Powołanja teoretisce a praktisce zeznali

Dienstag, 07. Februar 2017 geschrieben von:

Worklecy (BW/SN). Po wjacorych serbskich firmach a kubłanišćach je so dźensa dopołdnja 8. lětnik Worklečanskeje serbskeje wyšeje šule „Michał Hórnik“ rozhladował. Tak wopytachu šulerjo stajnje po dwěmaj abo třoch w Miłoćicach Wjenkec metalotwarsku firmu BMP, w Pančicach-Kukowje skótnolěkarsku praksu, Zelnakec pjekarnju a dźěłarnju za zbrašenych swj. Michała. We Worklecach šijachu pola šwalče Petry Kupcy­neje, pomhachu kubłarkam w tamnišej pěstowarni a přewodźachu sobudźěła­ćerjow maltezow při wšědnym dźěle. Cyłe­ dopołdnjo smědźachu holcy a hólcy do jednotliwych powołanjow počuchać a swoje prašenja wotbyć.

Dobre zhromadne dźěło

Dienstag, 07. Februar 2017 geschrieben von:
Ći, kotřiž dźensa šulu wuchodźa a powołanske wukubłanje nastupja, su w komfortabelnej situaciji, zo zawody wučomnikow pytaja. Před lětami bě to hišće cyle hinak, jako młodostni druhdy scyła žane wukubłanske městno namakali njejsu. Přiwšěm dyrbja so tež dźensa prašeć, kotre powołanje je za nich prawe. Při tym pomha jim projekt Rěčneho centruma WITAJ, kotryž runja zašłymaj lětomaj tuchwilu­ znowa na Worklečanskej wyšej šuli „Michał Hórnik“ přewjeduja. Powołanska orientacija z teoretiskim dźělom wčera a praktiskim dźensa šulerjam wuwědomja, kotre wuměnjenja woni za te abo tamne powołanje trjebaja a što praktiske dźěło w metal předźěłacym zawodźe, w skótnolěkarskej praksy, w šwalčerni a druhdźe wopřijima. Za dobre zhromadne dźěło mjez RCW a serbskimi pře­dewzaćelemi słuša wšitkim wobdźělenym wulki dźak. Bianka Wjeńcyna

Na wulkim jewišću Němsko-Serbskeho ludoweho dźiwadła měješe dźensa dopołdnja hudźbna bajka Sergeja Prokofjewa „Pětr a wjelk“ premjeru. Zhromadny projekt Budyskeje hudźbneje šule ze swojim orchestrom a rejwanskej company MSV 04 Budyšin w kooperaciji NSLDź měri so na šulerjow Budyskeho wokrjesa. Foto: SN/Maćij Bulank

Dobyćerjo jutře koncertuja

Freitag, 03. Februar 2017 geschrieben von:

Wojerecy (MFü/SN). Najlěpši wobdźěl­nicy 26. regionalneho wubědźowanja „Młodźina hudźi“ wuhotuja jutře, so­botu, w 15 hodź. w awli Wojerowskeho ­Lessingoweho gymnazija tradicionalny koncert dobyćerjow. Dohromady 107 ­dorostowych hudźbnikow Budyskeho a Zhorjelskeho wokrjesa bě so na wubědźowanju minjeny kónc tydźenja we ­Wojerecach wobdźěliło. Mjez nimi bě lědma Serbow. Jeničce Józef Hantuš a Dawid Wowčer z Radworja kaž tež Tarah Meltzer z Chasowa swoje kmanosće ­pokazachu. 85 solistow a ansamblowych hudźbnikow je znajmjeńša 21 wot 25 móžnych dypkow docpěło a sej tak jedne z prěnich mytow wubědźiło. Najlěpši z nich wuhotuja jutřiši koncert doby­ćerjow.

Wučba serbšćiny raz hinak

Donnerstag, 02. Februar 2017 geschrieben von:
Šulsku hodźinu bóle praktiskeho raza dožiwichu wčera wobdźělnicy serbskeje wučby na Kulowskej wyšej šuli „Korla Awgust Kocor“. Ze swojej wučerku Ines Lešowej dojědźechu sej do Łaza, hdźež podachu so na slědy Handrija Zejlerja. Čłonka spěchowanskeho towarstwa za zetkanišćo Dom Zejlerja a Smolerja Gabriele Knothe (nalěwo) čitaše šulerjam ze Zejlerjowych fabulow. We Łazowskej cyrkwi hosćo zhonichu, zo su w njej 1991 Załožbu za serbski lud załožili. Dale pobychu w Domje Zejlerja a Smo­lerja kaž tež při pomniku Handrija Zejlerja. Foto: Heinz Hirschfeld

Wšelake warianty ptačeho kwasa

Donnerstag, 02. Februar 2017 geschrieben von:

Budyšin (SN/MiR). 22 předstajenjow dźěćaceho­ ptača kwasa ma Serbski lu­dowy ansambl lětsa předwidźanych. Pjeć z nich a z tym po ličbje wjace hač dotalne lěta je ryzy serbskich. Serbskorěčne předstajenja móža sej dźěći na žurli ansambla trójce a dwójce na jewišću Chróšćanskeje „Jednoty“ wobhladać. Dalše předstajenja su po wjetšinje měšanorěčne, němsce a serbsce, kaž we Wojerecach a Choćebuzu. Ansamblowcy maja za turneje tež němsku wersiju ze serbskimi elementami přihotowanu. Tónle tydźeń su ju jónu tež w Budyšinje předstajili. W njej zanjesechu ansamblowcy někotre štučki serbsce, kaž „Štó ma njewjesta być“ a „Sławu“. Hewak bě rěčny poskitk němski. „Ze wšelakimi wariantami wotpowědujemy přećam kubłanišćow“, praji jednaćelka Serbskeho ludoweho ansambla Diana Wagnerowa. Dźěći ze serbskich pěstowarnjow a šulow měrja so na wotpowědne serbske předstajenja, šule z nakromnych kónčin wužiwaja wosebje měšanorěčne.

Dwurěčne šule pytaja wučerjow

Mittwoch, 01. Februar 2017 geschrieben von:

„Serbšćina je moja maćeršćina a němčina je mi tohorunja wažna.“ Takle wopisuje Lukas Čórlich swój poměr k rěčomaj, kotrejž wšědnje nałožuje. Wón chodźi do 12. lětnika Wojerowskeho Lessingoweho gymnazija. Do toho je wón Ralbičansku Serbsku wyšu šulu z realnym wotzamknjenjom zakónčił. Lětsa chce nětko maturować. Rady wobdźěla so na cyło­dnjowskim poskitku serbšćiny, kotruž zajimcam na Lessingowym gymnaziju wot 7. do 12. lětnika podawaja. Jako dwanatkar je wón tam jenički wobdźělnik. Tuž jeho wučerka Lubina Kühnowa wosebje spěchuje. Wšako chce so wón stać ze serbskorěčnym hudźbnym pedagogom.

„Serbskorěčnosć za mnje woznamjenja, zo hudźbu přichodnje serbsce wuwučuju“, Lukas Čórlich rozjasnja. Jemu je wažne swoju maćeršćinu žiwje dale dawać, přetož „wona je identita“. 18lětny hudźi na wjacorych instrumentach a chce­ pozdźišo šulerjow wo rjanosći kompozicijow wot Mahlera hač k Mo­zartej přeswědčić a jich za serbske spěwne­ herbstwo zahorić. Přidatnu prócu,­ kotraž je trěbna, zo by w studiju nadźěłanu wědu tež serbsce posrěd­kować móhł, chce wón rady na so wzać.

Myška a žurk wot fanow wobdatej

Dienstag, 31. Januar 2017 geschrieben von:
Dźensa dopołdnja su mjez druhim šulerjo Barćanskeje a Wulkodubrawskeje zakładneje šule němskorěčny lětuši dźěćacy ptačokwasny program Serbskeho ludoweho ansambla „Myška w mróčelach“ na wulkej žurli Němsko-Serbskeho ludoweho dźiwadł­a dožiwili. Po předstajenju wužichu dźěći z Wulkeje Dubrawy składnosć, so w foyeru ze žurkom Napoleonom (Pětr Cyž) a myšku Sofiju (Manuela Klitsch) rozmołwjeć a sej programowy zešiwk signować dać. Foto: SN/Maćij Bulank

Biblioteki zachować

Dienstag, 31. Januar 2017 geschrieben von:
Njedawno wopraša so mje přiwuzny, kak dołho chcu sej hišće na mojich knižnych polcach stejacy Meyerowy leksikon z časa NDR wobchować. Dźensniši dźeń informuje so wón w interneće. Mi pak je leksikon dopomnjenka a w nim su informacije, kotrež hewak nihdźe njenańdu. Wšako je so wid na swět w zašłych lětach změnił. A nic jenož to, tež wašnje wobstaranja informacijow. Dawno hižo njechodźa ludźo do bibliotekow kaž hišće před dźesać lětami. Měnja, zo namakaja wšitko, štož jich zajimuje, w interneće. Mnozy pak wědźa, kotre lěpšiny biblioteka skića. Dóstawaš tam dobru radu a na swoje zajimy přiměrjeny poskitk. Maš chwile so hnydom do knihi zanurić, móžeš sej ze słuchatkami na wušomaj wulećeć a njetrjebaš słucho­knihu hnydom kupić. Derje tuž, zo gmejny biblioteki jako poskitk kultury a kubłanja pod wobćežnymi wuměnjenjemi zachowaja. Milenka Rječcyna

Dohlad do wukubłanja a studija

Montag, 30. Januar 2017 geschrieben von:
Podźěl elektroniki we wukubłanju mechanikarjow za techniku sanitarnych, tepjenskich a klimowych připrawow dyrbjał so dale wutwarić. Wo tym diskutuja Dieter Piskol,­ nawoda za wukubłanje w elektrokubłanskim a technologiskim centrumje Drježdźany, Tomaš Rječka a Martin Bohot z fachoweho zawoda za tepjensku tech­niku Rječka & Čornak (wotl.). Předewzaće z Kamjeneje bě jeničke serbske mjez 83 wustajerjemi­ sobotu na kubłanskich wikach „Nawi přichoda“ w Budyskej studijnej akademiji.­ Foto: Constanze Knappowa

Anzeige