To a tamne (08.10.15)

Donnerstag, 08. Oktober 2015 geschrieben von:

Ze swojimi pomazkami su policisća na parkowanišću­ při awtodróze A 24 pytaneho wowčerskeho psa zaso popad­nyli. Pos bě wobsedźerce před pjeć dnjemi na parkowanišću twochnył. Wčera je so najskerje hłódny zaso nawróćił. Wědźo, zo je ćeknył, zazwonichu sobudźě­łaćerjo policiju. Ta psa z pomazkami a kołbaskami do słužbneho awta zwabi. Dźakowna wobsedźerka sej při nich swojeho psa wotewza.

Dokelž njebě nichtó doma, ćisny přistajeny póšty w Čornym lěsu pakćik na balkon adresata a kwitowanku za pakćik sam podpisa. Z toho policija wuchadźa. 30lětny adresat pakćika bě so dźiwał, zo pakćik njedóstanje, byrnjež přez internetowy portal zdźělenku dóstał, zo je pakćik po puću k njemu. Dźeń pozdźišo wšak přizjewi, zo bě požadany pakćik na balkonje­ našoł.

To a tamne (07.10.15)

Mittwoch, 07. Oktober 2015 geschrieben von:

Při woptawanju wina při rěče Mosel je so mandźelski ze Sewjerorynsko-Westfalskeje zminył. Swojej žonje rjekny, zo dźe do bliskeje banki, policija zdźěli. Jako pak po dwěmaj hodźinomaj přeco hišće wróćo­ njebě, informowaše žona policiju wo zhubjenym mandźelskim. Po krótkim času so muž natutkany nawróći. Wón bě w bliskej korčmje piwo pił, dokelž wo wino njerodźi, kaž rjekny.

Z cyłym kófrom Whiskyja je paduch w Lörrachu spytał, přez mjezu do Šwicarskeje přińć. Muž bě wčera wječor pěši po puću, jako jeho šwicarska pomjezna straža kontrolowaše. W kófru namakachu 29 blešow palenca. Dokelž běchu etikety wotškrabane, přiwołachu policiju, kotraž 27lětneho zaja. Wotkal alkohol měješe, njemóžeše wón rozkłasć. Poli­cija z toho wuchadźa, zo je muž palenc w kupnicy w Lörrachu pokradnył.

To a tamne (06.10.15)

Dienstag, 06. Oktober 2015 geschrieben von:

Maneža w swětnišću: Ze wšelakimi akrobatiskimi poskitkami je sej wobsadka swětnišćoweje stacije ISS swój swobodny čas porjeńšiła. Wotpowědny widejo improwizowaneho cirkusoweho předstajenja je ruski swětnišćowy zarjad Roskosmos w interneće wozjewił. Ruscy psychologojo běchu kosmonawtam k tomu radźili, zo bychu so po napinacym dźěle w swětnišću wočerstwili. W staciji su tuchwilu třo Rusojo, Američanaj a Japančan.

Za złamanu ruku bura dyrbitaj hajnikaj wotškódnjenje płaćić. To je Zwjazkowe sudnistwo w Karlsruhe rozsudźiło. Hajnikaj běštaj w decembru 2009 w emslandskim Frerenje přihonjersku hońtwu zarjadowałoj. Při tym bě pos na bliskej pastwje kruwy spłóšił, kotrež na to ćeknychu. Bur spyta je zaso popadnyć a sej při tym ruku złama. Wot toho časa je na wjacorych­ instancach skoržił.

To a tamne (05.10.15)

Montag, 05. Oktober 2015 geschrieben von:

Jako Ninja-wojowar předrasćeny Awstralčan je minjeny pjatk w ćahu mjez Budapestom a Drježdźanami ludźi nastróžił. 34lětny běhaše, cyle čornje zdrasćeny a z pozdatnymaj­ tesakomaj na chribjeće, wospjet w ćahu tam a sem. Bojo so atentata­ wołachu policiju, kotraž muža w Drježdźanach přewza. Ta wšak njemóžeše ničo wopačneho zwěsćić: Tesakaj běštaj předešćnikaj. Awstralčan rozłoži, zo jedna so wo hru, w kotrejž maja hrajerjo wěste nadawki spjelnić: Wón měješe so jako Ninja-wojowar z Budapesta do ródneho Bad-Segeberga nawróćić.

Pozdatny kokain na Oktoberskim swjedźenju je wjacorych turistow rozhorił. Přiwołani policisća pak móžachu wěc rozjasnić: Młodostni srěbaja cokorowy próšk a mentol do so, tak mjenowany „Wiesn-Koks“, nowy modowy trend.

To a tamne (02.10.15)

Freitag, 02. Oktober 2015 geschrieben von:

Wosamoćena kupa je w Awstralskej na předań.­ Kupa Waterhouse je tři kilometry wot sewjerneho pobrjoha Tasmaniskeje zdalena, je kilometer šěroka a 4,5 kilometrow dołha. Na njej stej domčkaj, mały přistaw, lě­tanišćo za małe mašiny a krasny pě­skojty přibrjóh, kaž wikowar imobilijow zdźěla. Nimo toho je tam wjele­ płoniny za plahowanje wowcow. Kupa, kotraž ma cyłkownje 3,5 milionow eurow płaćić, je w swójbnym wobsydstwje.

Črjóda wopicow je w Simbabwe radijowy sćelak zlemiła. Prawdźepodobnje hłódne pawiany běchu na sćežorje wusyłanski kabl překusali. Jako nadobo radijo wupadny, tukachu sobudźěłaćerjo na wupad miliny. Inženjerojo pak zwěsćichu, zo bě wusyłanski kabl na horje njedaloko stolicy Harare­ překusany. Někotre wopicy tam samo hišće běchu.

To a tamne (01.10.15)

Donnerstag, 01. Oktober 2015 geschrieben von:

Dweju hólcow z Delnjeje Sakskeje na wulěće z pokradnjenym awtom je policija lepiła. Pachołaj w starobje jědnaće a dwanaće lět běštaj na awtodróze A 2 po puću do Berlina, jako jeju pola Wolfsburga zadźeržachu. Při tym jědźeštaj runje tak spěšnje kaž druhe awta. Šoferojo zastoj­nikow wołachu, dokelž běštaj jimaj hólcaj napadnyłoj. Awto staj pokradnyłoj, dokelž bě wobsedźer klučik tčacy wostajił.

Wosrjedź sudniskeho jednanja je sej přisydnica w Bochumje wusnyła, jako prawiznik swój kónčny pledoajej přednjese. Sudnik jednanje na to přetorhny. Poł hodźiny pozdźišo smědźeše prawiznik hišće raz wotprědka započeć.

To a tamne (30.09.15)

Mittwoch, 30. September 2015 geschrieben von:

Ze swojim turbanom staj přisłušnikaj nabožneje zhromadnosće sikh wjacorych młodostnych w Indiskej před zatepjenjom wuchowałoj. Poprawom nabožne předpisy mužam njedowoleja, turban w zjawnosći z hłowy wzać, medije rozprawjeja. Młodostni běchu we wobłuku nabožneho nałožka do kanala padnyli a hrožachu so zatepić. Mužej tuž swój dźewjeć metrow dołhi turban rozwali­štaj a staj z nim młodostnych wućahnyłoj.

Pola šewca po črije byli su třo najwjetši mužojo swěta w münsterlandskim Vredenje. Běchu to z 2,51 metrami najwjetši muž, 33lětny Sultan Kösel z Turkowskeje, w Parisu bydlacy Marokkočan Brahim Takioullah z 2,46 metrami a 2,32 metrow wulki Abdramane Dembele, tohorunja w Parisu bydlacy ze Słonowinoweho pobrjoha. Dźěłarnja Georga Wes­selsa hižo wjele lět črije za nich zhotowja.

To a tamne (29.09.15)

Dienstag, 29. September 2015 geschrieben von:

Swojoraznu jězbnu šulu skónčiła je policija w poruhrskim Hagenje. Zastojnikam bě awto napadnyło, kotrež po parkowanišću tam a sam jězdźeše. Njemało pak so dźiwachu, jako wuhladachu 13lětneho za wodźidłom. Pódla njeho sedźeše 38lětny nan, mějo dwaj promilej alko­hola w kreji. 13lětny rjekny, zo jězdźić zwučuje. To wšak je w přitomnosći staršeju dowolene, jeho nan přispomni. Zastojnicy­ běchu hinašeho měnjenja a 38lětneho wobskoržichu.

Wino němskeje jednoty su studenća ze wšěch winowych kónčin kraja zhotowili. Při tym su wina wšitkich 13 plahowanskich kónčin k jednomu změšeli. Je to­ prěni projekt tajkeho razu w Němskej. Předstajić chcedźa wino 3. oktobra w Frankfurće nad Mohanom.

To a tamne (28.09.15)

Montag, 28. September 2015 geschrieben von:

Zadwělowany přihladować dyrbješe 60lětny w Delnjej Frankskej, kak so jeho awto w rěce Mohanje tepi. Muž chcyše sobotu wječor po informacijach policije swój čołm z pomocu připowěšaka z rěki wućahnyć. Čołm pak wopokaza so jako přećežki a sćahny připowěšak kaž tež awto do rěki. Muž móžeše runje hišće z awta wulězć, prjedy hač so wone podnuri. Wohnjowa wobora drje je zaso wućahny, wěcna škoda pak njeje runjewon mała.

Njeprošeneho hosća dyrbješe policija wčera rano z bydlenja žony w Saarbrückenje wjesć. Měnjo, zo je pjany při bydlenskich durjach znaty jeje přećela, bě žona njeznateho njedźelu rano do bydlenja pušćiła. Tón pak dźěše runu smuhu do spanskeje stwy a so lehny. Jako so přećel nawróći, so wukopa, zo wón muža we łožu scyła njeznaje. Tón bě so prosće mylił a wo wopačne durje kłapał.

To a tamne (25.09.15)

Freitag, 25. September 2015 geschrieben von:

Chłóšćenkowe awtomaty za wopicy maja wot najnowšeho w Berlinskej co­ologiskej zahrodźe. Z nich móža sej wopicy słódne pelety wućahnyć – jeli to zdokonjeja. Za to dyrbja sej z kiješkow grat paslić a z jeho pomocu chłóšćenku z awtomata wućahnyć. Dalše pelety po wěstym časowym planje awtomatisce do chłóšćenkoweho kašćika padnu. Wulka lěpšina nowych nastrojow je: Wopicy su cyły dźeń zaběrane.

Nowy rekord spěšnosće awta chcedźa jendźelscy inženjerojo nastajić. Za to předstajichu wčera w Londonje wotpowědne jězdźidło Bloodhound. Awto, lěpje­ prajene lětadło na kolesach, ma hač do 1 600 km/h spěšne być. Dotalny rekor­d je 1 228 km/h. Nastajić chcedźa nowy rekord w Južnej Africe.

Anzeige