Maja lětsa wjace chwile so mjez sobu zeznać

Dienstag, 26. April 2016
Artikel bewerten
(0 Stimmen)
Marine Gloaguen a Křesćan Korjeńk (prědku) staj dźensa z bretonskimi a Worklečanskimi šulerjemi klóšter Marijinu hwězdu wopytałoj.  Foto: SN/Maćij Bulank Marine Gloaguen a Křesćan Korjeńk (prědku) staj dźensa z bretonskimi a Worklečanskimi šulerjemi klóšter Marijinu hwězdu wopytałoj. Foto: SN/Maćij Bulank

Worklecy (SN/MiR). 32 šulerjow 9. lětnika Collège Diwan Jakez Riou z Quimpera, bretonsce Kemper, je wot zańdźeneho štwórtka, z hosćom Worklečanskeje wyšeje šule „Michał Hórnik“ a Budyskeho Serbskeho gymnazija. Šulerjo a wučerjo we Worklecach su sej nimo wuprawow do Drježdźan a Berlina wosebite poskitki wumyslili. Nawoda Worklečanskeje šule Křesćan Korjeńk praji: „Nam je wažne, zo zeznajomjeja so naši hosćo z wuwučowanjom na našej šuli. Dźensa rano su tuž dwurěčnu wučbu w předmjeće biologija kaž tež wuměłske kubłanje sćěhowali.“ Dopołdnja přebywachu bretonscy a serbscy šulerjo zhromadnje w klóštrje Marijinej hwězdźe w Pančicach-Kukowje. W tamnišej klóšterskej zahrodźe zaběrachu so ze strowym zežiwjenjom a pobychu w dźěłarni za zbrašenych. Wučer na wuměnku Pětr Korjeńk zbliži jim stawizny klóštra.

Młodźi Bretonojo přebywaja cyły tydźeń w hóstnych swójbach. Čornakecy w Hrańcy maja Arthura Calveza za hosća. „Minjeny kónc tydźenja smy, serbscy a bretonscy młodostni w Kašecach, kopańcu hrali“, powěda syn swójby Jurij. A Isaak Zelnak z Kamjenca dodawa: „Smy z našimaj hosćomaj w Drježdźanach a Lubnjowje byli.“ Nětko wjesela so wonaj a dalši Worklečanscy šulerjo hižo na přebytk klětu w Bretonskej. Wučerka na tamnišim kubłanišću Marine Gloaguen mjeztym pjaty króć skupinu šulerjow do Łužicy přewodźa. „Lětsa njeje program nakopjeny z terminami. Mamy tuž wjace chwile so mjez sobu zeznać“, so wona wjeseli.

Veröffentlicht in Kubłanje
Bitte anmelden, um einen Kommentar zu posten

Anzeige