Jutrowničku sej wjace ludźi z cyłeje Němskeje a wukraja křižerske procesiony wobhladało
Wosebje na dworje klóštra Marijineje hwězdy a w Pančicach-Kukowje samych bě wočiwidne, zo bě lětsa jutrowničku při wujěchanju klóšterskich křižerjow wjace přihladowarjow hač loni. Tole wotbłyšćowaše so tež na awtowych čisłach z Berlina, sewjerneje Němskeje a z Bayerskeje. Kaž nam swójba Schädlich z Ranja (Großräschen) a Oldenburga, kotraž připołdnju w Kukowje na łuce blisko Rjedźic kubła swačeše, rjekny, přebywaja woni runja mnohim kóžde lěto jutry rady w Serbach. Druzy běchu sej termin křižerskich procesionow z medijow wučitali a so spontanje za wopyt serbskich wsow rozsudźichu. Znowa móžachu wšitcy dostojne procesiony dožiwić, byrnjež tu a tam, kaž we Wotrowje a Hózku, mjez cyłkownje 1 594 křižerjemi k někotrym njezbožam a zranjenjam dóšło.
