To a tamne (29.07.21)

Donnerstag, 29. Juli 2021 geschrieben von:

Dźewjeć awtodróhowych wotpočnišćow w New Jerseyju chcedźa po swětoznatych wuměłcach pomjenować. Wone maja potom mjez druhim James Gandolfini, Whitney Houston, Jon Bon Jovi abo Frank Sinatra rěkać. Z mjeńšimi wustajeńcami chcedźa tam na žiwjenje a tworjenje „starow“ skedźbnjeć. Z akciju hódnoća wusahowacy talent z New Jerseyja pochadźacych wuměłcow, kaž guwerner Phil Murphy zdźěli. Spěwar Bruce Springsteen tajke počesćenje wotpokazuje.

Dokelž je wažnu zdźělenku w ćahu přesłyšał, je 49lětny muž po puću z Hamburga do schleswigsko-holsteinskeho Neumünstera wulězć skomdźił. Hakle jako ćah na wotstajenskich kolijach stejo wosta, jemu to napadny. Dokelž njeje sej sam won zwěrił, zawoła policiju, kotraž jeho skónčnje „wěsće z ćaha přewodźeše“.

To a tamne (28.07.21)

Mittwoch, 28. Juli 2021 geschrieben von:

Winicar njesmě sekt bjez folije wokoło zatyčki w blešach předawać. To rozsudźi zarjadniske sudnistwo w Trierje a wotwobara skóržbu winicarja. Jemu běchu loni předań 1 300 blešow družiny Riesling falowaceje folijoweje kapsle dla zakazali. Muž skoržeše na to mjez druhim z argumentom přirodoškita. Sudnicy pak skóržbu wotpokazachu skedźbnjejo na to, zo sektowe bleše hižo dlěje hač 100 lět tak předawaja. Nimo toho zazyglowana bleša kupcej zawěsća, zo hišće wočinjena njeje.

Zhubjeny krokodil znjeměrnja tučasnje wobydlerjow čěskeho města Ostravy. Pjećlětny reptil je spěšny a kmany kóčku abo mjeńšeho psa popadnyć. Hižo wot minjeneje soboty mějićel za twochnjenym krokodilom pyta, štož pak je hakle dny pozdźišo zdźělił. Wón wšak ma so nětko na rozestajenje ze zarjadami nastajić.

To a tamne (27.07.21)

Dienstag, 27. Juli 2021 geschrieben von:

Wosebitu narodninsku lekciju „dyrbješe“ nowoseelandska ministerska prezidentka Jacinda Ardern nazhonić. Na prašenje šulerjow za swojej starobu je wona jich hódać dała. Město 41 lět pak mějachu ju za 62lětnu. Kaž Ardern nětko na Facebooku z posměwkom piše, wona nikomu njeradźi swoju starobu trochować dać. Mnozy wužiwarjo sej jeje humor chwala.

Prawdźepodobny třělc bu w Texasu sam wopor. Z třělbu wobrónjeny muž bě so póndźelu w nocy na swjedźenju z druhimi zwadźił a znajmjeńša jednoho natřělił. Na to kamjenje na njeho mjetachu. Při tym wón znowa třěli a jednoho z přesćěhanych smjertnje trjechi. Tež wón ­zranjenjam podleža. Policija warnuje, zo njeměli amaterojo wobrónjenych přesćěhać, ale to policiji přewostajić.

To a tamne (26.07.21)

Montag, 26. Juli 2021 geschrieben von:

Spodźiwny wobraz w lěsu skićeše so wčera w porynsko-pfalcowskim Neuwiedźe. W přirowje steješe tam awto, w kotrymž muž sedźo drěmaše. Swědcy informowachu tuž policiju, kotraž sej wěcku bliže wobhlada. Kaž so wukopa, bě 61lětny šofer orientaciju zhubił, do přirowa zajěł a sej skónčnje kruće wusnył, tak zo dyrbjachu zastojnicy jeho wubudźić. Přičina zamylenja pak po wšěm zdaću běše přewjele alkohola w kreji.

Wulki problem ma Europska unija tuchwilu ze złotymi hwězdami na módrym spódku. Jedna z hwězdow – Wulka Britaniska – dźě njehodźi so cyle jednorje šmórnyć. Britiske komuny maja chorhoj EU přeco hišće na wjele wabjenskich plakatach wotćišćanych, dokelž su pjenjezy z fondsa EU dóstali. Wulka Britaniska ma hišće hač do kónca 2023 prawo na pjenjezy ze strukturneho fondsa. Kak chcedźa tam potom z logom EU wobchadźeć, dotal jasne njeje.

To a tamne (23.07.21)

Freitag, 23. Juli 2021 geschrieben von:

Na wšě 20 000 wobdźělnikow wočakuja jutře w Berlinje na tradicionalnej paradźe homo-, bi- a transseksuelnych „Christopher Street Day“, po tym zo móžachu lońšu paradu jenož internetnje přewjesć. Demonstranća dyrbja koronakrizy dla škitny nahubnik wužiwać. Hłownej žadani lětsa stej zjednorić mjena za transseksuelne wosoby a zběhnyć zakaz za potrjechene skupiny, krej darić směć.

Z wodomjetakami a sylzopłunom je grjekska policija demonstraciju přećiwnikow šćěpjenja w Athenje rozpušćiła. Něhdźe 3 000 demonstrantow bě přećiwo naprawam knježerstwa protestowało, kotrež ćišć na nješćěpjenych zesylnja. Tak je mjeztym zakonsce postajene, zo smědźa do nutřkownych rumnosćow hosćencow a kulturnišćow jenož hišće šćěpjeni zastupić. Sobudźěłaćerjo strowotnistwa dyrbja šćěpjeni być.

To a tamne (22.07.21)

Donnerstag, 22. Juli 2021 geschrieben von:

Z čakarnje zubneho lěkarja na kupje Hawaii pokradnjeny wobraz su po 50 lětach w awkciskim domje w Texasu namakali a wobsedźerjej wróćili. Wobraz wuměłče Margaret Keane běchu 1972 w Honolulu pokradnyli. Loni w decembru je awkciski dom mólbu přesadźił, kotruž bě swójba w galeriji w New Jerseyju kupiła. Mjeztym je wobraz zaso na Hawaiiju.

Hotowy chaos zawiniła je wulka myš w parlamenće juhošpaniskeho regiona Andaluziska. Prezidentka tamnišeho parlamenta Marta Bosquet runje posedźenje nawjedowaše, jako wona pod blidami prawicarskopopulistiskeje strony Vox hrymzaka wuhlada a přez mikrofon wótře zakřikny. Na to skočichu wjacori zapósłancy ze swojich stólcow, někotři su samo žurlu wopušćili, čemuž so druzy smějachu. Skónčnje so zbywacym parlamentownikam poradźi, myš ze žurle wuhnać.

To a tamne (21.07.21)

Mittwoch, 21. Juli 2021 geschrieben von:

Tři lěta do jastwa dyrbi młody wulce­činjak w Španiskej, dokelž bě so jako pósłanc tamnišeho krala Felipe VI. a knježerstwa wudawał. 27lětny muž, kotrehož w kraju „Małeho Nicolása“ mjenuja, bě twjerdźił, zo ma styki mjez kralowskim domom a španiskim knježerstwom wudźeržować. Je to mjeztym druhi króć, zo dyrbi „Mały Nicolás“ wulcečinjenja dla do jastwa. Hižo jako 15lětny bě wón swoju „karjeru“ zahajił.

Nimale štyri promile alkohola w kreji měješe 48lětny wodźer awta, jako jeho policija lepi. Do toho bě 59lětny muž tomu zadźěwać spytał, zo pjany šofer firmu w Picnju we wokrjesu Sprjewja-Nysa wopušći. Dyrbješe pak nabok skočić, zo njeby awto do njeho zajěło. Něšto pozdźišo je policija zadźerža a naměri pola šofera 3,79 promilow. Jězbnu dowolnosć tón dawno žanu wjac njeměješe.

To a tamne (20.07.21)

Dienstag, 20. Juli 2021 geschrieben von:

Lubosćinske stonanje dweju jěžikow je w schwabskim Buchdorfje zasadźenje policije zawiniło. Muž bě zastojnikow wołał, dokelž na to tukaše, zo leži we wysokej trawje pódla jeho domu zranjene zwěrjo, najskerje „natřělena dźiwja ranca“. Policisća wšak spěšnje zwěsćichu, zo njejedna so wo dźiwje swinjo, ale wo dwaj jěžikaj, kotrejž běštej „intensiwnje zaběranej“, štož bě muža myliło.

100 000 eurow drohe husle je muž na Karlsruheskim hłownym dwórnišću w spěšniku ležo wostajił, a to hakle pytnył, jako bě ćah hižo zaso wotjěł. Měješe pak koče zbožo: Karlsruhe bě kónčna stacija ćaha. Zastojnicy na to wotstajeny ćah přepytachu a kófer z instrumentom namakachu. Nimo sto lět stareje wioliny běchu to tež hišće tři smyki w hódnoće 30 000 eurow. Wobsedźer bě „widźomnje wolóženy“, kaž w policajskej rozprawja rěka.

To a tamne (19.07.21)

Montag, 19. Juli 2021 geschrieben von:

Při ampli kruće wusnył je sej 25lětny w saksko-anhaltskim Merseburgu. Swědcy běchu policiju wołali, dokelž njebě muž při zelenej swěcy dale jěł a njereagowaše tež na kłapanje. Dokelž ličachu z medicinskim nuzowym padom, jedyn z policistow přez třěšne wokno do awta zalěze, na čož muž nadobo wotući, pušći borzdźidło a zajědźe do policajskeho awta. Test alkohola wunjese wjace hač promil. Jězbnu dowolnosć smorčakej wotewzachu.

Na zetkanju trójnikow w vogtlandskim wólnočasnym parku Plöhn je sakski ministerski prezident Michael Kretschmer (CDU) sobotu 18 hólcow a holcow do kruha swojich kmótřiskich dźěći přiwzał. Cyłkownje 210 trójnikow a wosom štwórnikow bě přeprošenje Kretschmera do parka sćěhowało. Sakska pěstuje kmótřistwo nad trójnikami wot lěta 1995 a podpěruje kóždu swójbu z 3 000 eurami.

To a tamne (16.07.21)

Freitag, 16. Juli 2021 geschrieben von:

W kurioznym dispuće z wobydlerjemi Heidelberga, kotřiž prawidłownje na campingowych stólcach před domom sydaja, je komunalny porjadowy zarjad swój dotalny kurs změnił. Wotnětka chcedźa jenož hišće zapřimnyć, je-li wěstota wohrožena, na přikład při zatykanych wuchowanskich hasach, město informuje. Heidelbergčenjo zetkawaja so předewšěm pjatk wječor na chódnikach před do­mami, zo bychu zhromadnje ­wino pili a bachtali. Město pak nochce, zo wuwiwa so tam „atmosfera piwoweje zahrody“.

Psa z třěchi wuchowała je wohnjowa wobora w Drježdźanach. Swědcy běchu žałosćaceho psa wuhladali a woboru wołali. Prawdźepodobnje bě tón přez třěšne wokno na třěchu zalězł. Kameradojo ­móžachu jeho z pomocu wjerćateho rěbla z pjeć metrow wysokosće wuchować a njezranjeneho wobsedźerjej přepodać.

Anzeige