Statny sekretar w ministerstwje za wědomosć, slědźenje a kulturu (MWFK) Braniborskeje a zamołwity kraja za naležnosće Serbow Martin Gorholt a jeho sakski kolega, statny sekretar w ministerstwje za wědomosć a wuměłstwo (SMWK) Uwe Gaul (wobaj SPD), wopytaštaj zańdźeny pjatk Institut za sorabistiku Lipšćanskeje uniwersity.
Lipsk (SN(MiR). Jednaćelski direktor instituta prof. dr. Edward Wornar rozłoži hosćom, ke kotrymž słušeštaj tež referent Martina Gorholta Měto Nowak a studijny dekan prof. dr. Beat Siebenhaar, skutkowanje wuwučowanskeje a wědomostneje institucije. Přitomni běchu tohorunja wšitcy sobudźěłaćerjo instituta. „Mje je wosebje zajimowało, kak so wukubłanje wučerjow wotměwa“, rjekny Martin Gorholt na naprašowanje SN, „dale smy so z prašenjom zaběrali, kak młodostnych k tomu pohnuwać, zo so za studij wučerstwa z ćežišćom serbšćina rozsudźa.“ Braniborska chce nětko pruwować, złožujo so na tuchwilne ličby serbskorěčneho kubłanja w dźěćacych dnjowych přebywanišćach a šulach, kelko wučerjow serbšćiny je trěbnych.