Z awtom typa Amarok je so wróćowołanska akcija dieselowych jězdźidłow VWja njedawno zahajiła. Wotpłunoweho skandala dla dóstanu potrjecheni wobsedźerjo nětko póštu, zo bychu sej update do awta zatwarić dali.

Budyšin (SN/mwe). „Pola nas njeje so ani jenički z wulkeho kruha kupcow hóršił, zo ma wotpłunoweho skandala dla problem ze swojim jězdźidłom“, praji Robert Handrik, sobujednaćel Handrikec awtoweho domu w Hodźiju. Runja mnohim dalšim swobodnym awtowym dźěłarnjam njesmědźa Handrikecy motory potrjechenych dieselowych VWjow, Audijow, Seatow a Škodowkow wobdźěłać. Woni su pak šoferam wulka pomoc. Wšako wróćowołansku akciju podpěruja a jako serwis awta swojich kupcow za přehladanje do wotpowědnych awtowych domow dowjezu, kotrež maja z VWjom wikowanske zrěčenje. Za to dóstanu ludźo w Hodźiju bjezpłatnje wotnajenske awto a móža sej swoje jězdźidło po dorěčenju zaso wotewzać. „Myslu sej, zo je skandal wokoło wotpłuna dieselowych awtow VWja wot wěstych kruhow tak splećeny, zo bychu zhotowjerjej škodźeli“, Robert Handrik podšmórnje.