješe ludźi před wohroženjemi orkana warnować, wosebje šoferow awtow, zo měli kedźbliwje jěć. Kaž policajska rěčnica mjeztym wozjewi, njetrjebaja so ludźo lětacych kruwow bojeć. Z montažu chcychu zastojnicy jeno sylnosć wichora na humorne wašnje wuzběhnyć.
Mini-swinko w bydlenju bě wčera tema na Hannoverskim sudnistwje. Přenajerka 35 kwadratnych metrow wulkeho bydlenja je přećiwo wotnajerjej skoržiła, dokelž sej tam hunčko bjez jeje dowolnosće dźeržeše. Hižo trójce je jemu wupowědźiła, 38lětny pak nochcyše dotal wućahnyć. Po krótkim jednanju je wón nětko tola zwólniwy ze swojim Bruceom bydlenje hač do kónca awgusta wopušćić.
To a tamne (17.02.22)
Mały pokazowak časnika na cyrkwinej wěži pokradnyli su njeznaći w porynskim Kranenburgu – a to 50 metrow wysoko. Paduši zalězechu na twarske róšty, kotrež su tam za ponowjenje cyrkwje myslene. Prawdźepodobnje zwrěšćichu při pospyće, tež wulki pokazowak wotšrubować a zawostajichu jón wobškodźeny. Po wšěm zdaću měrjachu so na metal pokazowaka katolskeje cyrkwje swj. Měrćina. Snano chcychu paduši tež jeno suweněr.
Přez sćěnu domskeho jěła je žona ze swojim awtom w sewjerorynsko-westfalskim Hagenje. Prawdźepodobnje bě wona kontrolu nad wodźidłom zhubiła. Jězdźidło přerazy płót zahrody, durje terasy a skónčnje sćěnu domu. Pomocnicy wućahnychu šoferku snadnje zranjenu z awta. Dom, kiž hrozy so sypnyć, dyrbješe Techniski pomocny skutk zawěsćić. Policija je test kreje 58lětneje wukazała.
To a tamne (16.02.22)
W swojim awće kruće spjacy muž je w Drježdźanach zasadźenje wohnjoweje wobory zawinił. Přećelce njebě so poradźiło jeho w awće wubudźić, kotrehož motor běžeše. Hakle jako přiwołani wobornicy wóz zhromadnje zatřasechu, muž wotući. Njezranjeny wón wulěze a poda so do swojeho bydlenja, hdźež móžeše woměrje dale drěmać.
Powětr z wobručow 150 awtow wotpušćili su wobswětoškitni aktiwisća minjeny tydźeń w Berlinje. Policija je mjeztym dweju podhladneju zwěsćiła. Potrjechene běchu předewšěm wulke a drohe SUVje. Skućićeljo běchu powětr z jedneje abo tež hnydom ze wšěch wobručow wotpušćili. W dwěmaj padomaj wobruče rozkałachu. Na wjacorych awtach zawostajichu cedlu „z wobswětopolitiskim poćahom“ abo z namołwu za „hnydomnej wobchadnej změnu“.
To a tamne (15.02.22)
Ze 60 lětami zapozdźenja je wužiwar biblioteki w sewjerorynsko-westfalskim Mönchengladbachu wupožčenu knihu wróćił. Wona ležeše w pakćiku z južneje Francoskeje – zhromadnje z dwustronskim rukopisnym zamołwjenjom. Mjeztym 81lětny wupožčowar prosy w swojim lisće „tysac króć wo wodaće“. Jedna so wo knihu Friedricha Engelsa z lěta 1883. Titul móžachu nětko z dołheje lisćiny zhubjenych knihow šmórnyć.
40 lět z falšowanej jězbnej dowolnosću po puću był je muž w Osnabrücku. Wobšudnistwo so wukopa, jako chcychu lěta 1982 wupisany papjerjany dokument na po wšej EU płaćiwu plastikowu kartku zaměnić. Sobudźěłaćerjej zarjada za jězbne dowolnosće napadny, zo drje bě formular originalny, kołki a podpisma pak běchu falšowane. Wobsedźerjej hrozy jednanje falšowanja dokumentow dla.
To a tamne (14.02.22)
Z njewšědnym wubědźowanjom pytaja w delnjosakskim Emdenje za wobsedźerjemi šotrowanych zahrodow, zo bychu jim přirodźe tyjace přerjadowanje poskićili. Hač do měrca móža so wobsedźerjo tajkich zahrodow z fotom přizjewić. Komisija dźesać z nich wuzwoli. W mjezsobnej dorěči nastanje potom na dobro překasancow a ptačkow dźesać nowych zahrodow, kotrež pak hodźa so na tamnym boku jednorje wobhospodarić.
Ze swojim luksusowym awtom do Neckara zajěł je muž w badensko-württembergskim Gundelsheimje, po tym zo bě w přistawje čołmikow wustupić był. Jako chcyše dale jěć, zajědźe wóz małeje njeleposće dla do rěki. Awto płuwaše hišće wěsty čas na wodźe, doniž so dospołnje njepodnuri a tak 100 000 eurow. 37lětny móžeše so sam wuswobodźić a pobrjóh docpěć, poćerpje pak šok.
To a tamne (11.02.22)
Smorčenje muža je minjenu nóc w Drježdźanach zasadźenje wohnjoweje wobory wuwabiło. Něchtó bě so w zasadźenskej centrali přez nuzowe čisło přizjewił a wo mužu rozprawjał, kiž je epileptikar a kiž je we wulkim straše. Z wosebitym gratom móžachu pomocnicy durje bydlenja wočinić a namakachu měrnje spjaceho muža, kiž njebě w žanym času w straše. Hary na schodźe dla tukachu wobydlerjo na padustwo a wołachu policiju. Njedorozumjenje bě spěšnje wujasnjene.
Nabóčne wobhrodźenje zwjazkoweje dróhi přerězałoj staj mužej w Hornjej Pfalcy a měještaj za to kuriozne wopodstatnjenje: Pječa bě jeju wětřik z dróhi stłóčił. Na to běštaj podłu B85 dale jěłoj a njemóžeštaj skónčnje wjace dale. Tuž staj pjeć metrow dołhi kónčk wobhrodźenja z mašinu přerězałoj. Wobeju wočakuje nětko chłostanje.
