Budyšin (SN/at). W decembrje bě we wuchodnej Sakskej 18 427 bjezdźěłnych, 585 ludźi resp. 3,3 procenty wjace hač w předměsacu. Aktualna kwota bjezdźěłnosće je wo 0,2 na 6,5 procentow přiběrała. „2018 bě dobre lěto za dźěłowe wiki we wuchodnej Sakskej. Ličba bjezdźěłnych so dale pomjeńši, a naprašowanje za dźěłowymi mocami hibaše so na wysokim niwowje. Lětna přerězna bjezdźěłnostna kwota 6,9 procentow je najniša hódnota wot 1990tych lět. Ličba socialneho zawěsćenja winowatostnych jobow je wo 1,8 procentow přiběrała“, zjima dźensa Thomas Berndt, předsyda jednaćelstwa Budyskeje agentury za dźěło, lětne wuwiće. Robustna konjunktura a miłe wjedro běštej hłownej přičinje, zo njebě bjezdźěłnosć kónc lěta tak wulka. W statistice dźěłoweje agentury bě porno nowembrej 24 bjezdźěłnych-ćěkancow mjenje,­ to rěka 487. Suma z bjezdźěłnych a wobdźělnikow na dźěłowičnych naprawach wučinja 24 418 wosobow – 7,3 procenty mjenje hač w decembrje 2017. W běhu lěta je dźěłodawarski serwis agentury 11 489 socialneho zawěsćenja winowatostnych jobow akwirěrował.

Budyšin (CS/SN). 27. december je kruty termin w protyce Budyskeho wokrjesa, wšako wotměje so tónle dźeń bursa nawrótnikow „Zaso tu“. 71 předewzaćow, něšto wjace hač loni, bě swoje informowanišćo wčera w Budyskim krajnoradnym zarjedźe natwariło. Zastupjene běchu komuny runje tak kaž firmy z industrije, rjemjesła abo z posłužboweho wobłuka. Z wotewrjenjom w dźesaćich zwěsćachu zarjadowarjo wulki nawal. Za swobodne dźěłowe městna njejsu so jenož ći ludźo zajimowali, kotřiž běchu joba dla raz do zapadnych zwjazkowych krajow ćahnyli a nětko chutnje wo tym rozmysluja, so do domizny zaso wróćić. Přišli běchu tež domoródni, zo bychu so za nowym dźěłom rozhladowali. Potencielnym nawrótnikam běchu tež tak mjenowane „mjechke“ faktory wažne, kaž su to wólnočasne poskitki a bydlenje.

Něhdźe 15 000 swěčkow w delanskej dźěłarni wob lěto zhotowjeja

Hdyž Jörg Weber ze skalpelom swěčki wudebja, skutkuje kaž Gepetto ze stawizny wo Pinocchiju. Kedźbliwje a z lubosću k detailej rysuje wón motiwy na wóskowe ćěleso, kaž by je wožiwić chcył.

Prjedy bě Jörg Weber swójske přede­wzaće ze 30 sobudźěłaćerjemi nawjedował. Zo budźe jónu w swěčkarni dźěłać, njeby sej nihdy myslił. Tola jako měješe w lěće 2014 noweho šefa za Róžeńčansku swěčkarnju pytać, so jemu městnosć tak zalubi, zo je sam zastojnstwo přewzał. „Cyrkej dale wobsteji a dźěło so mi jara lubješe“, wón měni. Přiwšěm njejsu wuhlady do přichoda branše runjewon dobre. Čas wot kónca oktobra hač do jutrow je za jednaćela a jeho kolegow hłowna sezona. Mnohe cyrkwje sej hižo swoje jutrowne swěčki skazaja, dokelž je w Róžeńće nimale dospołnje w ručnym dźěle zhotowjeja. Wosady sej swěčki tuž rady tu wobstaruja. „Wjele fararjow je wobkrućiło, zo so naše swěčki rjeńšo a swětlišo swěća“, praji Jörg Weber. Tež Drježdźanska cyrkej Našeje knjenje dawa sej swoje na jedyn meter dołhe jutrowne swěčki w delanskej wsy zhotowić.

Wojerecy (SN/BŠe). Po wjac hač 15 lětach su zastupjerjo z politiki a komunow dźensa připołdnju Wojerowsku wobjězdku oficialnje wotewrěli. Wona zwjazuje zwjazkowej dróze B 96 a B 97 pola wotbóčki Bórk. Tak je nětko spěšniši zwisk do směra na Choćebuz a nawopak móžny. We Wojerecach pak budźe mjenje wobchada, wosebje nakładnych awtow. Dróhu B 96 oficialnje přewěnuja. Ćisk njeleži tuž hižo při zwjazkowej, ale statnej dróze.

Wosebje wobydlerjo Ćiska wot wob­jězdki profituja. Wšako su z přepodaćom wobjězdki železniski přechod we wsy zawrě­li, a tak hižo žadyn direktny wobchadny zwisk do města njeje. Na to maja so tuž tež šoferojo přichodnje nastajić, kotřiž chcedźa z Budyskeho směra do Wojerec. Tak jědu wotnětka wot wob­jězdki přez industrijnišćo do města, Ćišćenjo pak po Kowarskej hasy.

Kaž Wojerowske mešćanske zarjad­nistwo zdźěli, nastajeja při železniskim přechodźe najprjedy raz twarske płoty, zo njemóže jón nichtó wjace wužiwać. Předwidźane je, tam za wobchad móžnosć zawróćenja twarić.