Chróšćenjo so přesadźili
Tradicionalnje Nowowješćenjo a jich hosćo k wjesnemu swjedźenjej tež sportuja. Tak je z wašnjom, zo wubědźuja so wokolne wjesne mustwa na koparskim turněrje. Wone drje su so sobotu tež zetkali, kopańcu hrali pak njejsu. Polo, na kotrymž měli poprawom za bulom honić, njemóža ratarskich přičin hač do kónca julija wužiwać. Tak su město toho volleyball hrali. Z pjeć mustwow přesadźi so na kóncu młody cyłk z Chrósćic.
Wokrjesna wyša liga ze 17 cyłkami
Zapadołužiski koparski zwjazk (WFV) je w běhu tydźenja nowu zestawu staflow na wokrjesnej runinje předstajił. Při tym napadnje we wokrjesnej wyše lize ličba mustwow. Město 16 hraje tam 17. Přičina: Koparjo TSV Wachauwa su za zelenym blidom sportoweho sudnistwa WFV wuspěšnje skoržili. W oficialnej tabulce běštej přez cyłu hrajnu dobu jenož 15. a 16. městno z čerwjenej-zestupnej barbu woznamjenjenej. Wachauske mustwo bě na kóncu štyrnate, dyrbješe pak tohorunja zestupić. Po jeho wuspěšnej skóržbje změje tuž wokrjesna wyša liga wot awgusta 17 zastupnistwow.
Wuskutkować budźe so njeruna ličba tež na ličbu hrajnych dnjow. Tak dyrbi staflowy nawoda dalšej hrajnej dnjej zaplanować. Jedyn z přidatneju je hrajny wuběrk na kónc tydźenja 8./9. awgusta 2015 połožił, dalši na 25./26. junij 2016. Wjacore koparske towarstwa pak su hižo protestowali, dokelž maja za datum w awgusće 2015 treningowe lěhwo knihowane.
Wobornicy so wubědźuja
Jutře wot 18.30 hodź. wubědźuja so wohnjowi wobornicy zaso we Worklecach. Domjacy hašerjo budu znowa spytać načolnu poziciju w boju wo pokal zarjadniskeho zwjazka při Klóšterskej wodźe zakitować. Po dwěmaj přeběhomaj, kotrejž su dobyli, steja woni mjenujcy na čole tabulki.
Tabulka po 1. a 2. přeběhu: 1. Worklecy (36 dypkow), 2. Konjecy- Šunow (33), 3. Róžant-Sernjany (32), 4. Ralbicy-Róžant (30), 5. Wotrow (29), 6. Pěskecy (26)
Wopačna ličba
Wopačna ličba
W rozprawje Bjarnata Deleńka zawčerawšim wo wuměnje ze sportowymi přećelemi čěskeho towarstwa Sokol Roztoky měješe prawje rěkać, zo je so wuměna lětsa 47. raz přewjedła. 1968 su Njebjelčanscy sportowcy přećelske styki nawjazali. Jedne lěto žaneje wuměny njebě.
Hoj, horje, serbscy Sokoljo
Pod tymle nadpismom wobroća so starosta Serbskeho Sokoła Milan Funka na trenarjow a wšitkich sportowcow dorostowych wubrankow:
Lubi serbscy Sokoljo dorostowych koparskich wubrankow młodźinow E, D a C, lubi starši, lubi trenarjo Franko Šnajdro, Mariano Žuro, Tomašo Bjeńšo, Křesćano Bejmako a Fabiano Pöpelo! Wam wšěm słuša wulki sokołski dźak za wulkotny angažement w zašłych tydźenjach nastupajo serbske dorostowe koparske wubranki. Wutworiwši tři wubranki a wobdźělejo so na třoch turněrach smy njesměrnje wulki krok w dorostowym dźěle Serbskeho Sokoła docpěli. Wosebje wulki zaćišć zawostaja we mni waša zwólniwosć, za tute projekty so zasadźeć. Hladajo na dobre wotrěznjenje w Kubšicach, Bukecach a Liegauwje-Augustusbadźe sće so we wobłuku Zapadołužiskeho koparskeho zwjazka kaž tež za jeho mjezami wo dalše pozitiwne zwobraznjenje serbskich sportowcow starali. Za to wam wšitkim wulke připóznaće.Poražka w poslednjej hrě
SV Haselbachtal
– ST Marijina hwězda 3:1 (2:1)
Zestawa hosći: Vacek – Lipič, Sbjeznie, Łušćanski, T. Jurš, Wróbl, Bělk, D. Jurš, Rab, Winkler (58. Škoda), Peschmann (46. Schmidt)
Dorostowe myto ST 1922 Radworjej
Serbscy pedagogojo na druhim a třećim městnje
48. volleyballowe mišterstwa wučerskich mustwow zakónčene
Konstelacija do poslednjeho hrajneho dnja volleyballowych mišterstwow wučerskich mustwow tydźenja w Lubiju bě njesměrnje brizantna, dokelž mějachu hišće tři cyłki teoretisku šansu na cyłkowne dobyće. Mjez nimi běštej to amtěrowacy wokrjesny mišter, kombinowane mustwo Serbskeho šulskeho a zetkawanskeho centruma Budyšin (SŠZC) a třeći minjeneje sezony, pedagogojo Serbskeho gymnazija Budyšin (SGB). Ale tež volleyballisća 5. SŠ-eks/Melanchthonoweho gymnazija Budyšin běchu móžny kandidat na złoto. Wuměnjenje na titul bě jasne dobyće 2:0 we wječornym rozestajenju serbskeju cyłkow.
Serbski gymnazij Budyšin – SŠZC 2:1 (25:20, 22:25, 21:19)
Wjelelětnych přećelow witali
Posledni kónc tydźenja w juniju zarjadowa sej Sportowa jednotka Njebjelčicy mały swjedźeń. Na njón je tež wjelelětnych přećelow zjednoćenstwa Sokol Roztoky witała.
Dypkownje su čěscy přećeljo sobotu dojěli, a to k zhromadnemu wobjedej. Po planje běžachu tež přihoty za dorostowu kopańcu. Zapřijate běchu cyłki štyrjoch starobnych klasow, hrajace na małym polu. Mustwo bambinijow bě sej koparjow ze susodnych Němskich Pazlic přeprosyło, młodźina F měrješe mocy z Ralbičanskimi Sokołami a młodźina E z koparjemi z Hlinowca. Młodźina D zaběraše so mjez sobu ze wšelakimi hrajnymi formami, dokelž bě jich partner krótkodobnje wotprajił.
Sezona delanskich koparjow z dypkom zakónčena
Sokoł Ralbicy/Hórki II
– FC Łužica Wojerecy 2:2 (0:1)
Zestawa Sokoła: Cyž – M. Matka, Bogusz, Budar, Šołta, Róbl, Rawš (62. Mět), Młynk, Serbin (65. Šěn), Jakubaš (62. Šnajder), J. Matka
Do hry bě wšěm jasne, zo njemóže koparska rezerwa Sokoła Ralbicy/Hórki hižo zestupić. Módro-běli z Kulowa a Wětničenjo běchu swojej předposlednjej partiji přěhrali. Sokoljo móžachu sej tuž bjez ćišća zahrać. Tež Wojerowčenjo stejachu do duela we wěstym srjedźnym polu a njemóžachu so wjace polěpšić.
Domjacy chcychu hru kaž přeco z wěsteho škita natwarjeć a Wojerowčanow dalokož móžno wot swojeje klětki wotdźeržować. Woni pak stejachu sami jara wěsće a šansy lědma wuskočichu. Tak běchu standardy najstrašniše akcije. Róbl měješe dobru poziciju, ale bul wosta w muri wisajo. Na tamnym boku běše młody Cyž na městnje. Wón smědźeše w poslednjej hrě sezony 2014/2015 swoje kmanosće pokazać jako dźak za prawidłowny trening. W 33. min. pak hosćo po jědnatce nawjedowachu. Tak tłóčachu Sokoljo na wurunanje. Jónu pospyta so Jakubaš z wótrej třělwu, kotraž pak běše přecentralna. Tež Młynkowy pospyt dźěše pódla wrotow.
