Wot lěta 2018 chcedźa bywšu jamu Choćebuz-sewjer zapławić
Sewjerowuchodnje Choćebuza nastanje z 1 900 hektarami najwjetši kumštnje wutworjeny jězor Němskeje. Kaž bě Choćebuska zhromadźizna měšćanskich zapósłancow 29. meje 2013 wobzamknyła, chcedźa jón „Choćebuski wuchodny jězor“ (delnjoserbsce Chóśebuski pódzajtšny jazor) mjenować. „Před dwěmaj měsacomaj su po 35 lětach we wuhlowej jamje Choćebuz-sewjer přestali brunicu wudobywać. Jězor je wulki naslědny projekt a nam dospołnje nowe wužadanje“, podšmórny nawoda hórnistwoweho planowanja pola Vattenfalla Gerd Klocek kónc februara w Choćebuzu. Hižo w zymje 2018 chcedźa započeć bywšu wuhlowu jamu zapławjeć. W lěće 2024 ma po tuchwilnym planje móžno być so w jězorje kupać.