Lětsa prěni raz ze serbskej tematiku
Kooperacija zarjadnistwa biosferoweho rezerwata UNESCO Hornjołužiska hola a haty z Wysokej šulu za naslědne wuwiće w braniborskim Eberswaldźe (HNEE) traje mjeztym štyri lěta. Ručež to wuměnjenja koronapandemije dla dowola, chcedźa studowacy HNEE kónc junija zajimawe temy, mjez nimi jednu serbsku, tule na městnje wobdźěłać.
Stróža/Eberswalde (SN/at). Štyri skupiny studowacych zaběraja so lětsa z třomi temami, wobkruća prof. dr. Benjamin Nölting ze slědźenskeho centruma naslědnosć-transformaciju-transfer HNEE dalše zhromadne dźěło ze zarjadnistwom tudyšeho biosferoweho rezerwata. „Dwě skupinje wěnujetej so wuwiću sydlišćow a w regionje typiskemu twarjenju. Dalša přepytuje funkciju komunow, kotrež su w radźe biosferoweho rezerwata zastupjene. A štwórta přepytuje, kak su serbske zajimy do skutkowanja rezerwata zapřijate“, prof. Nölting rozłožuje.
Dźensa je swětowy dźeń pčołkow
Změja bórze wonkowne městna
Koronapandemiju jako šansu wužiwać a čas zmysłapołnje wužiwać je hesło mnohich, kotřiž su sej něšto nowe předewzali. Tež serbscy hosćencarjo po tejle zasadźe jednaja.
Budyšin (CS/SN). Nanuzowanu korona přestawku wužiwataj mějićelej Budyskeho hosćenca „Wjelbik“ Monika Lukašowa a jeje mandźelski Tomaš, zo byštaj hosćenc přetworiłoj. Tak běchu sanitarne připrawy hišće na stawje kaž před 30 lětami. Nětko tam sobudźěłaćerjo Rječkec a Čornakec zawoda nuzniki dospołnje ponowjeja a za to tež nowe roły kładu. Nuzniki a honače budu potom bjezkontaktne. Bohužel, tak Tomaš Lukaš praji, dyrbjachu korony dla na přikład na myjadła wjele dlěje čakać hač planowane. Dale dóstanje hosćenc nowu přewětrjensku připrawu. Stara pochadźeše z časa załoženja „Wjelbika“ a njeměješe žane filtry. Zatwar wužiwachu hnydom sobu za to, sćěny a wjerchi znowa wobarbić.
Młode žony z dospołnje hinašim widom
Hłowne wuslědki reprezentatiwneho naprašowanja łužiskeje ludnosće nastupajo strukturnu změnu, tež Łužiski monitor 2021 mjenowaneho, su znate (SN rozprawjachu). Prěni zjawny online-forum je wčera na najnowše detailowe wuhódnoćenja skedźbnił.
Kwětanecy/Budyšin (SN/at). Poprawne pozitiwne poselstwo lětušeho druheho Łužiskeho monitora mjenowaše sobuiniciator naprašowanja dr. Jörg Heidig fakt, zo je podźěl ludźi, kotřiž kónc wudobywanja brunicy wotpokazuja, po jednym lěće mjeńši hač tych, kotřiž jón podpěruja. Z tym njeběchu slědźerjo ličili, přizna dr. Heidig na wčerawšim prěnim online-předstajenju Łužiskeho monitora.
Zaćišć přesłapjenosće
Mjenje materiala – wyše płaćizny
„Namakaj swoje powołanje“
Drježdźany/Budyšin (SN/at). Na městnje wo wukubłanju w rjemjesle so wobhonić je za čas koronapandemije nimale bjezwuhladne. To ma so hižo bórze změnić. We wobłuku dnja wukubłanja 26. junija přeprosy Drježdźanska rjemjeslniska komora na tajki event pod hesłom „Perfect match: Namakaj swoje rjemjesło“. Wot 9 hodź. změja młodostni potom we Wukubłanskim centrumje rjemjesła njumii w sakskej krajnej stolicy składnosć, nastupajo konkretne rjemjeslniske powołanje sej mysle ze zastupjerjom tohole přemysła wuměnjeć. Trěbne indiwiduelne terminy hodźa so hač do 4. junija w interneće knihować pod . Z přizjewjenjom je přistup zaručeny.
„Z terminowje wjazanym konceptom ,Perfect match‘ smy móžnosć wutworili, zo so młodostni a zawody najebać pandemiju zetkawaja“, wjeseli so hłowny jednaćel Drježdźanskeje rjemjeslniskeje komory Andreas Brzezinski. Wšitke prašenja dualne wukubłanje na rjemjeslnika/rjemjeslnicu nastupajo su witane a snadź tež zajimcam z Hornjeje Łužicy dobra přiležnosć so wobhonić.
Wobmyslenja baterijoweje fabriki dla
Jězor po zesunjenju zemje dlěje saněruja
Łaz (SN/at). Po hoberskim zesunjenju zemje w měrcu budźe Hórnikečanski jězor bytostnje dlěje saněrowany. Koncept wo tym, kak měli zesunjeny brjóh zawěsćić, ma hakle klětu nalěto předležeć. To rozprawja powěsćernja dpa, powołaca so na informacije ze Sakskeho wyšeho hórniskeho zarjada w Freibergu.
Prěnjotnje bě předwidźane, zapławjenu bywšu wuhlowu jamu w sezonje 2022 za wólnočasne wužiwanje zaso přepodać. Jězor dźě je wot nalěća 2014 saněrowanskich dźěłow Łužiskeje a srjedźoněmskeje towaršnosće hórnistwoweho zarjadnistwa (LMBV) njepřistupny. Hdy pak budźe tam po tuchwilnym połoženju zaso móžno so kupać a čołmikować, na to wyši hórniski zarjad žanu wotmołwu nima.
Dźěło jamy znowa přepruwować
Rozestajenju pod aspektom wobswětoškita nastupajo Janšojsku brunicowu jamu je póndźelu nowy kapitl k tomu přišoł. Němska wobswětowa pomoc (DUH) a Zelena liga matej dalše přizwolenje jamy za njezakonske. Tak je DHU wobkrućenje znapřećiwjenja zapodała.
Berlin/Choćebuz (SN/at). Adresat wospjetneho znapřećiwjenja je braniborski Krajny zarjad za hórnistwo, geologiju a surowizny (LBGR). Kaž Choćebuska wobswětowa skupina pod třěchu Zeleneje ligi informuje, dyrbješe zarjad hižo do toho přiznać, zo njeje so dotal poradźiło tomu zadźěwać, zo so woda z Pynowskeho jězora blisko brunicoweje jamy zhubja. Wobkrućenje wotpokazowaceje pozicije je DHU předwčerawšim z podpěru Zeleneje ligi zapodała. Při tym nawjazuje DUH na loni k terminej zapodate znapřećiwjenje přećiwo hłownemu wobhospodarjenskemu planej Janšojskeje jamy 2020–2023.
