Prěnju namołwu móža wudać

Mittwoch, 09. September 2015 geschrieben von:

Rakecy (SN/JK). Zdźělenka wo přizwolenju srědkow za prěni schodźenk spěchowanja je dźensa dóšła. To zdźěli regionalny manager Leaderoweje kónčiny Hornjołužiska hola a haty Rudolf Rychtar na naprašowanje Serbskich Nowin. Ručež móžno chcedźa ju na internetnej stronje wozjewić a zdobom wšitkim, kotřiž su dotal projekty zapodali, zdźělić, zo smědźa spěchowansku próstwu stajić. Wotpowědna namołwa k přizjewjenju slěduje. Hač do kónca oktobra maja so próstwy za prěnju spěchowansku namołwu w regionalnym běrowje w Rakecach zapodać. Rozsudźacy gremij potom wo přidźělenju srědkow na swojim zetkanju 30. nowembra rozsudźi.

Za prěnju spěchowansku dobu je 850 000 eurow k dispoziciji. Z nimi maja so projekty k wuwiću a zachowanju wjesnych strukturow a wosebitosćow w dwurěčnym regionje Hornjeje Łužicy podpěrać. Projekty, kotrež so w prěnim kole njewobkedźbuja, hodźa so po přichodnej namołwje znowa zapodać.

Z komisiju rěčeć

Dienstag, 08. September 2015 geschrieben von:

Stara Darbnja/Brüssel (SN). Ze składowanjom błóta ze železowym hydroksidom w Starodarbnjanskim jězoru budźe so nětko tež Europska unija zaběrać.

Zastupjerjo wobydlerskeje iniciatiwy Starodarbnjanski jězor a zapósłancy Krajneho sejma Braniborskeje Dieter Dombrowski (CDU), Roswitha Schier (CDU) a Heide Schinowsky (Zeleni) chcedźa so jutře w Brüsselu z generalnej direkciju Europskeje unije za wobswět wo problemje błóta rozmołwjeć. Na naprašowanje frakcije CDU w braniborskim sejmje w aprylu je komisija EU zdźěliła, zo ma starosće wobydlerjow hladajo na wuskutki składowanja železoweho hydroksida w Starodarbnjanskim jězoru za woprawnjene. W Brüsselu chcedźa wotmołwy namakać na prašenja wobydlerjow, kotrež su w katalogu zjimali. Z rozmołwu ze zamołwitymi EU spjelni Dieter Dombrowski přilubjenje z měrca, naležnosć wobydlerskeje iniciatiwy komisiji EU přednjesć.

Přećiwo planowanemu składowanju błóta w jězoru hiba so hižo dlěši čas protest. Peticiju wobydlerskeje iniciatiwy je mjeztym 6 000 podpěrarjow podpisało.

Łužicu dotal wuspěšnje saněrowali

Montag, 07. September 2015 geschrieben von:

Zły Komorow (SN/JK). Mócnje klinčeše minjeny pjatk hórniska hymna po swjedźenskim stanje w Złym Komorowje. Znamjo to, zo bě so swjatočny dźěl zarjadowanje składnostnje 20lětneho wobstaća Łužiskeje a srjedźoněmskeje towaršnosće hórnistwoweho zarjadnistwa (LMBV) skónčił a zawodny swjedźeń nimale 700 přistajenych předewzaća zahajił.

W swojich postrownych słowach hódnoćachu do toho ministerskaj prezidentaj Braniborskeje Dietmar Woidke (SPD) a Sakskeje Stanisław Tilich (CDU) kaž tež zastupjer zwjazkoweho knježerstwa, parlamentariski statny sekretar Jens Spahn (CDU) wuspěchi wuchodoněmskeho předewzaća za rekultiwowanje a saněrowanje hórniskeje naslědneje krajiny.

„We Łužicy je so telko na dobro kraja změniło, wo čimž njejsmy spočatnje žane prawe předstawy měli“, wopisowaše Dietmar Woidke změny we Łužicy. Wón wupraji so za dalše wuwiće brunicoweho hórnistwa a wuzběhny, zo wostanje energijowe hospodarstwo dale žro Łužicy. Wšo druhe by po jeho słowach wopak było. Za to­ žněješe wón sylny přiklesk a mócne přihłosowanje přitomnych.

Młodaj Serbaj nětko rjemjeslnikaj

Montag, 07. September 2015 geschrieben von:

Budyšin (SN/MiR). Mjez 59 wučomnikami – rěznikami, pjekarjemi, předawarkami, blidarjemi, frizerami, mulerjemi, běrowowymi překupcami kaž tež molerjemi a lakěrarjemi –, kotřiž su lětsa swoje rjemjeslniske pruwowanje wuspěšnje wobstali, staj młodaj Serbaj. Marcel Kral z Ralbic a Florian Šołta z Hórkow staj nětko moler a lakěrar. Před třomi lětami, jako běštaj wukubłanje započałoj, bě jich 18 wučomnikow. Sobotu pak steještaj jako jeničkaj w swojim powołanju z kónčnym wopismom na jewišću wulkeje žurle w Budyskim Dźiwadle na hrodźe. Druzy běchu wukubłanje přetorhnyli abo njeběchu pruwowanje wobstali. Młodaj Serbaj staj mjeztym w swojimaj wukubłanskimaj zawodomaj přistajenaj jako moler a lakěrar.

Wjacore pućiki wjedu na 499 metrow wysoki Wulki Pichow. Najsławniša je pućowanska šćežka Němskeje jednoty, kotraž wjedźe 1 080 kilometrow wot Zhorjelca hač do Aachena tež po tutej horje. Hač ma rozsud Němskeho pućowanskeho zwjazka z powěsću wo nastaću mjena hory činić? Jako w dawnych časach pralěs horu pokrywaše, zasydlichu so w dole Wendojo. Jednoho dnja zalězechu někotři z nich na wjeršk hory. Prěni, kiž bě nahi dypk docpěł, zawoła: „Běch jow!“ Tónle wukřik je horje mjeno dał, steji na tafli.

Na horje samej je wšitko, štož słyšiš, ničo – nimo fifolenja ptačkow. Runje to wšak wabi mějićelku tamnišeje hórskeje bawdy Annett Grundmann wšědnje na Wulkim Pichowje přebywać. „Měr je to, štož mje cyłe žiwjenje přewodźa“, Annett Grundmann potwjerdźa. Čas žiwjenja wona na horje bydli a nochce nihdźe druhdźe być. Hižo jeje staršej běštaj wot lěta 1965 hač do 2003 hosćenc wobhospodariłoj. Po smjerći nana přewza jón dźowka Annett. Mjeztym 49lětna steji dźensa na čole małeho mustwa.

Bjezdźěłnosć dale woteběrała

Dienstag, 01. September 2015 geschrieben von:

Budyšin (CK/SN). W awgusće bě w Hornjej Łužicy 26 476 bjezdźěłnych. To je 264 mjenje hač w juliju a dohromady 1 771 mjenje hač před lětom. W nimale wšěch wotnožkach Budyskeje agentury za dźěło woteběraše ličba tych, kotřiž su bjez dźěłoweho městna registrowani. Wuwzaće je Kamjenska, hdźež bě so ličba snadnušce wo pjeć wosobow powjetšiła.

Bjezdźěłnosć je po słowach Thomasa Berndta słabšo woteběrała hač w předměsacach. To pak je typiske za měsac awgust, zwěsći dźensa šef Budyskeje agentury za dźěło. Jedna přičina je, zo njejsu wšitcy wučomnicy po zakónčenju zawodneho abo šulskeho wukubłanja hnydom dźěłowe městno našli.

Kwota bjezdźěłnosće wučinja 9,1 procent­. Wona chabła mjez 5,0 procentami w Radebergu a 5,2 w Kamjencu kaž tež 13,7 procentami w Zhorjelcu.

Dźěłodawarjo su posrědkowarjam w dźěłodawarskim serwisu minjeny měsac 1 207 nowych dźěłowych městnow přizjewili. Naprašowanje za personalom wosta dale na wysokim niwowje.

Hórska korčma na Oybinje w Žitawskich horinach je we wjacorych nastupanjach něšto cyle wosebite. Sprěnja móžeš ju jenož pěši docpěć, wšako słuša wona k daloko znatej pomnikoškitanej hórskej klóšterskej ruinje. Z teje přičiny wšak maš při zachodźe twjerdźizny tež zastup płaćić. A jeje wotewrjenske časy płaća zdobom za korčmu.

Pod hesłom „sej tak prawje lubić dać“ ma so jeje wobhospodarjer Hans-Jürgen Brüx po tym, kak běchu ći rubježni ryćerjo něhdy žiwi byli. Woni njeběchu so jenož po dobytych bojach prawdźepodobnje tak prawje do žranja dali. Tak bě to samo hižo w 14. lětstotku, jako na Oybinje twjerdźiznu natwarichu. Po słowach Brüxa měli sej tuž tež dźensa popřeć, štož bě něhdyšim rjekam lube: za wulkim dubowym blidom sedźo so tak porjadnje nasyćić, kaž to jeno z filmow wo srjedźowěku znajemy.

Dokumentacija změny Łužicy wotewrjena

Dienstag, 25. August 2015 geschrieben von:

Wčera je tradiciske towarstwo „Čorna Pumpa“ přepodało přehladku wo 60lětnym wuwiću kombinata a industrijoweho parka Čorna Pumpa. Tak dokumentuja wuwiće energijoweho regiona.

Čorna Pumpa (JoS/SN). Na wulkej žurli centralneje kuchnje maja hosćo a přistajeni Čornopumpskeho industrijoweho parka wot wčerawšeho móžnosć, sej wobhladać wustajeńcu „60 lět industrijowy park Čorna Pumpa“.

Wukubłuja we wysokej kwaliće

Montag, 24. August 2015 geschrieben von:

Štyrjom młodym ludźom su minjeny pjatk na Grodkowskim hrodźe wuswědčenja wobstatych pruwowanjow po powołanskim wukubłanju w papjercowni w Čornej Pumpje přepodali. Runočasnje dósta wosom nowych wučomnikow swoje zrěčenje.

Grodk (JoS/SN). Runje tak tradicionalne kaž swjatočne zarjadowanje k rozžohnowanju wučomnikow papjercownje Hamburger Rieger tzwr a Dunapack wotmě so minjeny pjatk na Grodkowskim hrodźe. Přišli běchu tohorunja jich wukubłarjo a starši kaž tež ći nowi, kotřiž su dźensa swoje wukubłanje zahajili. Personalna nawodnica za wšitke wotnožki Hamburger Rieger dr. Doreen Wächtler rjekny, zo su fachowe kmanosće dorosta prašane a zo je dobre wukubłanje powołanski fundament kóždeho čłowjeka. „Poskićamy jara naročne wukubłanje dźakowano angažowanym wukubłarjam a dźakowano partneram towaršnosće wu- a dalekubłanja (GAF) we Wojerecach a Němskej železnicy w Choćebuzu. Zo móhli we wubědźowanju wobstać, trjebamy młodych fachowcow. Za přichod su jim wšitke durje wotewrjene.“

A zaso mjenje

Montag, 24. August 2015 geschrieben von:

Berlin/Choćebuz (SN). Energijoweje změny dla chcedźa milinowe koncerny pječa wjace konwencionalnych milinarnjow wotpinyć. Po najnowšich informacijach je rěč wo 57 a tak wo dźewjeć wjace hač hišće spočatk lěta.

Přičina hasnjenja milinarnjow je, zo njehodźa so hižo wuskutkow energijoweje změny dla rentabelnje wužiwać. Hač su łužiske milinarnje wot toho po­trjechene, njeje nam koncern Vattenfall zdźělić móhł. Rěčało je so jónu wo Janšojskej milinarni, kotraž móhła jako rezerwa za zastaranje z milinu słužić. Wopodstatnjene pak to njeje.

Němski zwjazk energijoweho a wodoweho hospodarstwa wotšaltowanje starosćiwje wobhladuje a warnuje před problemami zastaranja z milinu. Jeli so naprawa zwoprawdźi, powjedźe to k ćežam za wobstejace milinarnje, a nowotwary milinarnjow budu wjace hač wakantne.

W zwisku z hasnjenjom milinarnjow šěri so ličba: Kóšty energijoweje změny we wobjimje 28 miliardow eurow drje nabrěmjenja přetrjebarjam miliny, měni Institut němskeho hospodarstwa (IW) w Kölnje.

Anzeige

  • Tež lětsa je Domowina na swjedźenskim zarjadowanju wjacorym čestnohamtsce skutkowacym Serbam Myta Domowiny, Čestne znamješko Domowny a tohorunja čestne čłonstwo třěšneho zwjazka spožčiła.  Mjez wuznamjenjenymi běchu zastupjerjo wjacorych generacijow.