To a tamne (03.12.15)

Donnerstag, 03. Dezember 2015 geschrieben von:

Happyend za małeho psa: Před pjeć lětami w bayerskim Schlüsselfeldźe ćeknjeny chihuahua Charly je zaso pola swojeho wobsedźerja. Kedźbliwa pěška bě wosamoćeneho psyčka widźała a ke skótnemu lěkarjej donjesła. Na zakładźe chipa wón spěšnje zwěsći, komu Charly­ słuša. Wočiwidnje běchu ludźo Charlyja derje picowali, dokelž je přećežki. „Wón je hłuchi a nimale slepy, ale strowy. Najwjetši hodowny dar nam je, zo jeho zaso mamy“, swójba w interneće piše.

Powětrowy balon je wčera Madridsku podzemsku železnicu w rańšim powołanskim wobchadźe cyłu hodźinu zlemił. Z heliumom pjelnjeny balon z metalowym poćehnjenjom bě hólcej z ruki zjěł a so milinowoda dótknył. Na to so wjacore kable přepalichu a zawinowachu krótkospjeće.

To a tamne (02.12.15)

Mittwoch, 02. Dezember 2015 geschrieben von:

Zbytk tykanca, wot kotrehož bě awstriska kejžorka Elisabeth (1854–1898) před 118 lětami woptała, su krajnemu muzejej za turizm­ w italskim Meranje přepo­dali. „Sisi“ bě 1897 na wopyće hojenskeho města Meran njejapcy do hosćenca zastupiła. Wot poskićeneho tykanca da sej jeno skibku serwěrować. Zbytk sej swójba wobchowa­ a wot generacije ke generaciji jako wosebitu drohoćinku dale dawaše. Nětko přewostaji jón swójba muzejej.

Dźiwje zachadźaca kruwa, kotraž bě so w septembru 2014 z Mnichowskeje rězarnje wudobyła, budźe pad za sudnistwo. Kruwa bě na ćěkańcy młodu žonu zraniła, kotraž­ po lěsu joggowaše. Policija dyrbješe skoćo zatřělić, kotrež bě hač na łuku ćeknyło, hdźež hižo stany za oktoberski swjedźeń twarjachu. Wobsedźer kruwy wšak so dotal spjećuje, 500 eurow za zasadźenje policije zapłaćić.

To a tamne (01.12.15)

Dienstag, 01. Dezember 2015 geschrieben von:

Na hodownu rubiznu měrili su so paduši minjeny kónc tydźenja w sewjernej Němskej: W Delmenhorsće pokradnychu woni na parkowanišću wulkokupnicy 60 hodownych štomow w hódnoće 1500 eurow, po tym zo běchu płót přełamali. Pola Bremerhavena spakosćichu z wjacorych priwatnych ležownosćow elektrisku hodownu dekoraciju. W bliskim Bevenstedće zhubi so wjace hač dźesać kormjenych husycow z ratarskeho zawoda.

Nócne zwonjenje katedrale swj. Marije w awstriskim Linzu drje budźe nětko najwyše sudnistwo kraja zaběrać. Muž bě sej lěta 2004 njedaloko­ Božeho domu chěžu kupił. Wot toho časa njemóže spać, dokelž zwony kóžde­ štwórć hodźiny bija, 222 króć wšědnje. Dotalne sudniske instancy měnjachu, zo wšak by muž tole wědźeć dyrbjał, jako sej chěžu kupi.

To a tamne (30.11.15)

Montag, 30. November 2015 geschrieben von:

Njewšědne zwěrjeće přećelstwo wuwiwa so w ruskim safarijowym parku Primorje­ pola Wladiwostoka: Sobudźěłaćerjo běchu wurosćenemu tigrej Amur kozoła Timur jako picu přewostajili. Tiger, kotryž je zwučeny dwójce wob tydźeń za žiwej picu honić, kaž su to kozy a nukle, pak Timura přelutowa. Nětko wobaj zhromadnje po terenje běhatej. „Kozy Amurej hižo njedawamy“, rjekny direktor parka medijam, „chcemy dalše wuwiće wobkedźbować. Tuchwilu stej zwěrjeći najlěpšej přećelej.

Tójšto mjerzanja zbudźił je wiceprezidenz USA Joe Biden w italskej stolicy Romje. Na kromje oficialneho programa wopyta wón zhromadnje z mandźelskej drohi wobchod na nakupowanskej dróze Via dei Condotti. Wobrónjene wěstotne mocy USA wuhnachu za to wšitkich turistow a wobydlerjow z dróhi. „Njejsmy Bogotá abo Karachi“, medije swarja.

To a tamne (27.11.15)

Freitag, 27. November 2015 geschrieben von:

Přez płót Běłeho domu skočił je muž we Washingtonje, jako prezident USA Barack Obama ze swójbu a hosćimi na zahrodźe thanksgiving swjećeše. Muž bě do chorhoje USA zawobaleny. Wobrónjeni zastojnicy słužby Secret Service, za wěstotu prezidenta zamołwići, su zadobywarja zajeli. Motiwy muža njejsu znate. Je to lětsa hižo třeći króć, zo je so něchtó přez płót na ležownosć Běłeho domu dóstał.

Darmotnu poliwku je Syričan Alex Assali na Berlinskim Alexanderowym naměsće potrěbnym rozdźělał. Wón chcyše so tak Němskej dźakować, zo je jeho jako ćěkanca přiwzała, kaž nowinarjam rjekny. 38lětny Assali bě hižo před lětami před režimom Assada ze Syriskeje ćeknył. Ze swojej­ akciju žněje tež w interneće wjele chwalby a připóznaća.

To a tamne (26.11.15)

Donnerstag, 26. November 2015 geschrieben von:

Putnikam a turistam w Romje derje znaći jako staroromscy legionarojo předrasćeni mužojo dyrbja sej nowe dźěło pytać. Měšćanski prefekt Paolo Tronca je zakazał, so w historiskich drastach za pjenjezy fotografować dać. Legionarojo běchu stajnje zaso hněw zbudźeli, dokelž sej wot turistow dosć agresiwnje wjele pjenjez za fotografowanje žadachu. Tym, kotřiž to dale činja, hrozytej wysoka pjenježna pokuta a sćazanje kostima.

Tři měsacy po swojim dowolu je žona w sewjerorynsko-westfalskim Herfordźe w swojim bydlenju skorpiona wuhladała, kotrehož drje bě sej mylnje z dowola při Srjedźnym morju sobu přiwjezła. Po tym zo bě na sćěnje sedźace zwěrjo ze škleńcu popadnyła, zawoła policiju. Ta zwěsći, zo njeje skorpion strašny, wšako bě by­dlenje 47lětneje hižo tři měsacy jako nowe­ bydło wužiwał.

To a tamne (25.11.15)

Mittwoch, 25. November 2015 geschrieben von:

Lěto 2015 drje budźe najćopliše wot zahajenja zapisowanja. Přerězna temperatura bě lětsa prěni króć wo cyły stopjeń wyša hač w času do industrializacije kónc 19. lětstotka, zdźěla Swětowa organizacija za meteorologiju­ w Genfje. Hłownej přičinje stej wot čłowjeka zawinowana klimowa změna kaž tež fenomen El Niño, při kotrymž morjo wjele składowaneje ćopłoty zaso wotedawa. „Špatne to po­wěsće za planet“, fachowcy pišu.

Z ćahom ćeknył je sydomlětny hólčec w Berlinje. Při tym jědźeše kaž kóžde rano najprjedy z busom do šule. Tam pak sydny so wón do měšćanskeje železnicy a jědźeše hač do Frankfurta nad Wódru. Železnicarka so samolutkeho bjez přewoda dohlada a informowaše policiju. Wulět pachoła so zbožownje skónči, jako jeho staršej pola policije wotewzaštaj.

To a tamne (24.11.15)

Dienstag, 24. November 2015 geschrieben von:

18 kóčkow w 100 kwadratnych metrow wulkim bydlenju je přewjele a přičiny dosć za hnydomne wupowědźenje. Tole je Augsburgske hamtske sudnistwo rozsudźiło. Přenajer bydlenja bě podružnikej před štyrjomi lětami dowolił sej kóčku dźeržeć. Mjeztym pak so sobuwoby­dlerjo wjaceswójbneho domu přiběrajcy hóršachu, předewšěm smjerda kočich powostankow na schodźe domu dla.

Slědy w sněze su policistow runu smuhu k paduchej wjedli. 28lětny bě so w nocy na póndźelu do jednoswójbneho domu w Lipsku zadobył. Susod tole wobkedźbowaše a alarmowaše policiju. Ta trjebaše jeno stopy w sněze slědować a paducha zaja, jako chcyše tón ćeknyć. Při sebi měješe telefony, kompjuter a kameru. Wobsedźerjo domu spachu.

To a tamne (23.11.15)

Montag, 23. November 2015 geschrieben von:

Štyrjoch wopačnych policistow su w Berlinje lepili. Wulcečinjacy w starobje 28 do 33 lět jědźechu w nocy na sobotu z módrej swěcu a sirenu po měšćanskim dźělu Friedrichshain. Při tym přesćahnychu awto z ciwilnymi zastojnikami, po­kazujo jim policajsku machawku. Zastojnicy wšak jich přesćěhachu a z pomocu kolegow zadźeržachu. Pola 33lětneho šofera zwěsćichu 1,8 promilow alkohola. Awto njebě zawěsćene.

Z pomocu bagra su rubježnicy w durinskim Münchenbernsdorfje spytali, pjenježny awtomat rubić. Wjaceswójbny dom, w kotrymž je wotnožka banki zaměstnjena, pak njeznaći při akciji w nocy na njedźelu chětro wobškodźichu z bagrom, kotryž běchu do toho w twarskej firmje pokradnyli, spotorhachu wukładne wokno a dźěl fasady. Pjenjezy pokradnyć pak so jim njeporadźi. Wostajichu bager tuž wosrjedź dróhi stejo a ćeknychu. Dom njeje hižo wužiwajomny.

To a tamne (20.11.15)

Freitag, 20. November 2015 geschrieben von:

Tež we Vatikanje so pomału na hody přihotuja. Wčera su tam z kranom 25 metrow wysoku jědlu postajili, dar bayerskich gmejnow Hirschau, Schnaitterbach a Freudenberg. Jědla budźe wudebjena z pisanymi keramiskimi kulemi, kotrež dźěći w italskich chorownjach zhotowjeja. Hoberski žłobik na Pětrowym naměsće je dar awtonomneje prowincy Trentino w Italskej.

W Botswanje su po informacijach kanadiskeho hórniskeho předewzaća druhi najwjetši dejmant swěta nadešli. Droho kamjeń waži 1 111 karatow a ma wulkosć tenisoweho bula. Je to najwjetši namakany dejmant minjenych sto lět. Najwjetši dotal znaty dejmant namakachu 1905 w Južnej Africe pola Pretorije. 3 106 karatow ćežki kamjeń bu dźěleny a słuša nětko k juwelam britiskeje króny kralowny Elisabeth II.

Anzeige

  • Serbska lajska dźiwadłowa skupina Šunow-Konjecy je swoju nowu komediju "Ludźo njedźiwaće so" 9. nowembra prapremjernje w Šunowskej Fabrikskej hospodźe předstajiła. tule namakaće někotre impresije z inscenacije. 

Tohorunja tón kónc tydźenja su w Ketl