TSV Połčnica
– SJ Chrósćicy 0:2 (0:1)
Zestawa hosći: Klimant – Šafář, Bětnar, Runt, Dórnik, Młynk (88. Domš), M. Zahrodnik, Domaška, F. Zahrodnik, Šmit (80. Budar), Žur (86. Bogusz)
Sobotu podachu so Chróšćanscy koparjo na hru do Połčnicy, hdźež startowachu do noweje sezony wokrjesneje wyšeje ligi. Po tym, zo běchu chowancy noweje trenarskeje dwójki Runt/Latkolik přihotowanske hry přećiwo Budissy II, Radworjej a Njebjelčicam chětro wuspěšnje absolwowali (jónu njerozsudnje a dwójce dobyli), steješe jim nětko chětro robustne Połčničanske mustwo napřećo.
Dokelž prěnjemu mustwu (hišće) někotři akterojo k dispoziciji njejsu, dyrbješe hrajer a trenar Pavel Runt kader na někotrych pozicijach přestajić. Michał Młynk, kiž bě so w přihotach na sezonu derje prezentował, startowaše wot spočatka runje tak kaž Maksimilian Zahrodnik. Nimo toho steješe wrotar Bosćij Klimant po dołhim času zaso w klětce prěnjeho mustwa.