Małe lětanišća su najebać wysoke kóšty hospodarsce wažne
Zapósłanča Zelenych w Sakskim krajnym sejmje Eva Jähnigen čuje so w swojich začućach z wuprajenjow hospodarskeho ministra Martina Duliga (SPD) wobkrućena.
Loni w decembru je sakski zličbowanski zarjad deficitarne hospodarjenje lětanišćow kritizował. Žadyn z wobhospodarjerjow nima ani přibližnje kmane popłatki, kóšty wurunać. Wobličenje popłatkow stawaše so přeco bjez někotrychžkuli kalkulacijow“, zarjad tehdy kritizowaše. Deficity mějachu komunalni hospodarjo zas a zaso wurunać. K tomu přińdźechu inwesticiske přiražki wjacorych milionow eurow ze stron Swobodneho stata Sakskeje.
„Za čo trjebaja komuny tajke lětanišća? Sakske gmejny a města njemóža lěto wot lěta dawkowe dochody za hobby někotrych jednotliwcow z woknom won mjetać“, měni Eva Jähnigen.
