To a tamne (18.04.16)

Montag, 18. April 2016 geschrieben von:

Z nowym rekordom staj wohnjowej wobornikaj­ z Pólskeje minjenu sobotu w Berlinje wubědźowanje po schodach Park-Inn-hotela na Alexandrowym naměsće dobyłoj. Szczecinjanaj trjebaštaj za 770 schodźenkow hotela runje 5:42 mjeńšin a móžeštaj tak swój dotalny rekord 6:01 samo hišće polěpšić. Wjace hač 750 wohnjowych wobornikow z wosom krajow so na běhu w 39 poschodowym domje wobdźěli. Při tym mějachu 30 kilogramow ćežki wačok na chribjeće a płunowu masku před mjezwočom.

Pytajo ze sylnym magnetom za swojimi zhubjenymi klučemi je muž w Bayerskej ručnu granatu z jězora wućahnył. Kaž rěčnik policije wobkrući, bě granata z Druheje swětoweje wójny hišće strašna. 28lětny bě magnet při wudźe připrawił, po tym zo běchu kluče do jězora padnyli. Policija granatu znješkódni.

To a tamne (15.04.16)

Freitag, 15. April 2016 geschrieben von:

Sławny monster Nessie je namakany – znajmjeńša jeho atrapa. Ta bě so při natočenju filma před 47 lětami we hłubinach jězora Loch Ness w Šotiskej podnuriła, a wot toho časa běše zhubjena. Nětko je ju nurjenski roboter norwegskeje firmy namakał, kotryž měješe dno jězora wuměrić. Něhdźe dźewjeć metrow dołhi a štyri metry wysoki nastroj wupada kaž naddimensionalny kołp. Tón měješe 1969 w filmje „Sherlock Holmes“ Nessi zwobraznjeć. Při tym so wón podnuri.

Něhdźe 60 kilogramow kokaina je letiska policija sćazała. Drogi běchu jako małe prasowane kóstki po sto gramach mjez wuhlom ke grilowanju schowane. Posyłka wjacorych stow měchow wuhla pochadźa z Paraguayja. Drogi su šěsć milinow eurow hódne, policija zdźěli.

To a tamne (14.04.16)

Donnerstag, 14. April 2016 geschrieben von:

Dokelž chcyše pola swojeje přećelki zaćišć zawostajić, je 22lětny na dwórnišću w badensko-württembergskim Rottenburgu na železniski signal zalězł. Zakazane krosnowanje pak měješe njelube sćěhi: Wón njepřińdźe hižo zaso dele. Wohnjowa wobora jeho z pomocu wjerćiteho rěbla z wjacore metry wysokeho šćežora wuswobodźi, zdźěli policija. Akcija móh­ła hórše sćěhi měć, wšako dóńdźe jeje ­dla k zapozdźenju ćahow.

Rezolutna je so 82lětna w Porynsko-Pfalcy napřećo paduchej wopokazała, jako jemu plistu wottykny. Muž bě so zhromadnje z třomi kumpanami staruški za pućom prašał. Při tym hrabny z toboły, kotraž w košiku jeje rolatora ležeše, móšeń. Jako sej wona ju wróćo žadaše, so jej paduch wusmja. Na to žona jeho mjezwoči klesny. Přesłapjeny jej paduch tobołu wróći a so z tamnymi zminy.

To a tamne (13.04.16)

Mittwoch, 13. April 2016 geschrieben von:

Natutkany čěski policist wobškodźi wosrjedź Prahi ze swojim priwatnym awtom 51 parkowacych awtow a na to ćekny. Kaž policija čěskeje stolicy zdźěli, móžachu zastojnicy amokowu jězbu swojeho kolegi po pokiwach pěškow skónčić. Při kontroli naměrichu wjace hač promil alkohola. Policija nětko spyta, wobsedźerjow wšěch 51 wobškodźenych awtow zwěsćić. Cyłkownu škodu trochuja na wjace hač 100 000 eurow.

Zełharny pomocnik je 20lětnemu w Bremenje awto pokradnył. Paduch spočatnje 20lětnemu pomhaše defektne awto zaćišćeć. Při tym sydny so sam za wodźidło. Jako wóz zaskoči, „pomocnik“ z nim twochny. Při tym wšak wostaji swój nachribjetnik stejo. Policisća zamóchu jeho spěšnje identifikować, wšako běchu muža hodźiny do toho při kradnjenju we wobchodźe lepili. Za nim dale pytaja.

To a tamne (12.04.16)

Dienstag, 12. April 2016 geschrieben von:

Spodźiwnu namakanku mějachu zastojnicy zhromadneje němsko-pólskeje policajskeje jednotki wčera w Žitawje, jako na něhdyšim namjeznym přechodźe 25lětnu Pólku kontrolowachu. W ručnej tobołce bě mokra drasta. Hišće za čas kontrole zastojnikow informowachu, zo je žónska wosoba runje drastu ze šatneje lajny wzała a so zminyła. Při přepruwowanju personalijow žony zwěsćichu, zo je wona hižo­ wšelakich deliktow dla napadnyła.

Chětro hłódny drje bě paduch, kiž je so w USA do hosćenca za spěšnojědźe zadobył. Pjenjezy jeho scyła njezajimowachu. Město toho zapny kachle a sej hamburger wopječe, kaž wobkedźbowanske kamery we Washingtonje dokumentuja. Film je sej mjeztym 25 000 ludźi w interneće wobhladało. Nichtó muža njeznaje.

To a tamne (11.04.16)

Montag, 11. April 2016 geschrieben von:

Nimale 6 300 wobdźělnikow su sobotu wječor na mjeztym 10. lětanišćowym běhu na terenje přichodneho noweho wulkolětanišća BER w Berlinje zličili. Spektakularny parcours wjedźeše po wobswětlenych betonowych pistach jónu wokoło wšeho areala. Najspěšniša běharka połmarathona trjebaše 1:28:59, najspěšniši muž porno tomu 1:15:08. Kaž oficialnje rěka, chcedźa BER klětu wotewrěć.

Mjerzajo so na telewizijny program je muž w Rostocku z wosmeho poschoda swój telewizor dele ćisnył. Wobydlerka policiju sobotu wječor informowaše, zo je runje telewizor nimo jeje balkona dele padnył. Zastojnicy namakachu rozbity nastroj před zachodom domu. 52lětny muž prašacym so zastojnikam skónčnje při­zna, zo je aparat z hněwom z wokna ćisnył. Kotre wusyłanje je jeho rozhoriło, njeje znate.

To a tamne (08.04.16)

Freitag, 08. April 2016 geschrieben von:

Šampanske za 8 000 eurow je paduch w Mnichowje spakosćił. 46lětny posłužowaše so wospjet w ekskluziwnych wobchodach žiwidłow runje tak kaž w napojowym wotrjedźe kupnicy, kaž natočene filmy widejowych kamerow wobswědčeja. Minjeny tydźeń jeho předawarka při kradnjenju lepi. Policija muža zaja a dowjeze jeho do kliniki, dokelž prawdźepodobnje na chcyćiwosć ćerpi.

Wjace hač 600 kilometrow z awtom po Němskej­ jěłoj staj bratraj w starobje 15 a 16 lět zhromadnje ze 14lětnej přećelku. Młodostni ze Sewjerorynsko-Westfalskeje běchu so z awtom nana hólcow na puć nastajili. Policistam je wóz z cuzym čisłom w braniborskim Jahnsfeldźe po puću do Pólskeje napadnył, a nuzowachu je zastać. Staršej bratrow běštaj so mjeztym hižo pola policije přizjewiłoj, dokelž běchu awto kaž tež hólcaj fuk.

To a tamne (07.04.16)

Donnerstag, 07. April 2016 geschrieben von:

Z dobrym skutkom za swoju mandźelsku je 67lětny muž w Choćebuzu zasadźenje policije zawinił. Swědk bě wobkedźbował, kak muž zamk kolesa namócnje wočini a so z kolesom zminje. Přiwołanym po­licistam pak skićeše so hinaša wobstejnosć: Pomocliwy muž chcyše swojej žonje pomhać a defektny zamk wu­mě­nić. Za to dyrbješe jón přerězać, zo móhł koleso domoj přiwjezć. Zastojnicy su so swědkej přiwšěm za kedźbnosć dźakowali.

Z wótrej granatu je jědnaćelětny w emslandskim Esterwegenje do šule přišoł. Direktor pak donjese 17 centimetrow dołhu třělwu do pincy a informowaše policiju. Ameriska granata z Druheje swětoweje wójny bě woprawdźe wótra: By-li na zemju padnyła, móhła rozbuchnyć. Granatu bě nan hólca před 30 lětami w Nižozemskej namakał a je ju hólcej sobu do šule dał, zo by ju tam pokazał.

To a tamne (06.04.16)

Mittwoch, 06. April 2016 geschrieben von:

Braniborska chójna móže jako prěni štom po wšěm Zwjazku bórze wo swojim strowotnym stawje twitterować. Kaž institut­ za lěsnu ekonomiju Thünen w Eberswaldźe zdźěli, budu potom internetne daty štoma pokazować, kak woda běži abo so wuparja. Eksperća wobdźěleja so tuchwilu na europskim projekće TwitteringTrees, při čimž wuhotuja štomy z měrjakami a sensorami.

Njewšědne počesćenje we wulkim drjewjanym sudźe čaka na lawreata Nobeloweho myta za chemiju 2014 Stefana Hella. Jemu spožči towarstwo Markgräfler Gutedelgesellschaft z 225 litrami wina dotěrowane myto Markgräfler Gut­edelpreis. Hell, direktor Maxa Planckoweho instituta za biofyzikalisku chemiju w Göttingenje, je najebać wšě ćeže do wuspěcha swojich slědźenjow wěrił.

To a tamne (05.04.16)

Dienstag, 05. April 2016 geschrieben von:

W błóće tčacy wostało je awto pola badensko-württembergskeho Bad Wimpfena, dokelž bě so jeho šofer na nawigaciski nastroj spušćał. Při tym so w lěsu dospołnje zabłudźi. Skónčnje so awto tež hišće po mokrej skłoninje dele suny. 35lětny zazwoni nuzowe čisło policije. Ta pak dyrbješe so pěši po błóće k njemu předrěć. Mjeztym wšak bě na pomoc wołany­ traktor awto zaso na puć sćahnył.

Cyle naheho šofera po puću do bordela su policisća w posaarskim Völklingenje zadźerželi. 38lětny sedźeše njezdrasćeny za wodźidłom, jako jeho sobotu rano kontrolowachu. Dokelž njeměješe jězbnu dowolnosć, dyrbješe muž pěši dale hić – po tym zo bě so zdrasćił. Čeho­dla bě nahi po puću, wón sam njewědźeše.

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019