Najwuspěšniše holče volleyballowe mustwo Serbskeho gymnazija Budyšin (SGB) je sej w krajnym finalu wubědźowanja „Młodźina trenuje za olympiju“ w starobnej skupinje II mjez šěsć startowacymi mustwami dalšu bronzu wuwojowało. Kapitanku serbskeho cyłka Luizu Šubertec wu­znamjenichu jako najlěpšu hrajerku Sakskeje.

Kajki to wospjetny grandiozny wuspěch volleyballistkow SGB w Dippoldiswaldźe!? Po dobyću bronzy w aprylu 2014, šestym městnje w měrcu 2015 a slěbru w měrcu 2016 slědowaše tydźenja dalša bronzowa medalja. Wosom holcow bě so wot spočatka šulskeho lěta na pjatkow­nišej AG na tónle wjeršk přihotowało. Wuslědk­ pokazuje, kajki potencial w mustwje tči.

SGB – Gymnazij Brandis

2:0 (25:23, 25:18)

Sokoł Ralbicy/Hórki

– ST Ćisk 3:2 (1:1)

Zestawa domjacych: Ch. Gloxyn – Rawš, Zynda, Korjeńk, B. Bjeńš, Šewc, D. Gloxyn, T. Bejma (26. Wałda/87. Wowčerk), B. Bejma (92. Kurjat), S. Bjeńš, Domaška

Wjac hač 130 přihladowarjow dožiwi njedźelu w Ralbicach bój w štwórćfinalu wokrjesneho koparskeho pokala. Načolnik wokrjesneje wyšeje ligi přichwata do Stadiona přećelstwa. Sokoljo hrajachu wot spočatka z njesměrnym sebjewědomjom jako zakitowar pokala a pokazachu hosćej, zo chcedźa na kóždy pad znowa do finala. Wot spočatka hrajachu woni­ ze sylnym pressingom a nuzowachu Ćišćanow tak k zmylkam. W 15. min. domjacy po rjanej kombinaciji nawjedowachu, jako Denny Gloxyn sobu běža­ceho Stefana Bjeńša nahra, a tón kulowatu kožu jenož hišće do wrotow suny. Ralbičenjo dale atakowachu, a hosćo njewědźachu sej žaneje rady. Po tym zo wo­tedachu w srjedźnym polu njetrjebawši bul, podachu so prěni raz ze spěšnosću na wrota Chrystofa Gloxyna. A niska třělwa z ničeho kuleše so do saka k wurunanju (42.). Tuž dźěše z remisom do přestawki.

Tójšto nowych idejow zwoprawdźili

Čłonojo Serbskeho Sokoła z.t. běchu sej za swój 35. volleyballowy turněr wo pokal Domowiny, kotryž su sobotu w sportowej hali na Budyskim Třělnišću přewjedli, tójšto nowostkow wumyslili a tež zwoprawdźili. Prěni raz njejsu na přikład zakitowarja pokala – Sportowych přećelow z pólskeje Tokarnje – přeprosyli, dokelž njehodźeše so přepruwować, w kotrych volleyballowych klasach woni doma­ hraja. Jich hrajny niwow bě za wólnočasny volleyballowy turněr prosće přewysoki. Bjez serijoweho dobyćerja minjenych lět wuwi so lětsa zajimawe wubědźowanje, při kotrymž měješe znajmjeńša dźesać cyłkow wuhlady na pokal. Domowina dyrbješe nowu pućowansku trofeju wobstarać, dokelž smědźachu sej Polacy dotalnu zdźeržeć.

SJ Chrósćicy

– Biskopičanske KT 08 II 4:0 (1:0)

Zestawa domjacych: Králíček – Pöpel, Cyž, Sentivan, Šafář, Młynk (70. F. Zahrodnik), M. Zahrodnik (59. Schulze), Bětnar (65. Kunze), Henčl, Věchet, Žur

Prěnje koparske mustwo Chróšćanskeje SJ ma na swojim dypkowym konće dalše tři ličaki. Hižo třeće to dobyće na domjacym trawniku w druhej połseriji. Hačrunjež steji přećiwnik z Biskopic z tójšto dypkami zastatka na poslednim městnje tabulki, warnowaše domjacy trenar Pavel Runt swojich chowancow do partije před bojowniskim cyłkom. Wot wšeho spočatka běše tež jasne, zo njebudu na chětro dźěratym trawniku móc žanu wulce spodobnu kopańcu hrać. Bul přeco zaso njejapcy směr měnješe a chětro skakaše. Po spočatnym počuchanju sy­dachu pak dobre nadběhi na woběmaj stronomaj. Po jednym tajkim zwrěšći Radim Věchet na wrotarju, po druhim zhłójčkowa Michał Młynk snadnje wyše łaty. Hosćo pytachu swoje zbožo z třělwami z druheho rynka. W 34. min. móžachu domjacy skónčnje wyskać. Po dobrym­ nadběhu přez Věcheta a To­ma Henčla wuži Simon Žur składnosć k 1:0.