Wuměna šulow je skutkowna

Mittwoch, 07. Juni 2017 geschrieben von:
Radwor (SN/MiR). Na Radworskej Serbskej zakładnej šuli „Dr. Marja Grólmusec“ je dźensa mjezynarodny flair knježił. Šulerjo 4. lětnika wočakowachu hosći z Pólskeje. Šulerjo z partnerskeje šule z Rząsiny, kotraž nosy mjeno Alojs Andricki, su so na puć do Radworja podali. Šulerska wuměna, kotraž so w lěće zbóžnoprajenja Andrickeho 2011 zahaji, njese lěto wob lěto płody. „Mjezsobne wopyty dźěći su k tomu pohnuwali, sej ze staršimi a dalšimi swójbnymi do wotpowědneho susodneho kraja dojěć a sej wose­bitosće wotkryć“, rjekny nawodnica Ra­dworskeho kubłanišća Brigitta Grundmannowa. Na lětušim zetkanju njeje šula z Libereca pódla. Přičiny za to su pobrachowace financy. Tež dojednanje na zhromadny termin njebě lochke. Wšako běše dalši Radworski 4. lětnik w Slepom. Šulerjo wobdźělichu so na jězbje składnostnje 65. jubileja serbskeho dźěćaceho časopisa „Płomjo“. Tuž njemóžachu być hosćićeljo pólskim přećelam. Za to pak stejachu wyši šulerjo mjeńšim poboku. Woni běchu pólske a serbske dźěći na tři zaběry přeprosyli. Su z nimi jejka wóskowali, sej šulski muzej wobhladali a paslili.

Metafra čornych psow ju wužadała

Mittwoch, 07. Juni 2017 geschrieben von:

Mjena šulerkow, kotrež wuknu na gymnazijach we Wojerecach abo w Niskej, na dotalnych lisćinach lawreatow Lessingoweho šulerskeho pisanskeho wubědźowanja prawidłownje namakaš.

Lětsa je so jim Hannah Spinde přidružiła. Jako wubědźowanski přinošk je šulerka 10. lětnika Nišćanskeho Friedricha Schleiermacheroweho gymnazija čwělowacu stawiznu wo začućach winy spisała. Hižo nadpismo „Čorne psy“ čitarjej spo­srědkuje, zo tu njeń­dźe wo zwěrjata, ale wo wony wobraz za zły dušiny staw. Hannah rozprawja wo wólnej smjerći přećelki. Protagonistka čuje so za to zamołwita. Sama hraje z myslu, sej tež žiwjenje wzać. Metafra čornych psow bě šulerku inspirowała, so pjera jimać.

Hač do nocy ze serbskich knihow čitali

Dienstag, 06. Juni 2017 geschrieben von:

Budyšin (SN/MiR). 19 šulerjow 3. a 4. lětnika­ Ralbičanskeje, Radworskeje, Chróšćanskeje, Pančičansko-Kukowskeje a Worklečanskeje zakładneje šule su zańdźeny pjatk na sobotu nóc w Budyskim Dźiwadle na hrodźe přebywali. Tam wotmě so lětuša, mjeztym 11. čitanska nóc, kotruž Němsko-Serbske ludowe dźiwa­dło zhromadnje z Rěčnym centrumom WITAJ wuhotuje. „W běhu jenož dweju dnjow po wozjewjenju, běchu wšitke městna wobsadźene“, rjekny projektowa sobudźěłaćerka RCW Michaela Hrjehorjowa. Po zetkanju při Maćijowej wěži podachu so dźěći do dźiwadła. Tam hrajachu hry k mjezsobnemu zeznaću. Wjerškaj wječora běštej wopyt probow za lěćne dźiwadło a klankodźiwadłowe předstajenje. Nimo toho rozhladowachu so po domje. Při wšěm tym jim zastupjerka intendanta za serbske dźiwadło Madlenka Šołćic někotružkuli rumnosć pokaza, kotraž hewak přihladowarjam přistupna njeje. „Mnozy nawróća so po tymle zarjadowanju ze staršimaj na předstajenja NSLDź, dokelž maja čitanskeho zarjadowanja dla wosebity poměr k dźiwadłu, wšako su sej tu hižo raz zuby rjedźili a spali“, rozłožuje Michaela Hrjehorjowa.

Kulojte blido wo hudźbnej šuli

Dienstag, 06. Juni 2017 geschrieben von:

Budyšin (SN/at). Wučba Budyskeje wo­krjesneje hudźbneje šule podawa so tež w nowym šulskim lěće na dotalnym stejnišću w Schillerowych zelenišćach. Kaž tudyši krajnoradny zarjad zdźěla, su so zastupjerjo wučerskeho kolegija, starši a wokrjesni radźićeljo we wospjetnej rozmołwje z 1. přirjadnikom krajneho rady Udom Wićazom (CDU) na to dojednali. „Tam wostać je za nas najlěpše přechodne rozrisanje“, cituja wučerja hudźbneje šule Clemensa Kowollika. Wučerjo a starši běchu sej minjene dny wšelake dalše městna wobhladali. Za wažne pak maja, zo docpěje so trajne rozrisanje.

Wučerjo a starši žadaja sej polěpšene klimatizowanje wuwučowanskich rumnosćow a chcedźa nowu mensu Po­wołanskošulskeho centruma za hospodarstwo a techniku za zarjadowanja wokrjesneje­ hudźbneje šule wužiwać. Zdobom přeja sej mjez wokrjesnym zarjadnistwom, powołanskošulskim centrumom kaž tež staršimi a wučerjemi hudźbneje šule kulojte blido. Udo Wićaz je připrajił kulojte blido moderěrować.

Drježdźanski gymnazij lětsa jara wuspěšny

Dienstag, 06. Juni 2017 geschrieben von:

Kamjenc (SN/at). Pozdźe, nic pak pře­pozdźe mytowachu lawreatow lětušeho Lessingoweho šulerskeho pisanskeho wu­- bědźowanja minjeny pjatk w Kamjenskim měšćanskim dźiwadle. Wyši měšćanosta Lessingoweho města Roland Dantz (njestronjan) rěčeše tuž wo „wuhódnoćenju w nječasu při najrjeńšim lětnim wjedrje“.­ Poćahujo so na mytowane wubědźowanske přinoški wobkrući wón jich awtorkam wosobinsku poziciju a sensibelnosć při pisanju. Mjez pjeć mytowa­nymi w kategoriji lětnikow 9/10 běchu z Marinu Kirillowej, Shenju Gecks a Yasmin Maazaoui tři šulerki 9. lětnika Drježdźanskeho Romaina Rollandoweho gymnazija. Hannah Spinde z Friedricha Schleiermacheroweho gymnazija w Niskej a Katja Müller-Kuckelberg z gymnazija Klotzsche, wobě 10. lětnik, stej so runje tak nad mytom wjeseliłoj kaž Sarah Grund z 11. lětnika Kamjenskeho powołanskošulskeho centruma w kategoriji lětnika 11 do 13.

Ličby jasne

Freitag, 02. Juni 2017 geschrieben von:
Budyšin (SN/MiR). Regionalny Budyski zarjad Sakskeje kubłanskeje agentury móže nětko planować. Ličby za přichodny 5. lětnik w šulskim lěće 2017/2018 su jasne. Na serbskich wyšich šulach a na Serbskim gymnaziju Budyšin budźe po dotalnych přizjewjenjach 249 šulerjow w 5. lětniku wuknyć. Najwjace z nich je so na Kulowskej Wyšej šuli „Korla Awgust Kocor“ přizjewiło, mjenujcy połsta. 18 z nich chce so na wučbje serbšćiny po koncepće 2plus wobdźělić. Na kubłanišću wutworja dwě rjadowni. 40 nowačkow chce na Wyšej šuli „Dr. Marja Grólmusec“ Slepo w dwěmaj rjadownjomaj wuknyć, mjez nimi 16 po koncepće 2plus. 40 přizjewjenjow registruje zarjad tež za Budyski Serbski gymnazij, a tam budźetej tohorunja dwě rjadowni wutworjenej. Na wyšej šuli „Dr. Marja Grólmusec“ w Radworju liča z 33 nowymi šulerjemi a na Worklečanskej wyšej šuli „Michał Hórnik“ z 31. Na woběmaj­ kubłanišćomaj dosaha ličba přizjewjenjow za wutworjenje dweju rjadownjow. Na Serbskimaj wyšimaj šulomaj w Budyšinje a Ralbicach porno tomu změja jenož jedyn 5. lětnik, w Budyšinje z 28 a w Ralbicach ze 27 šulerjemi.

Nowa nawodnica trěbna

Donnerstag, 01. Juni 2017 geschrieben von:

Njebjelčicy (SN/MiR). Nawodnica Njebjelčanskeho dźěćaceho dnjoweho přebywanišća „Jan Skala – Barbojte kamuški“ Anke Grofina swoju funkciju 30. junija złoži. Zdobom rozžohnuje so ze skutkowanja jako kubłarka. Tole zhonichu starši póndźelu wot nawody Křesćansko-socialneho kubłanskeho skutka (CSB) Miłoćicy Petera Neunerta na staršiskej zhromadźiznje.

Smječkečanka Anke Grofina je wukubłana kubłarka a je přidatne wukubłanje na nawodnicu wotzamknyła. Kaž Peter Neunert rjekny, chce so wona nětko nowym nadawkam wěnować. Spočatnje běše pola CSB zamołwita za zažnohudźbne kubłanje dźěći. Byrnjež Neunerta rozsud nawodnicy pěstowarnje překwapił, dźakowaše so jej za dobre dźěło. Čłon staršiskeje přirady dnjoweho přebywanišća Chrystof Mikławšk wupraji w mjenje staršich dźak a nadźiju, zo „so spomóžne skutkowanje Anki Grofineje dale wjedźe. Wona kaž tež wšitke kubłarki naše dźěći jara derje kubłaja.“

Nowa přiručka

Mittwoch, 31. Mai 2017 geschrieben von:
Budyšin (SN). „Kak to jenož praju?“ je nowa přiručka, kotruž stej Ludowe nakładnistwo Domowina a Rěčny centrum WITAJ­ wudałoj. Kniha je wot dźensnišeho na předań a słuži rozšěrjenju serbskeho słowoskłada, „zo móhli spisarjo tekstow swoje mysle lěpje po­dawać“, zdźěla RCW. Zdobom chcedźa docpěć, zo wužiwaja Serbja město němskich lěpje hodźacy so wotpowědnik w swojej maćer­šćinje. Hornjoserbska přiručka z pjera Lubiny Hajduk-Veljkovićoweje wopřijima wotpowědniki za něhdźe 2 100 hesłow. Wosebitosć su hesłam přidate přikładowe sady.

Starši su a wostanu njewěsći

Dienstag, 30. Mai 2017 geschrieben von:

Starši chowancow Njebjelčanskeje pěstowarnje „Jan Skala – Barbojte kamuški“ žadaja sej wot Křesćansko-socialneho kubłanskeho skutka (CSB), kiž je nošer zarjadnišća, zo nastupajo personalne zastaranje dźěći skónčnje jedna.

Njebjelčicy (SN/MiR). Wčera je staršiska přirada pěstowarnje na rozmołwu ze staršimi, kubłarkami, nošerjom a wjesnjanostu přeprosyła. Přičina je njespokojnosć staršich předewšěm z personalnym zastaranjom w dźěćacym dnjowym přebywanišću. Hižo wot zymy dźěła tam mjenje kubłarkow, hač je předwidźane. Sydom fachowych mocow z połnej ličbu hodźin měło so w žłobiku a pěstowarni wo dźěći starać. Tuchwilu pak skutkuje tam šěsć kubłarkow, zdźěla w podźělnym dźěłowym času. Dwě městnje zaběratej pomocnicy. Dalša přistajena kubłarka je dlěšodobnje chora.

Ralbicy (aha/SN). 230 wuknjacych Ralbičanskeje zakładneje a wyšeje šule wobdźěli so na lětušim swjedźenju serbskeje rěče. Nawodnicy Andrea Liehnowa a Milenka Koberowa jich do sportownje witachu. Šulerjo běchu połni wočakowanjow a móžachu sej na hinaše wašnje hač we wučbje nowu wědu přiswojić.

Anzeige