Zaměrne dźěło na nowej „kótwicy“

Dienstag, 15. September 2020 geschrieben von:

Miłoraz (SN/BŠe). Nimale 18 měsacow po tym zo bu přesydlenske zrěčenje za wjes Miłoraz podpisane, móža po wotkryću ležownosćow na nowym stejnišću twarić započeć. Přestrjeń je něhdźe 14 hektarow wulka. Minjene dny je přede­wzaće Łužiska energija a milinarnje (LEAG) w starym Miłorazu hižo prěnje chěže spotorhać dało. „Naš zaměr je staru wjes dołhož móžno zachować a při­wšěm w nowym Miłorazu nowu kótwicu wuhotować“, zdźěli manager LEAG za in­frastrukturu Martin Klausch powěsćerni dpa. Po wobzamknjenju Slepjan­skeje gmejny dóstanu tež dróhi znate mjena. Tohorunja zarjaduja na nowym stejnišću dom za zetkawanje, pomnik, kupjel a sportnišćo – poprawom wšo to, štož maja wobydlerjo tež w starym Mi­łorazu.

Młodych wučomnikow tradicionelnje wuwjazali

Dienstag, 15. September 2020 geschrieben von:

Budyšin (CS/SN). Cyłkownje 87 młodo­st­nych je minjenu sobotu po tři lěta trajacym wukubłanju na pjekarja, rěznika, fachoweho předawarja mjenowaneju wobłukow, mulerja, třěchikryjerja, ćěslu, blidarja, molerja a lakěrarja, frizera abo běrowoweho překupca we wobłuku Budyskeje rjemjeslniskeje komory swoje wuswědčenje dóstało. Wuwjazali su wučomnikow tónkróć w Budyskim Němsko-Serbskim ludowym dźiwadle.

Njepředajomny lěs blisko jamy tema wustajeńcy

Montag, 14. September 2020 geschrieben von:

Drježdźany (SN/BŠe). Wobswětowa syć Zelena liga so zaměrnje za to zasadźa, wohrožene wsy a přirodu rozpřestrěwacych brunicowych jamow dla zachować. K tomu su iniciatorojo minjeny tydźeń w Drježdźanskej cyrkwi nadźije fotowu přehladku z mjenom „Njepředajomny“ wotewrěli, při čimž dźe wo wohroženy lěs blisko Wochožanskeje jamy. „Lěsna ležownosć, kotruž wobsedźerjo koncernej Łužiska energija a milinarnje (LEAG) předać nochcedźa, smě Choćebuska wobswětowa skupina hač do lěta 2037 wotnajeć“, rozłoži Renej Šuster ze Zele­neje ligi pozadk přehladki.

Přestrjeń, wo kotrejž je rěč, leži na polu čisło jedyn Wochožanskeje jamy. Zo móhli areal wotbagrować, ma LEAG wotpowědne jednanje zahajić, za kotrež dybjeli wobsedźerjo lěs předać. „Dobrowólnje lěs njewotedam, zo bychu jón zničili. Hač je wuswojenje za brunicowe jamy hišće zwoprawdźomne, to maja zarjady a sudnistwa rozsudźić“, Šuster připowědźi. „Zachowany lěs pak by pomhał susodne wsy před haru a prochom jamy škitać.“

Sćěhi za ratarjow a wobydlerjow

Montag, 14. September 2020 geschrieben von:

Swinjaca mrětwa móhła so tež w Hornjej Łužicy wupřestrěć

Guben/Budyšin (SN/BŠe). Poprawom zdaše so afriska swinjaca mrětwa hišće daloko preč być. Z minjeny tydźeń wozjewjenym padom namakaneho mortweho dźiwjeho swinjeća w braniborskim wo­krjesu Sprjewja-Nysa je so wšitko změniło. Wosebje ratarske zawody so najnowšeho wuwića dla chětro starosća.

Kaž zwjazkowa ratarska ministerka Julia Klöckner (CDU) minjeny štwórtk zdźěli, jedna so wo prěnje swinjo, kotrež je w Němskej na mrětwu zahinyło. Našli běchu mortwe skoćo na wotžnjatym polu něhdźe 50 kilometrow wot sakskeje mjezy sewjernje Gubina. Kadawer bě hižo chětro přetłaty. Braniborski krizowy stab je hnydomne naprawy zahajił. Tak připrawichu tři do štyri kilometry wokoło namakanišća elektriski płót. Fachowcy nětko w kónčinje intensiwnje za dalšimi padami slědźa, zo bychu infekcisku přestrjeń dokładnje zwěsćili.

Warnowanski stawk pola pósta

Donnerstag, 10. September 2020 geschrieben von:

Budyšin (SN/at). Wjace hač sto listo­nošow a listonoškow pósta je so dźensa dopołdnja na naměsće před Němsko-Serbskim ludowym dźiwadłom w Budyšinje na warnowanskim stawku wob­dźěliło. W rozdźělowanskim centrumje Ottendorf-Okrilla bě jich w nocy 70, zdźěli posłužbowe dźěłarnistwo ver.di na naprašowanje. Pozadk stawka je přiwótřeny tarifowy konflikt. „Koncern Němski póst je w koronakrizy derje zasłužił. Zo pak při­stajenym w běžnych tarifowych jednanjach jenož połdra procenta wjace mzdy přicpěwa, jich njesměrnje rozhorja“, rjekny Jens Göbler, krajny fachowy sekretar ver.di Drježdźany/wuchodna Sakska našemu wječornikej.

Hižo w 2 hodź. započa so warnowanski stawk w Drježdźanskim rozdźělowanskim centrumje. Tež w Kamjenicy a Zwickauwje su póstownicy dźěło złožili. Kaž ver.di Sakskeje trochuje, budźe jich w běhu dnja wjace hač 800 stawkowacych.

Dźěłarnistwo ver.di žada sej w tari­fowych jednanjach 5,5 procentow wjace mzdy za nimale 140 000 přistajenych po cy­łym Zwjazku. Přichodne jednanske koło budźe 21. a 22. septembra.

Měšćanosta nowu nawodnicu witał

Donnerstag, 10. September 2020 geschrieben von:
Złokomorowski měšćanosta Andreas Fredrich (SPD) wita tule nowu nawodnicu turistiskeju informacijow w Złym Komorowje a we Wojerecach Danu Kersten, kotraž wot 1. septembra w zastojnstwje skutkuje. Do toho dźěłaše wona předewšěm ­digitalnje a poradźowaše ludźi na serwisowych stronach Check24 abo Arvato. Z jeje nazhonjenjow matej turistiskej informaciji přichodnje čerpać. Jednaćelka turisti­skeho zwjazka Łužiska jězorina Kathrin Winkler nadźija so synergijowych efektow. Kersten so nětko ze strukturami na městnje zeznajomja a nawjazuje zwiski k turistikarjam, hosćencarjam a přenajerjam. Foto: Łužiska jězorina/Katja Wersch

Na „misiji2038“ so wobdźělić

Mittwoch, 09. September 2020 geschrieben von:

Młodostni maja často dobre ideje, móža so derje do temow zadźěłać a wo nich rozmyslować. Tohodla je Němska dźěćaca a młodźinska załožba (DKJS) projekt pod hesłom „Misija2038“ załožiła, we wo­błuku kotrejež so młodostni z přichodom Łužicy zaběraja.

Budyšin (SN/BŠe). „Misija2038 – Twój přichod we Łužicy“ je tema projekta DKJS, kotraž młodostnych hižo dlěje zabě­ra. Planowanu młodźinsku konfe­rencu w měrcu dyrbjachu iniciatorojo korony dla wotprajić. Na to so rozsudźichu digitalne konferency poskićeć, wšako z přizjewjenjow na prěnje zarjadowanje začuwachu, zo je tema jara wažna. W apry­lu a meji witachu młodostnych w starobje 14 do 24 lět. Kaž z rozmołwow wuchadźa, přeja sej woni lěpši image regio­na, a to předewšěm z pomocu turi­stiskeho wobłuka. Bjezposrědnjej mjezy k Pólskej a Čěskej stej lěpšina, z kotrejež hodźi so čerpać.

Łužiskaj młodostnaj chcetaj ze swójskim předewzaćom šulerjow a zawody podpěrać

Carlo Nitzsche a Maximilian ­Buder chcetaj ze swójskej internetnej platformu „Work for Teenager“ šulerjow a předewzaća zaho­rić a podpěrać. Młodostnaj mataj jasne předstawy, kak měła so firma wuwić. Za swoju ideju dóstanjetaj spěchowanske srědki ze wšelakich programow.

Přewidna, derje wužiwajomna, zaměrna a aktualna měła wona być. Inter­netna platforma „Work for Teenager“ (www.workforteenager.de) ma šulerjam přichodnje prózdninske abo kóncty­dźenske dźěło sposrědkować. Dale měli tam młodostni pokiwy za poradźowanje abo požadanje dóstać. Firmy pak móža na mjenowanej webstronje swój profil a swoje wobsahi předstajić.

„Kóžda ideja nastawa z někajkeho proble­ma. Hdyž jón rozrisaš, budźiš kreatiwitu“, měnitaj 18lětnaj Carlo Nitzsche z Ćiska a Maxilian Buder z Čorneho Chołmca, hdyž na přichodne­ zhromadne předewzaće „Work for Teenager“ zhladujetaj. Za ideju so jara horitaj a krok po kro­ku nětko internetnu platformu zesta­jataj.

W stadionje wopisma přepodali

Montag, 07. September 2020 geschrieben von:
Koronapandemija žada sej wosebite rozrisanja. Tak bě so Choćebuska rjemjeslniska komora rozsudźiła, swój 29. dźeń mištrow minjeny štwórtk w Stadionje přećelstwa FC Energije Choćebuz přewjesć. Tam je 125 młodych fachowcow – 85 z nich ze slěbornym wopismom – swoje mišterske wukubłanje zakónčiło. 41 wučomnikow-rjemjeslnikow dósta swoje wuswědčenje. Najebać koronu wotmě so zarjadowanje w swjatočnym ramiku. We wulkim stadionje dźě bě zarjadowarjam móžno dosć wulki wotstawk mjez něhdźe 600 přitomnymi dodźeržeć. Foto: Michael Helbig

Sobudźěłaćerjo Miłočanskeho agrarneho předewzaća nastajichu minjene dny něhdźe 25 žerdźow za domjace rubježne ptaki. Tajke skića ptakam móžnosć, na nich sedźo na myše łakać. Na wjacorych zahonach běchu ratarjo po žnjach žita hnydom ­na šćernišću mjezypłody wusyli. Dokelž słoma w zawodźe hižo trěbna njeje, wosta wona rozsykana ležo, a tak nastachu ­idealne wuměnjenja za rozmnoženje myšow. Z pomocu ptakow spytaja tomu zadźěwać. Foto: Hubert Šwejda

Serbska debata

Neuheiten LND