Zhorjelc/Wojerecy (SN/BŠe). Z ćahom w běhu jenož 56 mjeńšin ze Zhorjelca do Wojerec a nawopak jěć budźe bórze woprawdźitosć. Z nowym jězbnym planom 9. decembra móža ludźo zwisk zaso wužiwać. „Smy zaso tu“, wuzběhny jednaćel wobchadneho zaměroweho zwjazka Hornja Łužica-Delnja Šleska (ZVON) Hans-Jürgen Pfeiffer minjeny pjatk. To smědźachu nowinarjo prěni króć po dospołnje nowej elektrifikowanej čarje z ćahom sobujěć. „Sobujěducy regionalneho wobchada z infrastruktury profituja. Wot Niskeje do Zhorjelca trjebaja z ćahom jenož hišće 18 mjeńšin. To z awtom nje­zdokonješ“, wuswětli nawoda zawodneho planowanja towaršnosće Wuchodoněmska železnica Heiko Miels.

Hižo kónc oktobra běchu twarske dźěła na čarje zakónčili. Tuchwilu přewjeduja hišće zbywace dźěła na nastupišćach, kaž w Niskej. Minjene tydźenje pak su fachowcy­ čaru dokładnje přepruwowali. Runje tak wotměchu kubłanske jězby, zo móhł so personal z čaru bliže zezna­jomić. Přichodnje dźě budu ćahi na čarje hač do 120 kilometrow na hodźinu spěšne­.

Na wjelelětne dobre zhromadne dźěło móžetej Budyska župa „Jan Arnošt Smoler“ a Stróžanski biosferowy rezerwat Hornjołužiska hola a haty zhladować. Mam to za jara chwalobne, zo tam na serbskosć dźiwaja. Biosferowy rezerwat pokazuje, kak dźe a zo je móžno „samo­zrozumliwje“ na našu maćeršćinu dźiwać a ju wot wšeho spočatka sobu do přede­wzaćow zaplesć. Najnowši přikład je nětko­ předstajeny wobłukowy koncept. 40stronski spis je mjenujcy dwurěčny němsko-serbski. Tajke akcije mje zwjeseleja. Wšako akterojo z nimi pokazuja, zo je Łužica znajmjeńša dwurěčna a zo rěč našeho ludu k wšědnemu žiwjenju we Łužicy słuša kaž sól do poliwki. Je rjenje widźeć, zo skutkowanje towarstwow a jednotliwcow płody njese a zo njetrjebaš zas a zaso na serbskosć skedźbnjeć. Postupowanje rezerwata měli sej wokrjes a město Budyšin kaž tež mnohe dalše zarjady a zarjadnišća za přikład brać. Janek Wowčer

Zajim młodostnych za wukubłanje pola LEAG dale wulki

Čorna Pumpa (JoS/SN). Zajim na wukubłanskich poskitkach předewzaća Łužiska energija a milinarnje (LEAG) njepopušća. To pokaza njedawny dźeń wote­wrjenych duri na Čornopumpskim industrijnišću, hdźež ma koncern swoje wukubłanske stejnišćo. Mnozy młodźi požadarjo a jich starši widźa w LEAG předewzaće z přichodom, štož ma wězo swoju přičinu. „Wšitcy wěmy, zo je doba brunicy kónčna. Dźeń x pak w energijowej změnje žadyn njebudźe. Za přechodny čas maja zastaranje z milinu zaručene a syće stabilne być. Za to trjebamy tež hišće­ za 30 lět kwalifikowanych sobudźěłaćerjow, wo kotrychž mamy so dźensa starać. Runje tak so LEAG wo nowe wobchodne perspektiwy prócuje“, rozprawješe nawoda wukubłanja hórnistwo a milinarnje Axel Ziller. Tak so za młodostnych wudani so požadać. „Štóž so dźensa přizjewi, ma cyłožiwjensku perspektiwu we Łužicy.“ Železnicarjow LEAG po wukubłanju stoprocentnje přewozmje. Za tamne wobłuki to nimale runje tak płaći.

We łužiskej jězorinje je dalši zwisk za łódźe bórze dokónčeny. Ze zahajenjom sezony 2019 chcedźa Borboriny kanal wot Lejnjanskeho k Parcowskemu jězorej wužiwarjam přepodać. To bě srjedu na 11. regionalnej konferency wo łužiskej jězorinje w Ranju zhonić.

Rań (AK/SN). „Na tym dźěłamy jara koncentrowani. Tuchwilu wothłosujemy so z krajnymaj direkcijomaj Sakskeje a Braniborskeje nastupajo přizwolenje wobchada łódźow“, zawěsći Gerd Richter, wotrjadnik za projektny management Wuchod Łužiskeje a srjedźoněmskeje towaršnosće hórnistwoweho zarjadnistwa (LMBV) zawčerawšim w Ranju. 11. regionalna konferenca steješe pod hesłom „Łužiska jězorina jako motor za regionalnu strukturnu změnu“. Nimale 70 zastupjerjow z turizma, komunow, zwjazkow a ministerstwow, ale tež zapósłancaj zwjazkoweho sejma Thomas Jurk (SPD) a Caren Lay (Lěwica) su přeprošenje organizatorow přiwzali.