Drježdźany/Budyšin (SN/MiR). Wotstup sakskeje statneje ministerki Brunhild Kurth (CDU) zbudźa w mnohich kruhach njezrozumjenje, tež w Serbach. Wšako zhladuja zamołwići za serbske kubłanske naležnosće w Sakskej na płódne zhromadne dźěło z ministerstwom, předewšěm we wodźenskej skupinje 2plus. W njej skutkuje mjez druhim předsyda Domowiny Dawid Statnik. „Z wotstupom ministerki Kurth njejsym ličił. Najebać wšitke ćeže w kubłanskim systemje běše wona Domowinje napřećo stajnje wotewrjena a spušćomna partnerka. We wosobinskich rozmołwach dožiwich ju jako zajimowanu a na cil orientowanu wosobinu“, Dawid Statnik našemu wječornikej potwjerdźi. Runja jemu skutkuje we wodźenskej skupinje 2 plus předsydka Serbskeho šulskeho towarstwa Ludmila Budarjowa. „Wobžaruju, zo je Brunhild Kurth zastojnstwo złožiła, ale móžu ju derje rozumić. Z naju poslednjeje rozmołwy 21. septembra w Slepom bě wusłyšeć, zo so tajka změna připowědźa. Wšako je połoženje na šulach jara brizantne. Njeje připad, zo je tež braniborski minister Günter Baaske wotstupił.“
Serbska zakładna šula Ralbicy je mjez lětušimi dobyćerjemi sakskeho wubědźowanja „Hrać čini šulu“. Iniciatiwa je projekt wědomostnikow a ekspertow we wobłuku dźěćaceje a swójbneje komunikacije.
Ralbicy (SN/MiR). 21 zakładnych šulow z cyłeje Sakskeje bu za swój originelny a přemysleny koncept, kak na šuli hrać wuznamjenjenych. Wučerka Ralbičanskeje zakładneje šule Kerstin Šěnowa je na próstwu šulskeje nawodnicy Andreje Liehnoweje wotpowědnje žadanjam we wupisanju koncept wuwiła a zapodała. „Njejsmy scyła z tym ličili, zo budźemy mjez dobyćerjemi“, Kerstin Šěnowa wuswětla, „wšako mějachmy koncept lětsa w nalěću zapodać, nětko je hižo nazyma a nowe šulske lěto běži. Tuž je wjeselo ćim wjetše.“ Prěnje hry su do šule dóšli. Za to trěbne kamory běchu tam dołho rezerwowali. Te pak su mjeztym ze šulskej potrjebu napjelnjene. „Staršej jednoho šulerja, kotrajž mataj předewzaće, staj nam kamory poskićiłoj, hdźež móhli hry składować“, rozłožuje rjadowniska wučerka 2. lětnika. Nětko rozmyslujemy wo tym, hač je do jeničkeje stwy zestajamy abo na wjacore rjadownje rozdźělimy.“
Němsko-čěski šulerski projekt „Konrad Zuse hlada přez mjezy“ zmóžnja slědźenje, dźěłarnički a mnohe zetkanja młodostnych susodneju krajow. Europski program mjezy takrjec wotwěra.
Wojerecy (AK/SN). Kompjuterowy muzej Konrada Zusy we Wojerecach zahaji zhromadne dźěło ze susodnej Čěskej z projektom „Konrad Zuse hlada přez mjezy“. Zhromadnje z regionalnym dźěłanišćom za kubłanje, demokratiju a žiwjenske perspektiwy z.t. (RAA Wojerecy/wuchodna Sakska), Léona Foucaultowym gymnazijom Wojerecy a Powołanskošulskim centrumom Chomutov (Čěska) traje projekt hač do lěta 2020.
Němscy a čěscy šulerjo podwaja so zhromadnje na slědy wunamakarja kompjutera Konrada Zusy (1910–1995). „Ćežišća su temy ličenje, składowanje a komunikacija“, rozłoži póndźelu Ursula Lau, fachowa nawodnica wobłuka přirodowěda Léona Foucaultoweho gymnazija. „Kóžde lěto wobdźěla so z našeho gymnazija jedyn 9. lětnik.“
Pućowanska wustajeńca „Susod? Rěč! Stawizny z pomjezneho regiona“ rysuje nazhonjenja ze wšelakimi kulturami. Zhorjelski wokrjes staji so temje integracija. Wotwěra so tuž rěči a kulturje susodneju krajow Pólskeje a Čěskeje.
Zhorjelc (HW/SN). Sakski krajny zarjad za zažne susododorěčne kubłanje pokazuje pućowansku wustajeńcu „Susod? Rěč! Stawizny z pomjezneho regiona“ hišće cyły tydźeń w Zhorjelskim powołanskošulskim centrumje na Hasy Carla von Ossietzkyja. Dwanaće stejakow rysuje krótke dožiwjenske rozprawy ludźi w pomjeznym regionje. Krajny rada Bernd Lange (CDU) potwjerdźi na wotewrjenju srjedu tydźenja: „Mam za jara wažne, zo swój wid na susodnej krajej rozšěrimy.“ Wustajeńca wěnuje so předewšěm temam susodstwo, kultura a rěč.