Firmam w krizy pomhaja
Město Kulow podpěruje system dobropisow za nakupowanje na městnje
Kulow (AK/SN). Domoródnym drobnowikowarjam, rjemjeslnikam, přemysłownikam a posłužbarjam chce město Kulow w koronakrizy pomhać. Dobropisowy system ma k nakupowanju w měsće a wokolnych wsach pohnuwać. K tomu wuznachu so čłonojo měšćanskeje rady na swojim wčerawšim posedźenju. Jednohłósnje woni wobzamknychu, zwoprawdźenje mjenowaneho systema z 2 500 eurami z měšćanskeje kasy spěchować. Dźěłowa skupina ma so prawje bórze wo nadrobnosće starać. Tajki system dobropisow běchu radźićeljo sami namjetowali.
Pandemija krizu dale přiwótřiła
Wopokaza so korona łužiskim nutřkownym městam jako smjertny dyr? Z tymle palacym prašenjom rozestajachu so wčera wječor na online-diskusiji z Budyskej zapósłanču zwjazkoweho sejma Caren Lay (Lěwica). Wobdźělnicy rozjimachu, kak móhli regionalnemu drobnowikowanju z krizy pomhać.
Wozy ludźom tepjenski wolij
Telefoniske a digitalne poradźowanje
Budyšin/Drježdźany (SN/BŠe). Rjemjeslniske zawody pytaja nuznje za wučomnikami, pandemija pak situaciju na powołanskich wikach dale přiwótřa. Wšako njejsu žane zarjadowanja powołanskeje orientacije móžne, hdźež bychu młodostni składnosć měli so ze zastupjerjemi předewzaćow abo rjemjeslniskich zjednoćenstwow rozmołwjeć. Zwisk k šulerjam pobrachuje, a přichodne wukubłanske lěto so hižo w lěću zahaji. „Dóstawamy wjele telefonatow staršich, šulerjow a poradźowarjow w praksy, kotřiž trjebaja poradźowanje“, praji jednaćelka Budyskeho wokrjesneho rjemjeslnistwa Sabine Gotscha-Schock. Wukubłanske městna su zdobom na internetnej stronje wopisane. „Tuchwilu so pola čłonow našich zjednoćenstwow za dalšimi swobodnymi městnami za lětsa a klětu prašamy“, wona informuje. Tak nastawaja aktualne lisćiny za kónčinu, wo kotrychž móža so zajimcy pola wokrjesneho rjemjeslnistwa wobhonić. Jednaćelce je ćežke połoženje wědome, ćim bóle wona namołwja so wosobinsce na akterow wobroćić.
Tež ćišćernja ćerpi lockdowna dla
Wot koronakrizy potrjechene su tež zawody, kotrež njetrjebachu swoje dźěło přetorhnyć, kaž ćišćernja Schiemenz w Choćebuzu. Zawod bě do wudyrjenja pandemije wulki dźěl swojich dochodow z plakatami za kina a z wabjenskim materialom za hosćency, turizm, kulturne institucije a zarjadowarjow nadźěłał, kaž jednaćel Frank Schiemenz (hlej wobraz) rozprawja. Loni srjedź měrca pak běchu wšitke předewzaća skazanki wróćo sćahnyli. Tak je firma 35 procentow wobrota přisadźiła. „Tajku stratu njemóžemy hižo nachwatać“, Schiemenz měni. Wón so nětko nadźija, zo wobmjezowanja bórze zběhnu a zo móže zaso „normalnje“ dźěłać. Foto: Michael Helbig
Straty wjac hač 50 milionow eurow
Lońše ličby přenocowanjow po cyłej Łužicy dopokazuja, kak turistiski wobłuk pod koronapandemiju ćerpi. Wšudźe pak hotuja so na nowu sezonu, kotraž ma ćim wuspěšniša być. Šansy za to su po wšěm zdaću jara dobre.
Budyšin (SN/BŠe). Lońše straty turistikarjow regiona koronapandemije dla nětko skónčnje tež w ličbach předleža. Marketingowa towaršnosć Hornja Łužica-Delnja Šleska (MGO) je so z nimi bliže zaběrała. Ličba absolutnych přenocowanjow hosći, kotřiž su loni do Hornjeje Łužicy přišli, leži pola 1 578 446, štož je 434 592 mjenje hač w rekordnym lěće 2019, hdźež bě wjac hač dwaj milionaj hosći w regionje přenocowało. MGO trochuje pobrachowace dochody na něhdźe 51,5 milionow eurow. Tale hoberska ličba nam wuwědomja, kak turistiski wobłuk ćerpi. Jara pozitiwnje pak hódnoći MGO wuwiće, zo ludźo dlěje w regionje přebywaja hač hewak. Tak je so tale přerězna ličba wot 2,6 na 2,9 dnjow powjetšiła. Zaměr, přerěznje tři dny přebytka docpěć, je tuž bliski. Předewšěm campingownišća a poskićerjo dowolowych bydlenjow registrowachu dlěše přebytki.
Truty maja přichod
Jako bě słyšeć: „Piwarnja so pali!“
Warjenje piwa ma w Budyšinje dołhu tradiciju, při čimž bywše zawody bohužel wjace njeeksistuja
Nóc wot 19. na 20 februar 1996 je so mnohim wobydlerjam sprjewineho města do pomjatka zaryła. Temperatura bě wokoło nule, měšeńca sněha a dešća bě chětro njepřijomna. Přiwšěm bě w pózdnich wječornych hodźinach njewšědnje wjele ludźi na Budyskich dróhach. Wšako bě nóc wot róžoweje póndźele na póstnisku wutoru, w kotrejž mnozy swjećachu. Tak tež njezadźiwa, zo je so powěsć něhdźe w 22.30 hodź. spěšnje po měsće šěriła: „Woheń! Piwarnja so pali!“
Hižo krótko po tym zhromadźi so wulka syła ludźi wokoło markantneho kompleksa twarjenjow na wuběžku skały přez Sprjewju. Wjacore sta wobydlerjow su to, štož widźachu, ze swojimi widejowymi kamerami a fotoaparatami – smartfony tehdy hišće žane njeběchu – sćěhowali. Jako „disciplinowanych“ jich policija pozdźišo wopisowaše. Nichtó njeje hašenske dźěła mylił abo je ze swojim zadźerženjom samo wohrozył.
Tež Budyske wobchody wobswětlene byli
Budyšin (SN/BŠe). Poprawom je Budyski Center na Žitnych wikach koronapandemije dla zawrjeny, ale wčera wječor běchu tam wobchody a wukładne wokna čerwjene wobswětlene. Akcija, wotměwaca so w nakupowanišćach po cyłej Němskej, měrješe so na ministerskich prezidentow zwjazkowych krajow, kotřiž budu na swojej jutřišej konferency wospjet nastupajo wobmjezowanje swobodneho pohibowanja wuradźować. Wikowarjo skedźbnjachu tak na swoje ćežke, eksistencu wohrožace połoženje. Drobnowikowarjo měli bórze zaso swoje wobchody wotewrěć směć. „Z akciju chcemy jasnje na to pokazać, kak wikowarjo ćerpja. Mnozy so boja, zo dyrbja swój wobchod cyle zawrěć. Nimo toho je wjele dźěłowych městnow wohroženych. Z njeličomnych přepytowanjow wuchadźa, zo so jara mało ludźi při nakupowanju natyknje. Tež Roberta Kochowy institut ma infekciske riziko za snadne“, zwurazni wčera manager Budyskeho centera Christian Polkow. Poskitk click & collect nima wón za woprawdźitu alternatiwu. Wšako kóšty za personal a wobhospodarjenje wobchodow wostawaja a wobrot njenarunaja.
„Najebać pandemiju turizm móžny“
Drježdźany (SN/BŠe). Zo druhi lockdown mjez druhim tež turistiski wobłuk chětro poćežuje, je znate. Němski zwjazk hotelow a hosćencow (Dehoga) so zaměrnje za branšu zasadźa. Jeho zastupjerjo su so njedawno ze sakskim ministerskim prezidentom Michaelom Kretschmerom (CDU) rozmołwjeli. Wosebje hladajo na jeho wuprajenje, zo dowol k jutram zawěsće móžny njebudźe, je jich trjechiło. Akterojo rysowachu jemu dramatiske połoženje, skedźbnichu pak zdobom na hygienowe koncepty kaž tež na schodźenkowe plany, z pomocu kotrychž móhli hotele a hosćency wotewrjene być.
