Informacije a zhromadnosć

Mittwoch, 02. Mai 2018 geschrieben von:

Lipsk (LW/SN). Skupina šulerjow z Delnjeje Łužicy je so wobdźěliła na studijnym informaciskim dnju na Lipšćanskej uniwersiće. Zańdźenu sobotu přebywachu młodostni z přewodom Katarzyny Fidekoweje a Marion Stenseloweje na tamnišim Instituće za sorabistiku. Wšitcy šulerjo skutkuja při RBB w młodźinskim wusyłanju „Bubak“ sobu. Jich wizita bě wotmołwa na wopyt Lipšćanskich studentow w juniju 2017 we Hochozy, hdźež bě ideja wuměny nastała. Šulerjo wobhladachu sej uniwersitu a wobdźě­lichu so na přednoškomaj. Něhdyši stipendiat Załožby za serbski lud Aleksandar Jovanović ze Serbiskeje je wopyto­warjow po Lipsku wjedł.

Nimo šulerjow běchu sej do Lipska dalši zajimcy za studij sorabistiki dojěli. Doktorandaj instituta Till Wojto a Liza Wal­therowa předstajištaj přehlad dźěławosće instituta na akademiskim, didak­tiskim a socialnym polu. Wědomostna sobudźěłaćerka a docentka dr. Jana Šołćina je zajimcam podała konkretne informacije wo studiju a je jich po­radźo­wała.

Chce wulki swět dale zeznawać

Mittwoch, 02. Mai 2018 geschrieben von:

Mjez lawreatami lětušeho šulerskeho pisanskeho wubědźowanja „Lessing linku po lince“ je 18lětna Emma Gerntke. Šulerka 11. lětnika Lessingoweho gymna­zija w Kamjencu pochadźa ze Smječkec. „Moja wučerka dr. Christine Speich mje we wukonowym kursu němčiny pohnuwaše, so na tymle wurisanju wobdźělić“, wona powěda. Na pisanju ma swoje wjese­lo. Wot zakładneje šule je so wona přeco zaso w tekstach wuspytała. Citat z „Nathana mudreho“ jako tema ju putaše, přinošk w formje dźenika napisać. Ideja bě bórze namakana: Kak ze suicidom lubowaneje přećelki wobchadźeć? Wona, Amelie, měješe depresije swojeje biseksualnosće dla. Jako nochcyše hólc ju dlěje za přećelku měć, widźeše wona smjerć jako jenički wupuć. Awtorka „nam wěrjomnje pokazuje, kak začuća, dopomnjenki a asociacije prěki a podłu skakaja“, lawdator Wolfgang Melzer přinošk chwali.

Přewšo powabne su młodej Smječkečance basnje w jendźelskej rěči. A kajka přesłapjena móže być, hdyž njedocpěje jeje přełožk do němčiny wuprajiwosć jendźelskeho originala. Rady tež sama jendźelsce basni.

W Slepom musical zahrali

Montag, 30. April 2018 geschrieben von:
Nimale wšitcy šulerjo Slepjanskeje wyšeje šule „Dr. Marja Grólmusec“, w cyłku ně­hdźe 250, su w tymle projektowym tydźenju byli wobdźěleni na předstajenju musicala „Felicitas Kunterbunt“. Mjez nimi běchu spěwarki a spěwarjo chóra, w kotrymž wustupi wjace hač 60 dźěći a młodostnych, dirigowany wot Corinny Fabian (stejo srjedźa) a Sabiny Jurencec (naprawo). Wučerjo su inscenaciju we wobłuku kursow po zajimach šulerjow wot spočatka šulskeho lěta přihotowali. Dźewjeć króć su šulerjo zwjetša před wupředatej žurlu Serbskeho kulturneho centruma hrali. Musical napisał je šulski nawoda Wolfgang Goldstein. Foto: Joachim Rjela

Hnujace přinoški w formje dźenika

Mittwoch, 25. April 2018 geschrieben von:

Kamjenc (SN/at). Ze štyrjoch zwjazkowych krajow pochadźeja lawreatki lětušeho šulerskeho pisanskeho wubědźowanja „Lessing linku po lince“. Kamjenski wyši měšćanosta Roland Dantz (njestronjan) njeje na wuznamjenjenskim zarjadowanju minjeny pjatk w tamnišim měšćanskim dźiwadle jenož myta za najlěpše wubědźowanske přinoški přepo­dał. Wón runje tak zwěsći, zo je wurisanje, kotrež wotmě so nětko 25. raz w zamołwitosći Kamjenskeho Lessingoweho muzeja, mjez šulerjemi a wučerjemi přewšo woblubowane. Tajke přićahliwe, zo móžeše jury přinoškaj mytować, kotrejuž awtorce stej wospjet mjez wuznamjenjenymi: Katja Müller-Kuckelberg z gymnazija Klotzsche třeći raz za sobu a Hannah Spinde z Friedricha Schleiermacheroweho gymnazija Niska druhi raz. Wo dobru łužisku bilancu mjez najlěpšimi postaraštej so dale Emma Gerntke z Lessin­goweho gymnazija Kamjenc, doma w Smječkecach, a Freyja Kurzweg z Wojerowskeho Johanneuma, doma w Złym Komorowje.

Ralbicy (JR/SN/JaW). Z kulturnym programom su šulerki a šulerjo 5. lětnika Serbskeje wyšeje šule Ralbicy wčera nawječor w tamnišej sportowni hosći z čěskeho Mělníka we Łužicy witali. Při­tomni běchu nimo dźěći a wučerjow tež starši serbskich dźěći. Wšako přenocuja čěske dźěći w hóstnych swójbach.

Hižo wčera připołdnju móžeše w Budyšinje direktorka Ralbičanskeho kubłanišća Milenka Koberowa 25 šulerkow a šulerjow z wučerkomaj z čěskeho Mělnika na tradicionalnu wuměnu witać. „Zetkamy so stajnje pod Budyskej Bohatej wěžu“, rjekny Milenka Koberowa našemu wječornikej. Po witanju podachu so hosćo na krótke wodźenje po sprje­winym měsće a tež słódny wobjed njesmědźeše pobrachować. Na programje steješe wčera tohorunja wopyt sawrie­roweho parka w Małym Wjelkowje, štož so małym hosćom wězo chětro lubješe.

Šiman žada sej spěšne připóznaće

Freitag, 20. April 2018 geschrieben von:

Budyšin (SN/MiR). Statne kubłanske zarja­dy maja přichodnje swoje nadawki při zdobywanju wučerjow z wukraja za Łužicu doraznje přesadźić. Z tym zwja­zane je tež zwoprawdźenje Serbskeje rěčnej­e šule. Wobkedźbować maja so při tym přilubjenja swobodneho stata Sakska čěskemu knježerstwu, nastupajo při­stajenje wučerjow ze susodneho kraja. Tole žada sej zapósłanc Sakskeho kraj­neho sejma Marko Šiman (CDU) hladajo na dotal njedosahacy angažement při zdobywanju a zarjadowanju wukrajnych wučerjow, kotřiž chcedźa w Serbach skutkować. „Tež hdyž mamy po cyłej Sakskej starosće z wučerskim zastaranjom, zwobraznja situacija na serbskich ku­błanišćach wěsty mikrokosmos“, rozłoži serbski zapósłanc wčera składnostnje in­for­maciskeho zarjadowanja nowinarjam. „Mam nadźiju, zo so nowy sakski statny minister za kultus Christian Piwarz na hinaše wašnje problematice wěnuje hač jeho předchadnicy.“

Rěčne kmanosće pruwować

Donnerstag, 19. April 2018 geschrieben von:

Šulerjo wužiwaja ertnu serbšćinu na olympiadźe wšelako

Wodowe Hendrichecy (SN/MiR). Bjezdwěla prašeja so starši tych šulerjow, kotřiž wobdźěla so na kóždolětnej olympiadźe serbšćiny, kotre nadawki maja dźěći spjelnić. Chcedźa zawěsće tež wědźeć, hač dóstawaja pomoc. Nimale dwaj dnjej maja wobdźělnicy chwile, so na prezentaciju přihotować. W skupinskich cyłkach zaběraja so šulerjo 6. lětnikow z jednej temu. Podate su informacije, kotrež maja woni do tekstow splesć. Při tym smědźa sej jednotliwe hesła abo sady napisać. Na kóncu prezentacije zhromadźi jury pisomne podłožki, zo móhła lěpje posudźować, kelko krótkopřednoškow su wobdźělnicy swobodnje přednjesli a kelko bóle wotčitali. Zdobom zwěsća, štó je dyrbjał sej kotre informacije napisać.

Bretonscy šulerjo w redakciji Serbskich Nowin

Donnerstag, 19. April 2018 geschrieben von:
Worklecy/Budyšin (SN/MiR/bn). Cyłkownje 33 šulerjow z bretoniskeho městačka Quimper – stolicy francoskeho departementa Finistère, kotremuž rěkaja bretonsce Kemper – přebywa tuchwilu we Łužicy. Tradicionalna wuměna mjez Francoskej a Łužicu wotměwa so hižo ze spočatka 1990tych lět. Štož bě so tehdy na Pančičansko-Kukowskej srjedźnej šuli započało, wjedźetej nětko Worklečanska Serbska wyša šule „Michał Hórnik“ a Budyski Serbski gymnazij dale. Nawoda wyšeje šule Křesćan Korjeńk zhladuje na mnoholětne zwiski do susodneho kraja Němskeje a přewodźa lětsa 17 hóstnych dźěći. Z boka gymnazija je za projekt zamołwita wučerka francošćiny Yvonne Bulišowa, kotraž stara so ze swojimi šulerjemi wo tohorunja 16 młodych hosći. Hosćo su dožiwili, kak na tudyšimaj kubłanišćomaj němčinu, wosebje pak serbšćinu w fachowych předmjetach na wšelakich rěčnych schodźenkach posrědkuja. Dźensa dopołdnja wotkrychu sej šulerjo stolicu Serbow Budyšin. Zhromadnje z Worklečanskimi šulerjemi 8. a 9. lětnika resp. gymnaziastami 9. a 10.

Budyšin (SN/MiR). Čitanske wubědźowanje Rěčneho centruma WITAJ minjenu sobotu w Budyskej Smolerjec kniharni je Chróšćanskej Serbskej zakładnej šuli „Jurij Chěžka“ wunjesło wosebite hódnoćenje. Wšako staj šulerjej z tohole kubłanišća wubědźowanje wo lětušeju najlěpšeju čitarjow 3. lětnika dobyłoj. W skupinje A1, to su maćernorěčni šulerjo, je to był Milan Jurk a w skupinje A2, su to šulerjo z němsce rěčacych swójbow, je to była Emely Młynkec. Wobaj dóstaštaj, runja wšitkim dalšim wobdźělnikam, wopismo a knihu a k tomu knižny šek, za kotryž móžetaj sej wonaj w Smolerjec kniharni kupić knihu po swójskim słodźe. Wšitcy šulerjo ze skupiny A1 wjeselachu so nad knihu „Serbske powěsće“, ći ze skupiny A2 pak nad knihu „Babka pčołka“.

Sej kuzło wotkryć

Dienstag, 17. April 2018 geschrieben von:
Dźensa hladaja hižo dźěći husto do swojeho smartphona. Kuzło čitanja w knihach pak so zhubiło njeje. Jedyn dopokaz za to je kóždolětne čitanske wubědźowanje ­Rěčneho centruma WITAJ. Pozbudźace ­lětsa běše, z kelko wšelakich dźěćacych knihow wobdźělnicy čitachu a kelko awtorow bě w tymle hodźinomaj słyšeć. Za čo to rěči? Jako před něšto lětami wospjet rěkaše, zo wubjeru sej čitacy wosebje knihi, kotrež powědaja wo wrobliku a jeho přećelach, tak je so spektrum mjeztym rozšěrił. Lětsa běchu 24 wobdźělnicy wujimki z dwanaće knihow přednjesli a z tym zasłyšachu přitomni jědnaće wšelakich awtorow. Wuhotowarjo wubědźowanja kóžde lěto zwěsća, zo je mjez spisowaćelemi jenož zrědka Jurij Brězan. Tuž je derje, zo maja serbscy wobdźělnicy přidatnje z jeho knihi „Rifko“ čitać. Snano by derje było, ­šulerjam darić tule knihu, zo bychu sej ­dalše kuzło wotkryli. Milenka Rječcyna

Anzeige