Wučerjo-přidružnicy maja so wjacore lěta na wysokej šuli dale kubłać

Budyšin (SN/MiR). Přistajenje nowych wučerjow za tele šulske połlěto njeje nimo, hdyž so přizjewjenski čas spočatk februara kónči. Někotři wučerjo su pozdźišo na šulach w zamołwitosći Budyskeho regionalneho zarjada Sakskeje kubłanskeje agentury (SBAB) dźěłać započeli. „Přičiny su te, zo njemóžachu wšitcy zajimcy swoje dotalne dźěłowe městno k zahajenju druheho šulskeho połlěta wopušćić“, zdźěli na naprašowanje SN Budyska rěčnica SBAB Angela Ruscher. Docyła měješe zarjad 101 połnočasny ekwiwalent. Za wobsadźenje tychle městnow pak trjeba wjace wosobow. Wšako njedźěłaja wšitcy wučerjo z połnej ličbu hodźin. Tuchwilu předewšěm w powołanskošulskim wobłuku hišće wučerjo pobrachuja. Městna na zakładnych, wyšich a spěchowanskich šulach kaž tež na gymnazijach su zwjetša wobsadźene.