Předstawizny Chróšćanskeho pasiona njesahaja tak daloko wróćo kaž Oberammergauskeho. Tam běchu jón w lěće 1634 předstajeć započeli, a po tym kóžde dźesać lět. Přiwšěm su pasionske hry tež w Serbach stawizny pisali, a wěste wuwiće hodźi so tohorunja zwěsćić. Prěni raz, zo su ćerpjenje Jězusa w serbskej rěči pokazali, bě 1936 na Wjenkec žurli w Chrósćicach. Jědnaće lět pozdźišo slědowaše dalše předstajenje, a to w Chróšćanskej farskej cyrkwi. Pawoł Kmjeć bě za to tekst spisał.