Volleyball na Serbskim gymnaziju Budyšin
Minjeny štwórtk je so sportowa hala Serbskeho šulskeho a zetkawanskeho centruma Budyšin krótko do 14 hodź. pjelniła. Šulerjo wjacorych lětnikow čakachu na ławkach sedźo na mjeztym sedmy volleyballowy duel mjez cyłkomaj wučerkow/referendarkow a maturantkow. Wosebje wulki bě fanowy blok dwanatkarjow. Wón tworješe perfektny ramik wubědźowanja. Dotal je stajnje młódša generacija dobyła a tež lětsa tomu tak bě. Z 25:7, 25:17 a 25:9 su šulerki wšitke tři sadźby za sebje rozsudźili. Wulki kompliment słuša našim pedagogowkam, kotrež su bjez treninga z wulkim zasadźenjom wojowali, a šulerkam za fairne hraće. W jich rjadach zasadźene běchu volleyballistki, kiž su w januaru we wuchodosakskim finalu gymnazijow w swojej starobnej klasy slěbro dobyli. Tak běštej wjeselo a strowa atmosfera hač do kónca zaručenej.