Nastork do wšědneho dźěła

Montag, 18. April 2016
Artikel bewerten
(0 Stimmen)

Fachowa konferenca k zažnemu wuměłskemu kubłanju dźěći

Zhorjelc (AK/SN). Dźěći dyrbjeli nimo zakładneho kubłanja hižo jara zahe tež wuměłske spěchowanje dožiwić. „Kreatiwne procesy su procesy myslenja. Wuměłstwo słuša bytostnje ke kubłanju“, rjekny Nicole Blana, docentka w studijnym směrje dźěćaca pedagogika Wysokeje šule Žitawa/Zhorjelc na mjeztym 5. fachowej konferency kulturneho ruma Hornja Łužica/Delnja Šleska minjenu sobotu w Zhorjelcu. Hłowne hesło konferency bě „Wuměłske kubłanje – nawuknjenje wuměłskich kmanosćow, wuměłskeho zwobraznjenja a wuměłskeho myslenja“. Cyłkownje 55 pedagogow, kubłarki, wučerki, hladarki dźěći, studenća a čestnohamtscy sobudźěłaćerjo dźěćacych a kulturnych zarjadnišćow Zhorjelskeho a Budyskeho wokrjesa, so wobdźěli. Na konferencu přeprosyłoj běštaj kulturny rum Hornja Łužica/Delnja Šleska a Žitawsko-Zhorjelska wysoka šula.

Wjacore rozprawy wěnowachu so prěnim nazhonjenjam z projektow „Pěstowarnja pyta wuměłcow – wuměłcy pytaja pěstowarnju“. Dźěłarnički zaběrachu so z temu „Wobdźěłanje drjewa – twar małych hudźbnych instrumentow“, „Wuhotowanje fotow a wobrazow“, „Dźěło z přirodnymi materialijemi“, „Kolaže a plastiske tworjenje“ kaž tež molowanje z dźěćimi. „Konferenca nawjazuje na minjene seminary. Chcemy kubłarkam z přednoškami nastorki za wšědne dźěło posrědkować. Tule móža nazhonjenja zběrać“, rjekny Ulf Großmann, koordinator kulturneho ruma Hornja Łužica – Delnja Šleska za kulturne kubłanje.

Na druhim boku měješe zeńdźenje kubłarki pohonjeć, w dźěłarničkach swójsku iniciatiwu přewzać a praktiske nazhonjenja hromadźić. Großmann chwaleše sej w tym zwisku wulku ličbu wobdźělnikow a wysoku kwalitu fachowych přednoškow a dźěłarničkow.

Projekt „Pěstowarnja pyta wuměłcow – wuměłcy pytaja pěstowarnju“ běchu lěta 2015 w jědnaće pěstowarnjach přewjedli. Lětsa ma so předewzaće dale wjesć. Tuchwilu maja 21 přizjewjenjow za cyłkownje dwanaće projektow, Großmann zdźěli. Kulturny rum chce přichodny čas rozsudźić, hdźe so projekty přewjedu. Zapřijeć chcedźa tež Serbske šulske towarstwo a Serbski ludowy ansambl w Budyšinje. Tam ma so 29. oktobra přichodny fachowy seminar wotměć.

Veröffentlicht in Kubłanje
Bitte anmelden, um einen Kommentar zu posten

Anzeige