To a tamne (18.08.15)

Dienstag, 18. August 2015 geschrieben von:

Zhubjene belgiske praliny su w jendźelskim hrabinstwje Nottinghamshire policiju zaběrali. Žona bě so na běrow namakankow wobroćiła, dokelž bě słódki dowolowy nakup zhubiła. Mjeztym pak je sprawny muž praliny namakał a je wotedał. Dokelž pak njejsu sej zastojnicy personalije z Belgiskeje so nawróćeneje žony napisali, ju nětko z pomocu facebooka pytaja. Wona ma so prošu pola nich přizjewić: Praliny čakaja!

Njeznaći zadobywarjo su w napojowych wikach w Mülheimje nad Rynom wjac hač1 000 piwowych bleškow zwočinjeli, pytajo za schowanym losom k wulkemu dobyću. Bleše wěsteje piwarnje su wočinili, zo bychu so dóstali k we wěkach blešow schowanym losam, kaž policija wčera zdźěli. Dwanatki wěkow bjez prawych losow wostajichu we wikach ležo. Piwa sameho so skućićeljo přimali njejsu.

To a tamne (17.08.15)

Montag, 17. August 2015 geschrieben von:

Napity 18lětny je so w durinskim Stadt­rodźe direktnje na kolijach spać lehnył. Krótko do přijězda ćaha su jeho njedźelu rano wubudźili a jemu pomhali, spanske městno wopušćić, kaž policija zdźěli. Młody muž z Jeny je po nawróće z party w Erfurće prawe dwórnišćo zapasł a dale do Stadtroda jěł. Tam jeho na swój ćah čakaca žona wuhlada a policiju zawoła, kotraž pola njeho 0,6 promilow alkohola w kreji zwěsći.

Přechodźowar ze swojim psom je na grjekskej kupje Korfu zadźěwał ćeknjenju wjacorych jatych z jastwa. Psyk bě swojeho knjeza skedźbnił na zwuki pod powjerchom zemje. Muž je reagował a stražnikow informował. Woni namakachu po hnydom zahajenej kontroli zastup do tunla, kiž bě wjace hač 30 metrow dołhi. Jeći su pozdatnje wjacore měsacy na nim dźěłali, bjez wuspěcha.

To a tamne (14.08.15)

Freitag, 14. August 2015 geschrieben von:

Bobry su w Ruskej koporowe kable Transsibirskeje železnicy překusali a tak wěstotny system železniskeje čary zdźěla skóncowali. Po tym zo bě awtomatiske blokěrowanje wupadnyło, zdźělichu to železnicarjo policiji. Wěstotne mocy zwěsćichu bobry jako skućićelow a škodu zwuporjedźachu. Pola Transsib bě to prěni tajki pad. W Kaliningradźe běchu bobry loni štom překusali, kotryž padny na milinowód železnicy a jón roztorha.

Połsta lět je muž w Bayerskej bjez jězbneje dowolnosće z awtom jězdźił, bjez njezboža. Hakle wčera při wobchadnej kontroli so wukopa, zo je 68lětny bjez „papjerow“ po puću. Zastojnikam wón powědaše, zo njebě z 18 lětami pruwowanje wobstał a započa na to bjez dowolnosće jězdźić. Policija pósła jeho na městno sobujěduceho, a přećel muža měješe dale jěć.

To a tamne (13.08.15)

Donnerstag, 13. August 2015 geschrieben von:

Hłupe přispomnjenje „Bencin drje je předrohi?“ wodźerja motorskeho ­w Oberhausenje policistej, kiž bě słužbnje z kolesom po puću, měješe njelube sćěhi. Motorskemu běžeše bencin z mašiny. Jako měješe wón skóncowanu hadźicu za bencin nuznje sporjedźanu, je sej policist motorske bliže wobhladał. Značka bě pozdatnje pokradnjena a motorski njeměješe jězbnu dowolnosć. Wón dyrbješe swoje jězdźidło hnydom stejo wostajić a smědźeše z policistom na stražu k přesłyšowanju nóžkować.

W mikrožołmje je muž swój wupokaz woćoplił, zo by daty na mikrochipje wupokaza zničił. Wón nochcyše, zo jeho wosobinske daty na cuzych kompjuterach čitaja. Napadnyło wšak je to při kontroli na Frankfurtskim lětanišću. Nětko hrozy mužej pjenježna pokuta změny hamtskeho dokumenta dla.

To a tamne (12.08.15)

Mittwoch, 12. August 2015 geschrieben von:

Krótko do kónca hrajneje doby předawa wuměłstwowy běrow Nibelungenskich swjedźenskich hrow we Wormsu rekwizity aktualneje produkcije. Nimo kostimow, hlebijow, nopow a kožuchow stej to dwě wobornej wěži, kaž nawodnistwo swjedźenskich hrow zdźěli. Wobornej wěži ze železa wažitej sydom resp. dźesać tonow a změjetej „swój“ posledni wustup njedźelu, 16. awgusta. Snano naruna hódnota šrota płaćiznu za potworje.

Po live-wusyłanju plećenskeho marathona a dny trajaceje jězby z čołmom budźe norwegska telewizija publikum nětko z přinoškami ze swěta zwěrjatow zabawjeć. Nimale tydźeń chcedźa na sćelaku NRK 2 bjez přestawki pućowanje sobow z horin hač k morju wusyłać. Telewizijne mustwo chce stadło klětu nalěto přewodźeć. Přihladowarjo drje trjebaja za to wutrajnosć, wšako so soby pomału pohibuja.

To a tamne (11.08.15)

Dienstag, 11. August 2015 geschrieben von:

Traktorist w porynskim Nettetalu je wulke mnóstwo nakładowaneje morcheje zhubił, po tym zo bě přerazantnje po puću. Na kromje wsy zhubi wón móc nad wodźidłom, připowěšak so powróći a morchejowy přestrjenc pokrywaše cyłu dróhu. Morcheje su njezbožo derje přetrali, jeničce traktorist trjebaše po přespěšnej jězbje chětro wulku sćerpnosć, zo by je wšitke zaso zezběrał.

Nuzowa situacija je bjezdźěłneho w Kölnje pohnuła, sej drje najmjeńši domčk Němskeje natwarić. Dwaj měsacaj bydli wón mjeztym w 1,47 kwadratnych metrow wulkim bydlenskim mobilu, 210 centimetrow dołhim, 70 centimetrow šěrokim a 122 centimetrow wysokim. Bjezdźěłny nochcyše wot zarjada płaćene bydlenje, nochcyše pak tež pod mostom bydlić. Jeho mobil steji na parkowanišću firmy blisko Kölnskeho dwórnišća.

To a tamne (10.08.15)

Montag, 10. August 2015 geschrieben von:

Hórska straža w Berchtesgadenje je psa z hórskeje nuzy wumóžiła. Psyk bě po informacijach hórskeje słužby pola Schönauwa nad Königsseejom přez sněhowe polo běžał a do lodowcoweje škałoby padnył. Wobsedźerka bě so na hórsku słužbu wobroćiła. Helikopter pak njebě žadyn dispoziciji, tuž podaštaj so pomocnikaj pěši na puć. Jedyn z njeju pušći so z powjazom do škałoby a psa z wosebitym nastrojom wuchowa.

Před lětom pokradnjene nanowe awto je hólc po njezbožu w Brandenburgu nad Habolu pječa zaso spóznał. Wodźer awta bě ćeknył, po tym zo bě sobotu do 13lětneho zajěł. Hólčec, kiž bě z kolesom po puću, wšak je pokradnjene awto hnydom spóznał. Hólc při njezbožu padny a so zrani. Wodźer awta bě, prjedy hač so zminy, hólcej z pukami hrozył za pad, zo policiju woła.

To a tamne (07.08.15)

Freitag, 07. August 2015 geschrieben von:

Wšitke dróhi New Yorka přeběhał je William Helmreich. 69lětny profesor sociologije bě so před štyrjomi lětami na tróšku „kołwrótnu akciju“, zwažił, kaž me­dije rozprawjeja. Mjeztym je Helmreich wšitke 120 000 bydlenskich blokow w pjeć měšćanskich wobwodach wobešoł, štož je nimale 10 000 kilometrow. „Bych-li tehdy wědźał, kak napinace to budźe, njebych to nihdy činił“, Helmreich rozhłosownikam přeradźi.

Metalowy dźěl jeje nadrowca je turistku při hońtwjerskim njezbožu před ćežkim zranjenjom wuchował. 41lětna žona ze Sewjerorynsko-Westfalskeje bě ze swojim přewodźerjom z kolesom w Mecklenburgsko-Předpomorskej po puću, jako pola Gadebuscha naraz bolosće začuwaše. W metalowym dźělu nadrowca tčeše­ dźěl municije, kotraž pochadźeše z třělby hajnika. Policija pad přepytuje.

To a tamne (06.08.15)

Donnerstag, 06. August 2015 geschrieben von:

W drastowym kamorje před policiju schował je so pozdatny paduch w braniborskim Nauenje. Policisća chcychu 28lětneho do jastwa dowjezć, zo by njezapłaćenu pjenježnu pokutu wotsedźał. Tón pak schowa so w kamorje a kazaše sobuwobydlerjej, zastojnikam durje wotewrěć. Woni nańdźechu w bydlenju cyły rjad pokradnjenych wěcow, kolesa, grat a samo brónje. Skónčnje wuhladachu 28lětneho w kamorje. Jemu a kumpanej hrozy nětko krute sudniske jednanje.

Ze sekeru je pilot lětadła pjaneho pasažěra w šwedskim lětadle nuzował nuznik wopušćić. Muž bě so tam zamknył a so spjećował ju zaso wopušćić. Dokelž je za čas přizemjenja zakazane, wustup wužiwać, so pilot rozsudźi durje kabiny ze sekeru rozbić a pasažěra wućahnyć. Muža nachwilnje zajachu a na lětanišću čakacej mandźelskej přepodachu.

To a tamne (05.08.15)

Mittwoch, 05. August 2015 geschrieben von:

Rozmjerzany guwerner zapadoboliwiskeho departementa Oruro je njedypkownym zastojnikam budźaki darił. Přidatnje­ su stajnje zaso zapozdźeni zastojnicy pisomny porok dóstali. „Někotři zjewja so w poslednim wokomiku“, so guwerner hněwa, „jim ma so wujasnić, zo su słužownicy stata. Nětko dyrbja woni tuž stajnje hižo pjeć mjeńšin do spočatka dźěła na městnje być.“

W Japanskej postupuja přećiwo předešćnikam we wobchadźe. Z předešćnikom wuhotowani kolesowarjo ranja nětko postajenja nadróžneho wobchada. Naprawa pokazuje wuskutk: Dźeń a wjace kolesowarjow wužiwa poncho. A naprašowanja za dešćowymi płašćemi w Japanskej přiběraja. Po změnjenym wobchadnym zakonju je z předešćnikom kolesować runje tak strašne kaž pod wliwom alkohola.

Anzeige