7. swjatkowne běhi wokoło Bjerwałdskeho jězora přewjedli
Sedmy króć su so běharki a běharjo swjatki wokoło Bjerwałdskeho jězora wubědźowali. 460 atletow startowaše při přijomnym wjedrje při rjanym jězoru na jednej z distancow 0,8 km, 3 km, 5 km, 10 km a 21,1 km (połmarathon). Sportowcy běchu ze Sakskeje, Braniborskeje, Durinskeje, Berlina a samo z Frankfurta nad Mohanom.
Wurisanje na 5 km (86 w cilu, z nich 38 žónskich) skónčištaj w swojimaj skupinomaj šulerka Serbskeho gymnazija Budyšin Larissa Měrćinkec na třećim (23:13 min.) a Roman Měrćink z Baćonja na 2. městnje (19:30 min.).
K najstaršim běharjam při Bjerwałdskim jězoru słušeše tež Serb Jurij Nuk z Budyšina, kiž zmištrowa distancu 10 kilometrow jako dobyćer w skupinje 80–84 lět w 1:18:50 hodź. Prima wojowachu na tutej čarje tež Krawcec staršej a jeju dźowka, kotřiž startuja za Hrubjelčicy. Dźowka Paula wubědźi sej w skupinje pod 18 lětami samo bronzowe městno (1:04:31 hodź.), zhromadne 5. městno wobsadźištaj nan Jan Krawc (44:16 min.) a mać Anja (1:04:37 min.) w skupinje 40–44 lět.