Husto słyšimy, zo ma rjemjesło złote dno. Na wěste wašnje so to na rjemjeslniskich wikach přeco zaso pokazuje. Tež minjeny kónc tydźenja w Choćebuzu tomu tak bě.
W Choćebuzu wotmě so minjeny kónc tydźenja fachowje wusměrjena wustajeńca. Němske pomjenowanje „HandWerker“ zaměr prezentacije rjemjeslniskich a posłužbowych předewzaćow Łužicy na přeswědčiwe wašnje zjima. Přewažnje braniborske firmy, tež łužiske a mjez nimi serbske, so w Choćebuzu zajimowanemu a fachowje derje nastajenemu publikumej předstajichu. Hižo wjacore lěta witaja na wikach tohorunja rjemjeslnikow z Čěskeje a Pólskeje.