Sakske wyše zarjadniske sudnistwo w Budyšinje wozjewi wčera wusud, kotryž skóržbu přećiwo brunicowemu planej Wochozy II njedowola. Skóržbnicy dalše postupowanje pruwuja. Zdobom přeprošeja njedźelu w 13 hodź. sobu na protestne wuchodźowanje ze Slepoho do Rownoho.
Budyšin (SN/at). „Wšudźe steja znamjenja na wichor přećiwo brunicowemu hospodarstwu. Jenož w Sakskej wobsteji po zdaću kupa fosilneje energijoweje zbóžnosće, hdźež so wšitcy nadźijeja, zo njewola wobydlerjow a klimowa změna prosće nimo póńdźetej a kupa so njepotepi“, komentuje předsyda sakskeho Zwjazka za wobswět a přirodoškit Němska (BUND) prof. dr. Felix Ekardt wčerawši wusud wyšeho zarjadniskeho sudnistwa.