Rownjan Ingo Šuster, iniciatiwa „Strukturnu změnu nětko – žane Wochozy II“, sakski zwjazk za wobswět a přirodu Němskeje BUND a Greenpeace Němskeje budu dale skoržić přećiwo brunicowej jamje Wochozy II.
Slepo/Rowno (AK/SN). „Pruwujemy dalše postupowanje. Móžna je rewizija před zwjazkowym zarjadniskim sudnistwom w Lipsku“, podšmórny Ingo Šuster njedźelu po protestnym wuchodźowanju pod hesłom „Swjate su nam naše strony a wjeski“ ze Slepoho do Rownoho. 250 wobdźělnikow demonstrowaše za zachowanje Slepjanskeje wosady a stajichu tak jasne znamjo přećiwo hrožacemu wotbagrowanju a přesydlenju 1 700 wobydlerjow. Potrjecheni, sympatizanća, škitarjo wobswěta, wosadni a zastupjerjo zwjazkow a stron sćěhowachu namołwu k protestnemu wuchodźowanju. Wot Slepjanskeho dwórnišća ćehnjechu zhromadnje na Rownjanske sportnišćo.