Hortowi šulerjo ze Žylowa su Witaj-dźěći překwapili

Choćebuz/Žylow (HA/SN). Ptači kwas je nimo, přiwšěm je dohromady něhdźe 380 dźěći a dorosćenych w Choćebuzu tónle w Delnjej Łužicy jara woblubowany serbski nałožk hišće raz dožiwiło. Město Choćebuz bě zańdźeny pjatk a štwórtk dopołdnja přeprosyło na wosebity ptači kwas we wulkej žurli měšćanskeho domu. Wyši měšćanosta Holger Kelch (CDU) zarjadowanje wysoko hódnoćeše – předewšěm pak dźěći ze Žylowskeho Witaj­-horta „Njemjerica“, kotrež běchu hłowni akterojo tohole krucha w delnjoserbskej rěči. „To je jara dobra wěc, hdyž w Žylowskej šuli wjele činja, zo by so serbska rěč spěchowała“, politikar zwurazni.