W sportowej kolumnje tydźenja zaběraše so Tomaš Faska z jara zajimawej temu we wobłuku tak mjenowanych muskich sportowych družin, w kotrychž so dźeń a wjace žonow wu­bědźuje. Měnju wšak, zo je wuraz „muskeho“ sporta zestarjeny a njewotpowěduje aktualnej situaciji. Snano njejsu wukony žonow a muži w kóždej disciplinje přirunajomne, štož ma předewšěm anatomiske přičiny. Tohodla wubědźuja so žony a mužojo zwjetša w separatnych družinach sporta. Mamy pak tež přikłady, hdźež wobaj splahaj mjez sobu wo dobyće wojujetaj. A tu smy zaso w motorsporće.

Nimo naspomnjeneje Ellen Lohr je wjele­ dalšich žonow, wosebje tež něm­skeho pochada, kotrež móhli tu mjenować. Tak sportowče hižo w jara młodych lětach, na přikład w kartowym sporće, spěchuja, zo so hižo wosomlětne holcy wo němske mišterstwa w kategoriji bambi­nije wubědźuja. Zajimowanym holcam móžu jenož poručić, so zhromadnje ze staršimaj wo wotpowědnych poskitkach wobhonić. Jedna tajka dobra adresa je kartowa čara we Łazu.

Na polu sporta dale a bóle wobkedźbujemy, zo so žony do poslednich muskich domenow zadobywaja. Tak startuja na runinje wysokeho wuko­noweho sporta w disciplinach, kotrež běchu lětdźesatki dołho jenož mužam přewostajene. K tomu słušeja spor­to­we družiny ze sylnymi ćělnymi kon­tak­ta­mi, kaž american football abo lodohokej, bojowe družiny z Dalokeho ranja,­ kaž taek­wondo abo karate, ale tež ekstremne pruwowanja wutrajnosće, kaž pjećkrótne triatlonowe wubědźowanje Ironman, a dalše. Z tymle fenomenom so wědomostnicy hižo něšto lět zaběraja, wo čimž čitach tele dny na internetowej stronje Zwjazkoweho instituta za sportowe wědomosće (BISp) pod titulom „Muski sport za žony z wida wědomosće“. Tam pytaja za wotmołwami na prašenje, čehodla so dźeń a wjace žonow za tajke sportowe discipliny rozsudźa, kotry wužitk z toho maja a tež, kajke wopory dyrbja za to přinjesć. Slědźerski projekt, kotremuž dachu mjeno „Muski sport – žónska identita“, spyta tele wuwiće wujasnić.