Pančicy-Kukow (SN/mwe). „Klóšterska stwička“ w Pančicach-Kukowje – na klóšterskim dworje – je dale zawrjena. Wotnajerjo běchu woblubowany hosćenc z „klóšterskej pincu“ a dalšej hóstnej rumnosću kónc lěta 2018 začinili a zrěčenje z wobsedźerjom domu, klóštrom ­Marijinej hwězdu, wupowědźili. W interneće pak pod „Klóšter Marijina hwězda – na wopyće – Klóšterska stwička“ wčera přeco hišće mylnje steješe: wot 11 do 14 hodź. wotewrjene.

Na naprašowanje našeho wječornika, hač je so hižo naslědnik namakał, klóšterska sotra ­Tadeja zdźěli: „Konkretnych požadarjow bohužel hišće nimamy. Dotal su sej ­‚Klóštersku stwičku‘ jenož ludźo wobhladali, kotřiž w datym padźe po­družnikow posrědkuja.“ Kaž z klóšterskeho běrowa dale rěka, „njeje pytanje za wotnajerjom momentanje lochke“. Wšako tež druhdźe dźeń a wjace korčmarjow swoje hosćency zawěra, dokelž prosće personal kaž kucharjow a pinčnikow njenamakaja, ­dokelž do restawranta wšědnje lědma štó, kaž kolesowarjo a pućowacy, załoža.

Wot 15. měrca hač do 15. apryla traje wubědźowanje „Sakskeho fondsa Čiń sobu“, z kotrymž chce knježerstwo ludnosć motiwować, wot deleka k strukturnej změnje přinošować. Tež serbska kategorija je pódla.

Kamjenc (SN/BŠe). W Kamjenskim předewzaću accumotive, hdźež zhotowjeja baterije za awta koncerna Daimler, jedna IG metal tuchwilu ze zastupjerjemi dźěłodawarja. Zaměr je, w Sakskej płaćiwe tarifowe zrěčenje metalo- a elektroindustrije přesadźić. Kaž prěni społnomócnjeny dźěłarnistwa we wuchodnej Sakskej Jan Otto zdźěli, su jednanja konstruktiwne. Hladajo na rozsudnu temu, mzdu, su so hižo na ramik dojednali. „Přiwšěm wostawaja nahlady nastupajo dalše wažne dypki chětro rozdźělne“, Jan Otto wuzběhny.

Hakle zawčerawšim stej wobě stronje w Kamjencu wuradźowałoj a móžne zaměry postajiłoj. Na přichodnym terminje póńdźe wo dźěłowe wuměnjenja, za čož su zhromadne wodźenja po zawodźe předwidźane. Tema měło tohorunja přechodne rjadowanje nowych mzdow być, kaž z dźěłarnistwa rěka.

Kamjenski zawod accumotive je so w minjenymaj lětomaj chětro rozšěrił. Nětko maja tam wjac hač 1 300 sobudźěłaćerjow. Kónc decembra bě IG metal mějićela zawoda koncern Daimler k tarifowym jednanjam namołwiła. Mjez druhim žadaja sej tam 35 dźěłowych hodźin wob tydźeń, štož je wosebitostka.

16. łužiske wubědźowanje załožićelow firmow (LEX) započa so wčera w Choćebuzu. Wot lěta 2004 zliči zarjadowaca Łužiska hospodarska iniciatiwa (WiL) wjace hač 1 200 wobdźělnikow.

Choćebuz (AK/SN). „Ze zapodatych 733 wobchodniskich planow smy wjace hač 300 wuspěšnych załoženjow firmow, rozšěrjenjow wobchodniskich polow a naslědnistwow w předewzaćach zwěsćili. Tak nasta we Łužicy wjace hač 1 000 dźěłowych městnow“, podšmórny dr. Michael von Bronk, předsyda nawodnistwa Łužiskeje hospodarskeje iniciatiwy, składnostnje zahajenja lětušeho wuri­sanja wčera w Choćebuzu. LEX, tak wón wuzběhny, předewzaćelow we Łužicy zaměrnje spěchuje. „Při tajkim wubě­dźowanju maš jenož dobyćerjow. Samo tón, kiž žane myto njedóstanje, móže ­tójšto přiwuknyć“, von Bronk wujasni. Wšako dóstanje kóždy wobdźělnik wot dweju jurorow posudk swojeho wobchodniskeho koncepta a mnohe fachowe pokiwy. Jury přisłušeja zastupjerjo předewzaćow, Industrijneje a wikowanskeje komory, rjemjeslniskeje komory kaž tež krajneju a inwesticiskeju bankow.