Sokoł Ralbicy/Hórki – Póst Budyšin 0:4 (0:1)

Zestawa domjacych: K. Gloxyn – Matka (81. Ričl), Schultz, Wałda (46. Materna), T. Bejma – Rawš, D. Gloxyn, Nuk, Hrjehor, Rachel (40. B. Bejma) – M. Kurjat

Jako njedźelu popołdnju Denny Gloxyn tři mjeńšiny do kónca ze šěsnaće metrow na wrota třěli a hóstny wrotar wulkotnje pjasćowaše, notěrowaše 89 přihladowarjow w Stadionje přećelstwa prěnju prawu šansu domjacych. W tutym wokomiku Budyšenjo w Delanach hižo ze 4:0 nawjedowachu, štož běchu sej zasłužili.

Kaž hižo w minjenymaj hromaj doma přećiwo Biskopicam II (1:2) a w Kulowje (0:3) bě w rjadach Sokoła znowa ofensiwa najsłabši dźěl mustwa. Zranjenaj Dawid Šołta a Pětr Domaška Ralbičanam wokomiknje chětro falujetaj. Tuž přińdźe dwutydźenska přestawka za hosćićelow runje prawje, wšako hłowy wčera po hrě pola wšěch akterow chětro wisachu.

Módro-běli Kulow – Sokoł Ralbicy/Hórki 3:0 (3:0)

Zestawa Ralbic: Chr. Gloxyn – Matka (70. Jakubaš), Rachel, Schultz, Wałda, Hrjehor (57. Materna), Wowčerk, D. Gloxyn, Nuk (76. Kunze), Kurjat (76. Kocor), T. Bejma

Zestawa Kulowa: Čórlich – Žur, Krawc, B. Korch, Wehlan (73. Lohan), Bulang (78. Woko), Brückner, Bergmann, Prietzel (73. Koplanski), Thomas (60. Wittek)

SJ Chrósćicy– ST Drohotka Ramnow 2:1 (0:0)

Zestawa: Králíček – L. Zahrodnik, Sentiwan, M. Zahrodnik, Matješk, Mützner (75. Zynda), Hawš (60. Kreuz), Młynk, Krawc, Bogusz

Na pjatym hrajnym dnju přichwatachu hrajerjo z njedalokeho Ramnowa do Chrósćic. Hladajo na situaciju w tabulce bě jasne, zo chcedźa Chróšćenjo dalše dypki hromadźić a swoju dobru poziciju w prědnim dźělu tabulki skrućić.

Wobě mustwje namakaštej so ćežko do hry, štož so wosebje na mnohich zmylkach při přihrawkach pokaza. Tuž wotmě so hra mjez šěsnatkomaj a přihladowarjo mnohe dobre šansy njewidźachu. Po něčim domjacy hru na so wzachu a sej prěnje šansy wuhrachu. Tola distancowe třělwy Oskara Hawša a Pawla Krawca wrota misnychu. Tohorunja njeběchu flanki precizne dosć, zo bychu hóstnych zakitowarjow pod wulke ćeže stajeli. Tola tež Ramnow prawu ideju njewuwi. Tak njeměješe domjacy škit přewjele dźěła w prěnim połčasu. Tuž sudnik słaby prěni połčas bjez wrotow wothwizda.

SJ Njebjelčicy – Rakečanske KT II 3:4 (3:1)

Zestawa SJ Njebjelčicy: Friedrich Tietze – Daniel Kral, Clemens Reinelt, Paul Hrjehor, Ronny Hanuza, Marvin Reinecke, Handrij Korjeńk, Józef Matješk (60. Robert Lejnart), Gabriel Čornak, Anton Malaškin, Oliver Domš

Sylnje motiwowani, skónčnje raz dobyć chcyć, nastupichu Njebjelčenjo na domjacym trawniku přećiwo tabulkowemu susodej z Rakec. Čerwjene košle započachu sylnje a dominowachu hru. W prěnim połčasu wotměwaše so hra wosebje w hrajnej połojcy hosći. Po mnohich nadźěłanych šansach poradźi so potom skónčnje nawjedowanje přez Olivera Domša k 1:0 (15.). Hnydom na to pak hosćo k 1:1 (16.) wurunachu. Mustwo SJN wukonješe dale ćišć a wutwora sej dalše šansy. Tak poradźi so w 20. mjeńšinje 2:1 přez centralny wólny kop. Ronny Hanuza suny bul nisko nimo hišće njesortěrowaneje murje do praweho delnjeho róžka. Hosćićel dale hru dominowaše a móžeše sej přeco wjace jasnych šansow wuhrać. Krótko do přestawki zwyšichu Njebjelčenjo na 3:1 (43.). Oliver Domš trjechi wot dypka z pomocu pokutneho kopa. Hač do toho wokomika móžachu fanojo jara solidnu a taktisce dobru hru widźeć.