Wobhladawši sej wčerawšu hru chorwatskich koparjow přećiwo Argentinskej na swětowych mišterstwach sej prajach: Budu-li Němcy jutře přećiwo Šwedskej kaž Chorwaća wustupować, mamy snano hišće šansu w turněrje wostać. Spěšni, wobrotni, chrobli a robustni w dwubojach běchu so woni přećiwo bywšemu swětowemu mištrej přesadźili a su sej tři dypki woprawdźe zasłužili. Jutře wječor so tež pokaza, hač je němski trenar Joachim Löw strategisce mudrje jednał, rozsudźejo so při zestajenju mustwa za nazhonitych „starych zajacow“ kaž Müllera, Khediru abo Hummelsa, město toho zo by młodym hrajerjam składnosć dał. Powěsćernje znajmjeńša rozprawjeja, zo su wšitke orakle na dobro Němskeje wušli. Zwostanje tuž škrička nadźije, zo njetrjebaja naši koparjo lisćiki za lětadło, kotrež su jim šwedscy žurnalisća hižo žortnje poskićili. Snano bjeru sej tež Chorwatsku za přikład. Škodźało njeby. Marko Wjeńka

Argentinskej, wiceswětowemu mištrej lěta 2014, hrozy na lětušich koparskich mišterstwach w Ruskej kónc hižo w skupinskej fazy. Wčera wječor přěhra cyłk wokoło superstara Lionela Messija druhu hru předkoła přećiwo Chorwatskej 0:3. Argentinjenjo docpěće wosmifinala hižo sami w rukomaj ni­maja. Z jeničkim dypkom w tabulce skupiny D dyrbja woni w poslednjej skupinskej partiji Nigerisku přewinyć a so poražki Islandskeje přećiwo Chorwatskej nadźijeć, zo bychu so hišće za wosmifinale kwalifikowali. Chorwatska je z njewočakowano wysokim triumfom hižo w kole najlěpšich 16 mustwow. Běše to napjaty duel, ze spektakularnymi prěnimi wrotami za Chorwatsku. Argentinski wrotar bě bul w šěsnatce překrótko wotkopnył, Ante Rebić spěšnje reagowaše ­a trjechi z krasnej třělwu 1:0 (53.). Wo předrozsud postara so Luka Modrić, jako ze zdalenosće k 2:0 wotzamkny (80.). Zo móhł wrotowy poměr hišće rozsudny faktor za zaćah do wosmifinala być, ­Argentinjanow po wšěm zdaću njeza­jimowaše. Po dohromady jědnaće žołtych kartach za wobě mustwje zwyši Ivan Rakitić krótko do wothwizdanja na 3:0 (91.).

Konjacy sport w Kulowje

Za 47. jěchanski a skakanski turněr w Kulowje jutře a njedźelu je so dwěsćě sportowcow ze 60 jěchanskich towar­stwow zapisało, tež z Čěskeje, Pólskeje a Nižozemskeje. Sobotu wubědźuja so dwójki wot 7.30 do 19.30 hodź. (zastup budźe darmotny) a njedźelu wot 7.30 do 17.30 hodź. (zastup dwaj euraj).

Přihotowanske koparske hry

07.07.  SZ Žylow –

  FC Energija Choćebuz

08.07.  FC Energija Choćebuz –

  Dukla Praha

11.07. 19:00  Přezjednota Niska –

  Budissa Budyšin

15.07. 14:00  International Lipsk –

  Budissa Budyšin

18.07. 18:30  Jednota Kamjenc –

  Budissa Budyšin

W Róžeńće hrać njebudu

Bičwolejbul Radija Satkula lětsa w Róžeńće njebudźe. 2. julija je na hnadownym městnje wulke putnikowanje serbskich wosadow. Bičtura Satkule zahaji so póndźelu w Radworju.

Wo postup klasu wyše

Portugal je w swojej druhej skupinskej hrě prěnje dobyće docpěł, a to 1:0 přećiwo Marokku. Hižo w 4. min. trjechi Cristiano Ronaldo. Po krótko wuwjedźenym róžku zhłójčkowa portugalski superstar bul do syće. Wón nawjeduje nětko lisćinu najlěpšich třělcow ze štworymi wrotami z dweju hrow na aktualnych swětowych mišterstwach a je dotal wšitke wrota za swoje mustwo třělił.

Tež wubranka Uruguayja je kaž wočakowano swoju druhu skupinsku hru dobyła. Chowancy trenarja Óscara Tabáreza přewinychu Sawdi-Arabsku z 1:0. Třělc bě něhdyši „kusak“ Luis Suárez. Wón steješe w swojej stotej hrě za narodne mustwo na prawym městnje a je bul po róžku do prózdnych wrotow sunył (23.). Kwalifikowanej za wosmifinale w skupinje A wubědźujetej so Uruguay a Ruska tuž póndźelu wo stafloweho dobyćerja.