Próstwawo wuswojenje nětko předleži
Rowno (SN). Koncern Łužiska energija a milinarnje (LEAG) je próstwu stajił, zo smě so přestrjeń pola Rownoho za hórnistwo wužiwać. Jako wotnajer přewjedźe wobswětowy zwjazk Zelena Liga tam hižo wjacore lěta kulturne a wobswětokubłanske zarjadowanja. Próstwu LEAG je mjeztym Sakski wyši hórnistwowy zarjad potrjechenym připósłał. „Hišće přeco priwatne ležownosće za brunicowe jamy wuswojeja. To pokazuje, zo mamy zwjazkowy hórnistwowy zakoń nuznje předźěłać. Nimo škody za klimu a wodowy etat je postupowanje koncerna tež ćežke zasahowanje do zakładnych prawow wobsedźerjow lěsow, štož so wusprawnić njehodźi. Jako wotnajerjo stejimy dale po boku wobsedźerjow, kotřiž swoju ležownosć jamje přewostajić nochcedźa“, zdźěli wčera Renej Šuster ze Zeleneje ligi.
Po informacijach LEAG, tak wobswětowy zwjazk informuje, je w próstwje podate, zo njemóža 23,8 milionow tonow brunicy wudobywać a 110 hektarow krajiny wotbagrować, jelizo ležownosć hač k 1. januarej 2026 k dispoziciji njesteji.
Transformaciju dale pospěšić
Choćebuz (SN/JaW). Předewzaće Łužiska energija a milinarnje (LEAG) chce swoju transformaciju wot na brunicy bazowaceje produkcije miliny k šěroko nastajenemu zelenemu energijowemu předewzaću dale pospěšić. Docpěć chcedźa to mjez druhim ze znowarozdźělenjom zamołwitosćow w swojim předsydstwje, informowaše wčera nowinska rěčnica LEAG Kathi Gerstner.
Kaž w spisu rěka, „přewozmje nawoda předsydstwa LEAG Thorsten Kramer wjednistwo wobłukow wuwiwanje nowych wobchodniskich polow, wutwar wobnowjomnych energijow kaž tež jich zwičnjenje“. W tym zwisku dotalny zamołwity za nowe wobchodniske pola Andreas Huck předsydstwo koncerna ke kóncej junija wopušći. Wón pak budźe jón dale poradźować. Předsyda dohladowanskeje rady koncerna Andreas Lusch dźakowaše so Huckej za angažement z kotrymž je wón „wažne impulsy sadźił a w běhu krótkeho časa wuspěchi w transformaciji docpěł. Z jeho dalšim poradźowanjom zaručamy pokročowanje wažnych projektow“, tak Lusch.
Nad Nysu ma dalši móst nastać
Zhorjelc a Zgorzelec chcetej stejnišćo hospodarsce zesylnić
Zhorjelc (AK/SN). Susodnej měsće Zhorjelc na němskej stronje a Zgorzelec na pólskej stronje chcetej swoje zhromadne dźěło pohłubšić. Tole je facit minjeneho zhromadneho posedźenja měšćanskeju radow njedawno w Zhorjelcu. „Při tym smy konkretnej předewzaći formulowali“, wuswětla Juliane Zachmann, nowinska rěčnica města Zhorjelca. Wobě měsće chcetej dalši móst nad łužiskej Nysu planować a twarić. Tohorunja móhłoj zhromadny měšćanski bliskowobchad wuwić. K woběmaj předewzaćomaj podpisaštaj wyšej měšćanostaj Octavian Ursu (Zhorjelc) a Rafał Groż (Zgorzelec) zawjazowace dojednanje.
Kónc tydźenja z busom k jězorej
Swójske dochody njewobeńdźomne
Zaměrowy zwjazk Łužiska jězorina Sakskeje je přiměrjenje wuměnjenjow za wužiwanje swojich připrawow wobzamknył. Wšako trjebaja za přichod dochody, to wobeńdźomne njeje.
Tornow (AK/SN). Swoje připrawy w přichodźe zaměrnišo wobhospodarjeć a z wičnjeć, na to so Zaměrowy zwjazk Łužiska jězorina Sakskeje nastaja. Dołhodobnje chce sam dochody nadźěłać. To je jednaćel Daniel Just předwčerawšim w zwjazkowej zhromadźiznje w kulturnym domje Tornow podšmórnył. Zwjazkowi radźićeljo su přiměrjenje wužiwanskich wuměnjenjow za připrawy zwjazka jednohłósnje schwalili.
Zasydlenje w Gubinje postupuje
Kanadiske surowiznowe předewzaće Rock Tech Lithium chce w Gubinje při mjezy z Pólskej za twar baterijow wužiwajomny litiumowy hydroksid za elektroawta zhotowić. Prěnje dźělne dowolnosće su zapodate. Za něšto měsacow móhli twarić započeć.
Gubin (dpa/SN). Planowane zasydlenje kanadiskeho předewzaća za surowizny Rock Tech Lithium w braniborskim Gubinje, wokrjes Sprjewja-Nysa, bywa dźeń a jasniše. Město je z twar přihotowacymi naprawami na za to wupokazanym industrijnišću započało, zdźěli měšćanosta Fred Mahro powěsćerni dpa. K tomu słuša na přikład přesydlenje družin zwěrjatow, kotrež su po dorozumjenju z přirodoškitnym zarjadom do narunanskich habitatow přeměstnili. Dźěła chcedźa hač do kónca septembra zakónčić. Předewzaće z Kanady bě teren loni wot města a měšćanskich zawodow kupiło.
Woda nětko šefowy nadawk
We wodźiznach Łužicy hač do Berlina so situacija dale přiwótřa
Zły Komorow (SN/BŠe). Wjele wobydlerjow we Łužicy zhladuje z wulkej starosću na trajacu suchotu, wšako je dale a mjenje wody k dispoziciji. Nimale we wšitkich rěkach ćeće tuchwilu mało wody a přichodne dny meteorologojo wjele spadkow njewěšća. Tež ze stron politiki so nětko něšto hiba. Tak chce sakske knježerstwo 27. junija zakładnu koncepciju wodoweho zastaranja 2030 předstajić. Suche lěta w zašłosći wšak su dopokazali, zo so klima měnja a suche periody z mało spadkami přiběraja.
Zawody zaso swoje wrota wćipnym hosćom wotewrěli
Budyšin (CS/SN). „Pózdnja změna“ je woblubowane zarjadowanje, na kotrymž móža Budyšenjo swoje tu zasydlene industrijne a rjemjeslniske zawody zeznać. Minjeny pjatk, jako je wjele sobudźěłaćerjow hižo do kónca tydźenja startowato, wotewrichu tudyše zawody wrota wćipnym wopytowarjam. Akcija wotrjada hospodarske spěchowanje města Budyšin měri so předewšěm na młodych ludźi, kotřiž so hišće za powołanjom rozhladuja. Ale tež dorosćeni składnosć rady wužija, zo bychu raz za hewak zawrjene wrota pohladali. Pjatk je so 23 zawodow na pózdnjej změnje wobdźěliło. Cyłkownje dźewjeć turow bě předwidźanych. Najspěšnišo wuknihowana bě tura 4 z wopytom twornje Alstom.
Předewzaće chce aktiwne być
Transformacija bě ćežišćo Wuchodoněmskeho hospodarskeho foruma
Bad Saarow/Choćebuz (SN/at/BŠe). Wo šansach a wužadanjach Łužicy su wčera na Wuchodoněmskim hospodarskim forumje w Bad Saarowje diskutowali. Wobdźělenaj běštaj zdobom społnomócnjeny braniborskeho ministerskeho prezidenta za Łužicu dr.-ing. Klaus Freytag a nawoda předsydstwa LEAG Thorsten Kramer. Kaž předewzaće informuje, je Kramer pod hesłom „Nowe perspektiwy tworić – wo transformaciji regionow“ strategiske ćežišća nastupajo transformaciju LEAG rozjimał. Swoje předewzaće „budźe aktiwny dźěl teje transformacije“, wón rjekny. Z dwěmaj ćežišćomaj chcedźa koncern strategisce wuwiwać. „Z wobnowjomnymi energijemi a z nowym zawěsćenym wukonom našich milinarnjow wuměnjenja za nowe tworjenje hódnotow a wěstotu zastaranja zaručamy“, nawoda předsydstwa wuwjedźe.
Šulerjo so lětsa zaso socialnje angažuja
Budyšin (SN/BŠe). „Jeli chcedźa so dźěći a młodostni socialnje angažować, měli jich dorosćeni ze wšej mocu podpěrać“, wuzběhnje sakski hospodarski minister Martin Dulig (SPD) a zhladuje z tym na lětuši dźeń „genialsocial“, kotryž je za 12. julij planowany. W Sakskej wotměje so akciski dźeń mjeztym hižo 18. króć. Při tym přewozmu šulerjo mjeńše nadawki w zawodach abo pola priwatnych wosobow a swoju mzdu skónčnje darja. Połojca pjenjez je za projekty postajena, su wusměrja so na pomoc ludźi w chudych krajach wusměrjene. Dalše 30 procentow mzdy móža šule, kotrež so na akciji wobdźěla, za swoje projekty wužiwać. Zbywace 20 procentow pak su za kubłanske dźěło młodostnych planowane. „Ideja je tuž genialna a socialna“, Dulig podšmórny.
