Sport (18.06.21)

Freitag, 18. Juni 2021 geschrieben von:

Na a we wodźe sportować

Wodoskijowa připrawa Wake and Beach w Brězowce (Halbendorf) a přisłušacy wodowy park za kupanje stej dźensa hišće hač do 19 hodź. wotewrjenej. Jutře a njedźelu „sněhakuja“ po wodźe Brězowskeho jězora wot 14 hodź. kóždej dwě hodźinje. Na internetnej stronje www.wakeboard-halbendorf.de je tež wuwidźeć, kotre naprawy hygieny płaća.

Prěnje přećelske hry nastajene

W teritoriju Zapadołužiskeho koparskeho zwjazka steja po dołhim času w hrajnych lisćinach zaso prěnje přihotowanske a přećelske hry.

19.06. 10:30 Wojerowski FC –

  SV Wacker (młodźina B)

19.06. 11:00 Wojerowski FC –

Kulow (młodźina D)

20.06. 11:30 Biskopičanske KT –

  FC Lößnitz (mužojo)

27.06. 11:00 Biskopičanske KT –

1. FFC Fortuna Drježdźany (žony)

Žabjacy běh na třoch dnjach

Sportowe towarstwo Běła-Cunnersdorf přewjedźe lětsa tak mjenowany Žabjacy běh wot 25. do 27. junija. Tele zarjado­wanje bu dowolene, dokelž wubědźuja so běharki a běharjo na třoch dnjach město na jednym. Zamołwići su wjacore startowe koridory postajili:

25.06. 15:00–20:30 hodź.

26.06. 06:00–11:30 hodź.

26.06. 15:00–20:30 hodź.

27.06. 06:00–08:30 hodź.

27.06. 09:00–11:00 hodź.  walking

Duel wo postup do wyšeje ligi

Nižozemska wubranka hižo we wosmifinalu

Freitag, 18. Juni 2021 geschrieben von:

Amsterdam (kh/SN). Nižozemska narodna koparska wubranka je wčera při swojim comebacku na wulkim jewišću tež swoju druhu hru europskich koparskich mišterstwow (EM) dobyła a prěnje městno w skupinje C přewzała. Nawjedowani wot trenarja Franka de Boera podachu so jeho chowancy po wot­hwizdanju na čestne koło po Amsterdam-arenje. Ze sylnej ofensiwnej kopańcu je team „Oranje“ dočasnje wosmifinale EM docpěł. Nižozemjenjo běchu so z 2:0 suwerenje přećiwo Awstriskej přesadźili. Tak zdobywaja sej sydom lět po po­slednim wobdźělenju na wulkim koparskim turněrje dale a bóle rólu faworita. Memphis Depay přetwori w prěnim połčasu jědnatku, a Denzel Dumfries třěli w druhim połčasu 2:0.

ST Marijina hwězda přeproša na jubilejny běh

Donnerstag, 17. Juni 2021 geschrieben von:

Poprawom chcyše Pančičanske sportowe towarstwo lětsa swój stoty jubilej porjad­nje woswjećić. Wězo bychu tež sportowali. Wosebje integraciski sportowy swjedźeń by za wobydlerjow domu zbrašenych w klóštrje zaso rjany wjeršk był. Aktualneje situacije korony dla pak su so za alternatiwu rozsudźili a pře­prošuja wšitkich na digitalny jubilejny běh. Tam móžeće sam/a abo jako mustwo nastupić. Přizjewić maš/maće so prošu z mejlku na .

Chwile běh přewjesć je wot 28. junija do 3. julija 2021. Kóžda sportowča/kóždy sportowc abo kóžde mustwo indiwi­duelnje běh na samowu­zwolenej distancy absolwuje. Wažne pak je wužiwać někaj­ku fitnesowu app abo něšto podobneho, zo maće dopokaz wo času a kilometrach.

Mjenowane daty pósćelće potom hač do 3. julija (na přikład jako foto) ze swojim mjenom abo mjenom mustwa zaso jako mejlku na naspomnjenu adresu. Wosoby a mustwa z najdlěšimi naběhanymi distancami budu mytowane a wuslědki wozjewjene. Jurij Bjeńš

Baku (kh/SN). Narodne mustwo Waliziskeje steji na europskich koparskich mišterstwach (EM) před zaćahom do wosmifinala. Mu­stwo trenarja Roberta Pagea doby w druhej skupinskej hrě suwerenje z 2:0 přećiwo Turkowskej. Jeje wubranka, kotraž bu w Bakuwje wot něhdźe 30 000 přiwisnikow podpěrana, steji z nul dypkami po dwěmaj partijomaj před kóncom. Aaron Ramsey docpě po přihrawce Garetha Balea w 42. min. prěnje wrota za Walizičanow. W druhim połčasu bě Bale jědnatku njezbožownje přetřělił, pomhaše pak krótko do wothwizdanja z wuspěšnej přihrawku Connorej Robertsej trjechić kónčne 2:0.

Po hłownej zhromadźiznje Radwor­skeho ST 1922

Sada w nadpismje je so minjeny pjatk wječor dlěje hač tři hodźiny kaž čerwjena nitka přez hłownu zhromadźiznu ćahnyła, na přikład ličbu čłonow nastupajo. Tuchwilu je jich 264, štož je nimale runje telko kaž do korony. Strach, zo ludźo pjenjez dla swoje towarstwo wopušća, bě w Radworju tuž njewoprawnjeny.

Spušćomnosć knježi tež mjez sponsorami. ST Radwor drje je „jenož“ wjesne towarstwo, kóžde lěto pak je wjace hač 100 rjemjeslnikow a předewzaćelow podpěruje. Za čas korony drje su jednotliwcy swoje sumy pomjeńšili, ale „wotskočił“ žadyn njeje. Tak móžachu w Radworju w lětomaj 2019 a 2020 wjace dochodow wotličić, hač mějachu wu­dawkow.

Mnichow (kh/SN). Němske narodne koparske mustwo je z poražku přećiwo amtěrowacemu swětowemu mištrej Francoskej do europskich mišterstwow (EM) startowało. Samowrotow škitarja Matsa Hummelsa w 20. min. dla su chowancy zwjazkoweho trenarja Joachima Löwa w Mnichowje 0:1 faworitej turněra podleželi. Po wótrej třělwje Lucasa Hernándeza před wrota Manuela Neuera so Hummelsej njeporadźi bul wotwobarać. Hrajny nastroj přizemi na to njezbožownje w swójskich wrotach.

Němska wubranka koparjow storči přećiwo perfektnje nastajenym Francozam na swoje hranicy. Nadběh wokoło Thomasa Müllera dósta so zrědka do strašnych conow a zwrěšći na škitarjomaj Benjaminje Pavardźe a Hernándezu. W druhim połčasu mějachu hosćićeljo tójšto dobrych šansow. Partija běše hač do kónca wotewrjena. Hladajo na dwoje dalše wrota Francozow, kotrež sudnik ­nimohry dla njepřipózna, su woni zasłužbnje dobyli.

Přichodne hry mišterstwow

Mittwoch, 16. Juni 2021 geschrieben von:

Po tym zo su hižo dwanaće zazběhowych hrow na lětušich europskich koparskich mišterstwach přewjedli, pokročuja w turněrje dźensa z dalšimi. Kóžde mustwo ma wotnětka swoju druhu partiju.

16.06. 15:00 Finska – Ruska

16.06. 18:00 Turkowska – Waliziska

16.06. 21:00 Italska – Šwicarska

17.06. 15:00 Ukraina –

Sewjerna Makedonska

17.06. 18:00 Danska – Belgiska

17.06. 21:00 Nižozemska – Awstriska

18.06. 15:00 Šwedska – Słowakska

18.06. 18:00 Chorwatska – Čěska

18.06. 21:00 Jendźelska – Šotiska

19.06. 15:00 Madźarska – Francoska

19.06. 18:00 Portugalska – Němska

19.06. 21:00 Španiska – Pólska

20.06. 18:00 Italska – Waliziska

20.06. 18:00 Šwicarska – Turkowska

21.06. 18:00 Ukraina – Awstriska

21.06. 18:00 Sewjerna Makedonska – Nižo­zemska

Minjenu sobotu je sekcija wolejbul sportoweho towarstwa Viktoria Worklecy nowej bičwolejbulowej hrajnišći za Worklečanskej ćěłozwučowarnju z małym internym turněrom wotewrěła. Naprawa bu z pomocu dawkowych srědkow na zakładźe wobzamknjenja etata Sakskeho krajneho sejma sobu finan­cowana.

Ideju, dalše hrajnišćo w pěsku wutworić, su hižo w zašłym lěće zrodźili. Worklečanske bičwolejbulnišćo bu w lěće 2006 natwarjene. Hižo na Captainscupje – tradicionalnym bičwolejbulowym turněrje we Worklecach – bě naprašowanje wulke, městno za hraće pak jenož na jedne hrajnišćo wobmjezowane. Wot měrca 2020 nasta přidatny ćišć korony dla, trening pod hołe njebjo přepołožić. Tola za telko mustwow na jenož jednym hrajnišću njebě městna dosć. Tuž wjedźechu za­moł­wići předsydstwa a zastupjerjo mužow prěnjeho muskeho mustwa Vikto­rije Worklecy w meji 2020 pola Sakskeje natwarneje banki rozmołwu za zapodaće próstwy wo spěchowanje. W septembrje próstwu stajichu a měsac pozdźišo, w oktobrje 2020, bu próstwa přizwolena. Tuž započa so twarska faza za nowej bičwo­lejbulnišći w oktobrje 2020.

Přihotuje so na dołhu distancu

Dienstag, 15. Juni 2021 geschrieben von:

Michał Šrajer z Chrósćic je jedyn z wjacorych serbskich triatletow. 43lětny bywši a wjelelětny kopar Sokoła Ralbicy/Hórki bě tam jako njesebičny běhar na lěwym křidle znaty. Z kopańcu drje so přeco hišće zwjazany čuje, wšako trenu­je jónu wob tydźeń najmjeńšich pjerachow-bambinije delanskeho sportoweho towarstwa. Dźensa pak triatlon dźeń a wjetšu rólu w jeho wšědnym dnju hraje. Jurij Bjeńš je so Chróšćana mjez druhim prašał, kotre wosebite cile lětsa ma.

Michale, kak sy poprawom k triatlonej přišoł?

M. Šrajer: Je to sportowa družina, při kotrejž trjebaš dobru wutrajnosć, a poněčim docpěwaš tam tež lěpše wuspěchi. Wšako swoje ćěło dale a lěpje zeznawaš a wěš, na kotrych dnjach móžeš tež najlěpše wukony pokazać. Ja so přeco hišće jara derje čuju a dźeržu so fit. Dokelž je mjez płuwanjom, kolesowanjom a běhanjom dobra wotměna, mi triatlon ekstremnje wjele wjesela wobradźa.

Kajke běchu twoje spočatki?

Sevilla (kh/SN). Čech Patrik Schick je wčera z dwojimi wrotami čěske narodne koparske mustwo k dobyću přećiwo Šotiskej wjedł. Při tym běchu jedne rjeńše hač tamne.

Na štwórtym hrajnym dnju europskich koparskich mišterstwow (EM) přesadźi so w prěnim dwuboju dnja Čěska w skupinje D suwerenje z 2:0 přećiwo Šotiskej. Cyle jasnje wusahował je Patrik Schick. Prěnje wrota docpě wón z hłójčku, po tym zo bě so w powětře přećiwo přećiwnikomaj přesadźił. A dokelž te hišće rjane dosć njeběchu, třěli 25lětny w druhim połčasu bul z ně­hdźe 50 metrow do saka.

Tučasnje najlěpši nadběhowar swěta Polak Robert Lewandowski njeje porno tomu na EM překwapić móhł. Pólska podleža po słabym a njezbožownym předstajenju 1:2 susodej ze Słowakskeje. Pólska bě spěšnje w zastatku. Róbert Mak bě z wótreho kuta na wrota třělił, a bul skoči wot žerdźe na wrotarja a wottam do saka. Hnydom po přestawce wuruna Karol Linetty. Remis pak dołho njedźeržeše. Sydom mjeńšin po tym zo bě Grzegorz Krychowiak žołto-čerwjenu kartu dóstał, docpěchu Słowakojo z jednym koparjom wjac na hrajnišću dobyćerske wrota přez Milana Škriniara.

Anzeige