Zapósłane (06.01.23)

Freitag, 06. Januar 2023 geschrieben von:

Elwira Hančo ze Slepoho wupraja so k přinoškej wo „Slepjanskim dźěćetku“ na Wjacławskich wikach w Budyšinje (SN 23. decembra 2022). Wona je čłonka towarstwa „Kólesko“ a awtorka knihi „Gładźarnica“, w kotrejž wopisuje drastu dźěćetkow.

Njepřemyslena akcija, kotruž drje su organizatorojo za dobru ideju měli, je w Slepjanskej wosadźe wulki hněw zbudźiła: jako su na hodownych wikach w Budyšinje dźěćetko našeje wosady napodobnili, a to hišće do 1. adwenta! Tuta groteskna scenerija „Slepjanskeho dźěćetka“ ze swojimi přewodźerkami běše mi hrózbny napohlad, přetož ze Slepjanskej drastu so woprawdźe wuznaju. Njewěm ani, što je mje bóle mjerzało: hač wopak a njerodnje zdrasćene holcy abo zo bě tónle wustup w Budyšinje wot poprawneho nałožka dospołnje wotrěznjeny.

Zapósłane (03.01.23)

Dienstag, 03. Januar 2023 geschrieben von:

Stanij Statnik z Ralbic: Moje wosobinske měnjenje k rozprawnistwu w Serbskich Nowinach z 28. nowembra a 15. decembra 2022:

We wudaću Serbskich Nowin 28. nowembra 2022 móžachmy na lokalce dosć wobšěrny přinošk Jana Krala wo posedźenju Ralbičanskeje gmejnskeje rady ­čitać. A tu wosebje wo prócowanju ­Mišnjanskeje firmy na płoninje mjez ­Šunowom a Smjerdźacej nastajić na 70 hektarach!!! fotowoltaikowu připrawu (do samsneho směra dźěchu w zašłosći prócowanja klóštra wo nastajenje wětrnikow na tutej płoninje).

Najprjedy jónu je to zwjeselace, zo njeje so přespěšny rozsud tworił, hladajo tež na powabkowy pjenježny „ćopły“ dešć.

Prawje mam wothłós wjetšiny radźićelow, do rozsuda zapřijeć wobydlerjow w formje wobydlerskeje zhromadźizny. Nje­zrozumliwje je mi w tutym zwisku ­namjet Tomaša Bjeńša, zo ma gmejnska rada tworić jednohłósne měnjenje a so hakle potom na wobydlerstwo wobroćić (z poslednich temowych diskusijow w gmejnskej radźe abo we wuběrkach ­wěmy, zo woznamjenja jednohłósne měnjenje wot Tomaša Bjeńša). Hač je Tomaš Bjeńš hižo zabył, štó su byli jeho wolerjo a z kajkim narokom?

Zapósłane (02.01.23)

Montag, 02. Januar 2023 geschrieben von:

Alojs Nawka reaguje z mejlku na přinošk Serbskich Nowin 23. decembra:

Fatalita

Čitajo Serbske Nowiny z 23. decembra 2022 na prěnjej stronje (přinošk z Chrósćic z nadpismom „Hórnikowa“ abo „Hórnikowa dróha“?) spodźiwach so jara. Na přisłušacym wobrazu wuhladaš dwaj pućnikaj w Chrósćicach: „Hórnikowa dróha“ a katastrofu „Ćišinskowa dróha“. Tajkele skomolenje Ćišinskeho je kaž fawca do serbskeje duše; to ći črije zuje. Prawje ma rěkać „Ćišinskeho dróha“ abo „Dróha Ćišinskeho“.

Zapósłane (20.12.22)

Dienstag, 20. Dezember 2022 geschrieben von:

Na powěsć „Statnik: Rozsud běše ,zmylk‘“ we wčerawšim wudaću SN piše Hans-Eberhard Kaulfürst z Budyšina:

Chcu Dawidej Statnikej mój wulki respekt wuprajić za zamołwjenje jeho ­wothłosowanja w Budyskim wokrjesnym sejmiku! Njech tam dale skutkuje na dobro wobydlerstwa našeho wokrjesa a serbskeho ludu.

Zapósłane (16.12.22)

Freitag, 16. Dezember 2022 geschrieben von:

Dawid Statnik, wokrjesny radźićel CDU a předsyda Domowiny, wupraja so k tomu, čehodla je předłoze AfD wo diskriminaciji ćěkancow minjenu póndźelu w Budyskim wokrjesnym sejmiku přihłosował:

Zapósłane (15.12.22)

Donnerstag, 15. Dezember 2022 geschrieben von:

Što wuči nas zašłosć?, praša so Diana Šołćina z Róžanta nawjazujo na wčerawši přinošk „,Haj‘ za namjet AfD rozhori“:

Ze stawiznow wuknyć je rjane přeće. Najskerje wosebje za wučerki a wučerjow stawiznow a to přez wšě generacije.

Pukotanje wutroby stopnjowaše so z kóždej linku, kotruž wo podawkach we wokrjesnym sejmiku čitach. Hdźe běchu tući CDUnicy za čas wučby stawiznow? Rozłožowanja přičin strony njepolěpšichu ani wokomik začuće přerady a přesłapjenja, a znaty citat něhdyšeho politikarja Centrumskeje strony Franza von Papena z lěta 1933 zwoła so mi do mysli: „Za dwaj měsacaj Hitlera do kuta stłóčimy, zo wón kwiči.“ Tehdyša bruna strona njeje přez přemóžace přihłosowanje ludnosće knježerstwo zdobyła, ale hłownje přez intrigi za zdźerženje mocy a politisce njemdre rozsudy tamnych demokratiskich stron. Von Papen běše bórze sobustaw tuteje dobyćerskeje strony. Kak spěšnje so tola chorhojčki zwjertnje. Demaskěrowanje je zwrěšćiło přez swójske taktěrowanje.

Zapósłane (21.10.22)

Freitag, 21. Oktober 2022 geschrieben von:

Zwjazk serbskich spěwarskich towarstwow swjeći bjez swojich spěchowacych čłonow, měni Jan Nuk z Radworja, nawjazujo na rozmołwu z Friedemannom Böhmu we wčerawšim wudaću Serbskich Nowin:

Zapósłane (30.09.22)

Freitag, 30. September 2022 geschrieben von:

Stani Nawka z Hamburga piše pod hesłom „Kónc a nimo?“

Njejsym wšak přeco a hnydom „up to date“ nastupajo serbski „bušfunk“, a tuž so stróžich, jako słyšach a čitach wo ka­tastrofalnej situaciji wokoło Serbskich Nowin.

Štó je na tym wina? Tónkróć snadź lědma Domowina. Ale chutnosć njerodźi žort.

Hladam z jednym wóčkom wróćo na zanjechane móžnosće zańdźenych lět a z druhim wóčkom do přichoda. Při wšej woli njewuhladam ani hwězdźički, kiž by so błyšćo a zybolejo mje wabić zamóhło, so požadać wo jedne z mjeztym wjacorych wakantnych dźěławych městnow, bjez kotrychž njebudźe naš „serski blot“ přežiwić.

Sprěnja njejsym – bohudźak – žadyn profi-politikar, ale mam wotzamknjene wukubłanje a samo powołanje. Zdruha nimam dohlad do wšěch kućikow dźěłoweho prawa a zakonskich paragrafow.

Zapósłane (23.09.22)

Freitag, 23. September 2022 geschrieben von:

Marlene Langerowa z Wotrowa, čłonka iniciatiwy na dobro kapłana dr. Jensa Buliša piše:

Tydźenja, 11. septembra, zhonichmy z wozjewjenjow wotpohlad biskopa Timmereversa, Chróšćanskeho kapłana dr. Buliša do Žitawskeje wosady k nowembrej přesadźić.

To je za nas katolskich wěriwych jara zrudźaca powěsć. Hižo wjele lět smy we Wotrowje bjez swójskeho fararja. Administratiwnje so Wotrow přez Chróšćansku faru zastara. W zašłosći smy tež hižo serbskorěčnych duchownych (na př. přez wotchad do domizny) zhubili a w přichodźe so dalši na wuměnk podadźa.

Kak wusko su cyrkej, wěra a rěč tu we Łužicy ze sobu zwjazane, móžemy wšitcy dźeń wote dnja w našich wjeskach dožiwić. Serbskich, serbskorěčnych duchownych bywa dźeń a mjenje. Hladajo na to, kelko Božich mšow smy hišće měli, jako mějachmy swójskeho duchowneho, je so ličba Božich mšow stajnje redukowała. Dlěši čas so hižo žane dźěćace a młodźinske kemše wjac njeswjeća. Tež ministranća su sebi samym přewostajeni.

Zapósłane (20.09.22)

Dienstag, 20. September 2022 geschrieben von:

Werner Měškank ze Zaspow wupraja so k tuchwilnej diskusiji wo personalnych njedostatkach w serbskich medijach:

Z wěstej poraženosću sym pjatkowne wudaće SN ze 16. požnjenca z jenož dwěmaj stronomaj za Předźenak dóstał a čitał. Hladajo na to, zo tuchwilu tež re­dakciji Noweho Casnika a serbskeho rozhłosa RBB chětro pod pobrachowacymi sobudźěłaćerjemi ćerpitej, čuju so postorčeny, so wuprajić. Chcu přiwšěm ­na trajnu nješwarnu kadrowu politiku w Serbach pokazać.

Chcu, zo SN dźenik wostanje, Nowy Casnik měł dwójce wob tydźeń wuchadźeć, serbske radijo trjebamy cyły dźeń, serbska telewizija w MDR a RBB móhła so rady kóždu sobotu a k přihódnišim wusyłanskim časam na wobrazowkach jewić.

Za to wšak dyrbi so raz zwěsćić: Kak atraktiwne abo skerje drje njeatraktiwne su dźěłowe městna w někotrych serbskorěčnych medijach? Čehodla maš jako Serb resp. Serbowka po zdaću hubjeńše šansy nawjedować serbsku instituciju? (Naliču Wam rady sep „dźiwnych“ přikładow a „připadow“, jelizo to njewěriće!).

Serbska debata

Neuheiten LND