To a tamne (29.01.24)
Nic za drohoćinki, ale za tykanc zajimował je so paduch w bydlenju w schleswigsko-holsteinskim Rendsburgu. Muž bě w nocy na sobotu do bydlenja wjaceswójbneho domu zalězł a sej tykanc na kuchinskim blidźe zesłodźeć dał. Wobydler w susodnej bydlenskej stwě so na spodźiwne zwuki dźiwaše, so na paducha dohlada a jeho narěča. Na to so cuzy z wočinjenym woknom zminy a po třěše ćekny. Policija jeho wjace njenamaka.
Wokna rjedźić je Michaelej Kretschmerej, ministerskemu prezidentej Sakskeje, wutrobita naležnosć a wulke wjeselo. Tole je šef sakskeho knježerstwa minjeny pjatk w rozmołwnym wusyłanju telewizijneho sćelaka MDR Riverboat přeradźił. Hłowna přičina njewšědneho konika je wuslědk: „Je to wulkotne, dokelž po tym něšto widźiš“, rjekny 48lětny Kretschmer w kruhu dalšich hosći pisaneho koła.
To a tamne (26.01.24)
Wjacore błyskače wotrězał je dotal njeznaty minjene dny na sewjeru Italskeje. Skućićel njeje znaty. Postupowanje na to pokazuje, zo jedna so wo jednotliwca, kiž z elektriskej piłu sćežory awtomatiskich nastrojow podrěza a powali. W socialnych medijach chwala skućićela jako rjeka a noweho Robina Hooda. Nětko diskutuja wo radarowych paslach na dróhach Italskeje. Kraj ma najwjace błyskačow po wšej EU: 11 000. Němska porno tomu něhdźe 5 000.
Hoberske mnóstwo metamfetamina z Němskeje su awstralscy cłownicy našli. 157 kilogramow syntetiskeje drogi běchu hižo kónc decembra na lětanišću w Sydneyju sćazali. Metamfetamin bě w 211 pakćikach pod zapakowanskim materialom schowany. Policija wumjetuje mjezynarodnym kartelam, zo chcedźa Awstralsku z drogami zapławić.
To a tamne (25.01.24)
Hnydom dwě wobchadnej zražce zawinował je 86lětny šofer wosoboweho awta w Werdauwje w Šwikawskim wokrjesu. Muž bě spočatnje přez wobchadnu kupu zajěł a sej při tym spódk awta roztorhał, na čož wolij motora wuběža. Zastał pak wón njeje, ale je hišće dwaj kilometraj dale jěł. Jězba so hakle skónči, jako wón do murje zahrodki zrazy. Muža dowjezechu do chorownje. Wěcna škoda wučinja po prěnim trochowanju 10 000 eurow.
Wo wunamakarju butroweje kokoški – sobu najwoblubowanišeje jědźe w Indiskej, dyrbi nětko sudnistwo rozsudźić. Wulke předewzaće gastronomije twjerdźi, zo je jědź jako prěnje w kraju poskićowało, žadajo sej wotškódnjenje 220 000 eurow wot konkurency, hdyž dale to samsne twjerdźi. Zwada zaběra mjeztym ludźi na wobydlerjach najbohatšeho kraja swěta tež internetnje
To a tamne (24.01.24)
Na wšěch 60 chłostajomnych njeskutkow nahromadźił je paduch, kotrehož su tele dny we Werdauwje pola Šwikawy lepili. Sudnik je jeho mjeztym do jastwa pósłał. 24lětny bě so na padustwa specializował a měješe dosć šěroki spektrum: Wón kradnješe wótřerěčaki, słuchatka a druhe elektroniske wěcy runje tak kaž kofej, palenc a žiwidła. Nimo toho je wospjet spytał, z falšowanymi pjenjezami zapłaćić. Policija móže jemu z nahrawanjemi kamerow tójšto padustwow dopokazać.
Hara a škrě elektriskeje piły su paducha kolesow w Berlinje-Friedrichshainje přeradźili. Wobydler Krachtoweje bě w nocy na wutoru w zadnim dworje stareho wjaceswójbneho domu haru słyšał a paducha wobkedźbował, kiž z aku-piłu runje rjećazowy zamk kolesa přerěza, při čimž škrě zalětowachu. Přiwołana policija móžeše paducha zajeć a koleso sćazać.
To a tamne (23.01.24)
Tigra – nic w tanku, ale w awće – měješe muž we Vietnamje, jako jeho policija zadźerža. Wjace hač 200 kilogramow ćežke rubježne zwěrjo bě w přewšo wuskej groćanej klětce w transporteru zawrjene a njemóžeše so tam scyła wjace hibać. 43lětny muž bě so podhladnje zadźeržał a spytaše ćeknyć, jako so policisća jeho dohladachu. Tigra bě wón za sto eurow kupił. We Vietnamje wužiwaja dźěle dźiwich zwěrjatow, kaž kosće, přeco hišće za tradicionalnu medicinu.
Na wšěch 22 tonow kokaina je policija w Ecuadorje sćazała. Drogi běchu w podzemskim składźe kriminelneje cwólby schowane a běchu za transport do wšeho swěta přihotowane. Na někotrych zapakowanych blokach, tak wulke kaž cyhel, běchu znački lětarskich předewzaćow hižo nalěpjene. Namakali su w składźe tež brónje, municiju a škričkowe nastroje.
To a tamne (22.01.24)
Hoberski nawal cikadow wočakuja wědomostnicy w nalěću na srjedźnym zapadźe a na juhowuchodźe USA. Lehnidle XIII a XIX runočasnje w 16 zwjazkowych krajach wudyritej, cyłkownje něhdźe bilion cyrčakow. Populacija wotpočuje najdlěši čas pod zemju a so hakle po 17 lětach na powjerch wudrapa. Potom so črjódy insektow z njesměrnej haru na přirodu wala. Za čłowjeka su cikady njestrašne. Ptačkam su bohata pica a po smjerći ratarjam witane hnojidło.
Grat za namócne łamanje do trezorow a domow su paducham stajnje zaso witana rubizna – z awtow wohnjoweje wobory. Wosebje požadane su wulke hydrawliske nožicy, z kotrymiž rubježne cwólby pjenježne transportery a bankowe trezory wočinja. Loni su w Berlinje 26 ćežkich padustwow z awtow wohnjoweje wobory zličili: Policija nima žanych skućićelow.
To a tamne (19.01.24)
Swój dener z filmowymi pjenjezami zapłaćić chcył je muž w sewjerobraniborskim Kyritzu. Jako jeho sobudźěłaćer wopačnych pjenjez dla narěča, chcyše muž ćeknyć. Do toho chcyše wón z bankowku dźesać eurow zapłaćić, štož pak běchu tak mjenowane movie-pjenjezy. Wopačne pjenjezy wužiwaja při filmowych a dźiwadłowych produkcijach jako rekwizitu. Policija pad přepytuje.
Titul „najstaršeho psa swěta“ su loni w pozdatnej starobje 31 lět zemrětemu pastwinemu psej Bobijej w Portugalskej sćazali. Fachowcy Guinnessoweje knihi rekordow dwěluja, zo je psyk woprawdźe tak stary był. Naprašowanje pola portugalskeho registra domjacych zwěrjatow bě wunjesło, zo su Bobija tam w juniju 2022 zapisali. Tehdy bě wobsedźer twjerdźił, zo je so pos 1992 narodźił. Wotpowědne podłožki pak njenamakaja.
To a tamne (18.01.24)
To a tamne (17.01.24)
To a tamne (16.01.24)
Bjez jězbneje dowolnosće je policist w Jendźelskej na dźěło jěł. Tež w běhu někotrych zasadźenjow je wón policajske awto wodźił. Kaž so wukopa, su mužej z města Kidderminster loni w meji někotrych wobchadnych přeńdźenjow dla jězbnu dowolnosć sćazali. Před někotrymi tydźenjemi je 26lětny muž swoju słužbu pola policije zakónčił. Nětko je jeho sudnik wospjetnych přeńdźenjow dla z dwanaće tydźenjemi jastwa pochłostał. Tohorunja ma wón hakle za połdra lět swoju jězbnu dowolnosć wróćo dóstać
Italske knježerstwo wabi tuchwilu za „cucina italiana“ – italsku kuchnju. Tak sej politikarjo přeja, zo maja so italske chłóšćenki z imaterielnym swětowym kulturnym herbstwom stać. Za to nětko intensiwnje wabja, mjez druhim z wosebitej akciju. Astronawća na mjezynarodnej swětnišćowej staciji maja nětko italske nudle dóstać.
