Z nowej stronu w interneće

Dienstag, 08. August 2017 geschrieben von:

Zhorjelc (SN/at). Wuwićowa towaršnosć Delnjošleska Hornja Łužica (ENO) prezentuje so wot tohole tydźenja z nowowuhotowanej internetnej stronu. Kaž jednaćel Sven Mimus podšmórnje, je zarjadnišćo swój wukonowy profil dale wótřił, po tym zo bě loni w měrcu wot Rychbacha do Zhorjelca přećahnyło. „To ma so tež w našim wonkownym předstajenju wotbłyšćować“, Mimus zdźěli.

Zakładny nadawk zarjadnišća wopisuje jednaćel tak: „Swěrnje zasadźe ,z wo­krjesa – za wokrjes‘ podpěramy přede­wšěm regionale rjećazy wutworjenja hódnotow.“ K tomu słuša, zo spěchuja akterow, skutkowacych w Zhorjelskim wokrjesu a w jeho komunach.

Kaž w nowinskej zdźělence dale rěka, móže ENO z knowhowom serwisowych wobłukow klientam wulki wukonowy spektrum poskićeć. Tak zhoniš na internetnej stronje wo prócowanjach rěč pólskich a čěskich susodow nawuknyć a wo stawizničkach z pomjezneho ruma, wo serbskej rěči a kulturje na sewjernym wokrjesnym teritoriju pak njeinformuja.

Powołanje z přichodom

Montag, 07. August 2017 geschrieben von:

Budyšin (SN/BŠe). Elektronikarjo mějachu lětsa cyle hinaši zazběh do swojeho wukubłanja. Wokrjesne rjemjeslnistwo bě mjenujcy wosebity camp zarjado­wało, hdźež so wučomnicy z powołanjom bliže zaběrachu. Tak nazhonichu w zwučowanjach na přikład, zo njetrjebaja so miliny bojeć, zo pak maja z respektom z njej wobchadźeć. Tohorunja přewjedźechu zamołwići wodźenje po sprjewinym měsće, hdźež wěnowachu so swěcy. Wulět do Budyskeho krosnowanskeho parka při spjatym jězoru skupinske dźěło skrući. Dale su sej wobdźělnicy hišće twarnišćo wobhladali. „Na campje wobdźěli so šěsć młodostnych. Jědnaće elektronikarjow pak je spočatk awgusta w Budyskim wokrjesu swoje wukubłanje zahajiło. To je tak mało kaž nihdy do toho“, jednaćelka wokrjesneho rjemjeslnistwa Sabine Gotscha-Schock wujasni.

Wobydlerjow do projektow sobu zapřijeć

Montag, 07. August 2017 geschrieben von:

Njedźichow (SN/BŠe). Prašenje, kak hodźa so wobnowjomne energije wuspěšnje wužiwać, je dźeń a bóle tema. Toho­dla je sakski statny sekretar w minister­stwje za hospodarstwo, dźěło a wobchad Stefan Brangs (SPD) zašły tydźeń swoju lětnju turu energiji wěnował. Mjez druhim bě sej wón minjeny pjatk do Nje­dźichowa dojěł, hdźež wobhlada sej wo­srjedź lěsa jedyn z třoch wětrnikow. W přirunanju k druhim zwjazkowym krajam je w Sakskej poprawom zakazane, připrawy w lěsu twarić. „Aktualny energijowy plan mamy dale wuwić. Rozmyslować měli tuž wo tym, hač so tajke připrawy pod wěstymi wuměnjenjemi tola w lěsach twarić njehodźa“, Brangs zwurazni. Tohodla přeprosy statny sekretar přećiwnikow a přiwisnikow ideje na diskusijne koło.

Mnohe městna njewobsadźene

Mittwoch, 02. August 2017 geschrieben von:

Ryzy ličensce je w Hornjej Łužicy samo wjace wukubłanskich městnow hač njezastaranych požadarjow. Powołanskim přećam młodych ludźi pak so wone často njehodźa.

Budyšin (CK/SN). Měsac do spočatka noweho wukubłanskeho lěta je hišće 1 121 wukubłanskich městnow we wuchodnej Sakskej njewobsadźenych, ale tež 1 099 požadarjow njezastaranych. Ryzy ličensce móhli tuž wšitcy šulscy wotchadnicy powołanje w Hornjej Łužicy nawuknyć. „Šansy za wukubłanske městno w regionje su tak dobre kaž hišće ženje“, měni Ilona Winge-Paul. To je wažne poselstwo młodostnym a jich staršim, praji jednaćelka operatiwneho wobłuka Budyskeje agentury za dźěło. Wot oktobra je so 3 530 hólcow a holcow – 26 mjenje hač loni – zapisało, pytajo za wukubłanskim městnom přez dźěłowu agenturu. Předewzaća su w samsnym času dohromady 2 856 wukubłanskich městnow přizjewili – 200 wjace hač lěto do toho.

Hosćencarjo wabja znowa ze žonopom

Dienstag, 01. August 2017 geschrieben von:

Budyšin (SN/mwe). Štyrnaće Budyskich hosćencow a barow kaž tež dalšich lokalitow so tež lětsa na žonopowych tydźenjach sprjewineho města wobdźěli. Wot 15. awgusta hač k dnjej pomnika, 11. septembra, chcedźa tam najwšelakoriše jědźe ze žonopom, žonopowe lody kaž tež serbsku kulinarisku specialitu ze žonopom poskićeć. Organizator je znowa Budyske staroměšćanske towarstwo. Jeho rěčnik, mějićel hosćenca „K zaječemu róžkej“ Frank Haase, dźensa nowinarjam rjekny: „To je přinošk nas gastronomow, zo by hišće wjace turistow do města a Hornjeje Łužicy přijěło, so z Budyskim žonopom zeznajomiło a jón kupiło.“ A woprawdźe: Ličba tych přiběra, kotřiž žonopa a z nim zwjazanych žonopowych tydźenjow dla do našeho regiona přijědu. A to je zdobom jedna přičina, zo móžeš sej delikatesu po cyłej Němskej kupić.

Zwjeselaca mjezybilanca

Dienstag, 01. August 2017 geschrieben von:

Drježdźany/Budyšin (SN/at). Rjemjeslniske zawody we wuchodnej Sakskej maja za dźensa oficialnje zahajene nowe wukubłanske lěto wjace wučomnikow. W Budyskim wo­krjesu je jich 267 (loni 247) a w Zhorjelskim 172 (loni 147). Kaž Drježdźanska rjemjeslniska komora zdźěli, je w jeje wobłuku 1 350 młodych žonow a muži wukubłanske zrěčenje podpisało. Tak je so 42 ludźi wjace hač minjene lěto za karjeru w rjemjesle rozsudźiło.

Andreas Brzezinski, hłowny jednaćel Drježdźanskeje rjemjeslniskeje komo­ry, rěči wo „zwjeselacej mjezybilancy“. W rjemjesle powołanje nawuknyć zaruča młodostnym dobre šansy na karjeru. „Jako kwalifikowani fachowcy su woni prašeni, nimo toho skići so jim wukubłanje na mištra a studij.“

Pjeć najbóle požadanych wukubłanskich powołanjow w Drježdźanskej komorje su wozydłowy mechatronikar, frizer, elektronikar, blidar kaž tež připrawowy mechanikar za sanitarnu, tepjensku a klimowu techniku. 529 wukubłanskich městnow pak je hišće njewobsadźenych.

Bjezdźěłnosć trochu přiběrała

Dienstag, 01. August 2017 geschrieben von:

Budyšin (CK/SN). W juliju bě we wuchodnej Sakskej 20 541 bjezdźěłnych, 36 wjace hač w juniju a 2 654 mjenje hač loni w samsnym měsacu. Snadnuški přirost ličby bjezdźěłnych Ilonu Winge-Paul njestarosći. Kaž jednaćelka za operatiwny wobłuk Budyskeje agentury za dźěło dźensa dopołdnja rozłoži, korjeni to kaž hižo minjene lěta předewšěm w tym, zo přizjewjeja so młodźi ludźo po zakónčenju šulskeho abo powołanskeho wukubłanja najprjedy raz bjezdźěłni. „Naš zaměr je, fachowcow po móžnosći prawje bórze na regionalnych dźěłowych wikach integrować“, rjekny wona při předstajenju aktualnych datow hornjołužiskich dźěłowych wikow.

Kwota bjezdźěłnosće wučinješe kónc julija 7,3 procenty. Chabłała je wona dale mjez 3,7 procentami we wobłuku Radeberg, 4,2 procentomaj w Kamjencu a 12,4 procentami w Zhorjelcu.

Dźěłowa agentura móže tuchwilu přizjewjenych 4 532 socialneho zawěsćenja winowatych městnow posrědkować, štyri wjace hač před měsacom.

Čerwjene rubiško

Dienstag, 01. August 2017 geschrieben von:
Stajnje mjez třećinu a štwórćinu chabła podźěl wobłuka dalšich hospodarskich posłužbow na socialneho zawěsćenja winowatych dźěłowych městnach, kotrež je dźěłodawarski serwis Budyskeje agentury minjene štwórć lěta w firmach akwirěrował. Tež dźensa dźěłowa agentura zwěsći, zo maja w dalšich hospodarskich posłužbach znowa nowe městna k dispoziciji. Dźělne dźěło je potajkim dale kruće zapřijate, dokelž zdawa so firmownikam tajki raz přistajenja přeco hišće lukratiwny. K lětušim wólbam zwjazkoweho sejmja industrijne dźěłarnistwo twar-agrar-wobswět wuchodneje Sakskeje strony namołwja, zo bychu jasne koncepty přećiwo njewurunanosći na dźěłowych wikach předpołožili. Dźělne dźěło je dźěłarnistwu čerwjene rubiško. Wšako je tajke hakle tele dny jako atypiske porokowało a sej změny w zajimje potrjechenych dźěłopřijimarjow žadało. Axel Arlt

W Hornjej Łužicy su mnohe dźěłowe městna njewobsadźene. Přiwšěm je wjac bjezdźěłnych. Tónle zjaw pak je po słowach Budyskeje dźěłoweje agentury normalny.

Na rěpikowym polu njedaloko Hornjeje Hórki stej so wčera připołdnju syčomłóćawa a traktor kompletnej wupaliłoj. Sobudźěłaćerjo ratarskeho zawoda woheń wuhladachu, nawróćiwši so z připołdnišeje přestawki. Cyłkownje 44 wohnjowych wobornikow z Hornjeho kraja je płomjenja hašało. Škodu trochuja na něhdźe 500 000 eurow. Policija přičiny přepytuje. Foto: Jens Kaczmarek

Anzeige