Program jara wotměnjawy był

Mittwoch, 13. Dezember 2017 geschrieben von:

Worklečanska ćěłozwučowarnja bě pjatk wječor kopata połna. Přičina toho pak njebě domjaca hra Viktorije Worklecy w blidotenisu abo wolejbulu. Bě to adwentny program dźěći Serbskeje zakładneje šule „Michał Hórnik“, kotryž běchu wone hłownje w poslednim nowemberskim tydźenju nazwučowali. To wěnowachu so w projektnym tydźenju hodownemu časej.

Bjez zwady šulu twarić

Mittwoch, 06. Dezember 2017 geschrieben von:

Gołkojcy (SN/MiR). W Gołkojskej gmejnje, před wrotami Choćebuza, ma nastać nowa cyłotna šula z gymnazialnym wyšim schodźenkom. Hłowny zaměr je, šulerjam a šulerkam na wsach w zapadnym dźělu wokrjesa zmóžnić maturować bjez toho, zo dyrbjeli dołhe puće do šule jězdźić. Z wida nawjazanja na zjawne wobchadne srědki a hladajo na dalše trěbne wuměnjenja za wopyt tajkeho kubłanišća so Gołkojcy wosebje hodźa, wuzběhny krajny rada wokrjesa Sprjewja-Nysa Harald Altkrüger (CDU) njedawno w dźěłowej skupinje zakładne šule kubłanskeho wuběrka wokrjesneho sejmika kaž tež w jeho wokrjesnym wuběrku. Z widom na krajne knježerstwo Altkrüger potwjerdźi: „Chcu tule ministerskeho prezidenta a jeho njedawne wuprajenje, wjesny rum sylnić chcyć, jara chutnje brać. Wón dźě z tym mysle wokrjesa podpěruje. Wuprajam so wosebje za tute zesylnjenje. Wšako je to naš nadawk. A za to smy jako wokrjesni radźićeljo a ja jako krajny rada nastupili.“

Lipa nětko z tafličku woznamjenjena

Mittwoch, 06. Dezember 2017 geschrieben von:

W zelenišćach, wobdawace Fachowu šulu za socialnu pedagogiku w Budyšinje, su wčera při lětsa sadźenej lipje připrawili tafličku ze serbskim a němskim napisom.

Budyšin (CS/SN). Mjeztym ma lipa tež swójske mjeno. Wona rěka „Lipa serbskeje fachoweje šule“ (Fachschul-Linde). Bernd Nickel a fachowa nawodnica kubłanišća za socialne Elke Jäckel staj tafličku při zdónku štoma přičiniłoj. Na česć štoma připichu sej wučerjo ze škleńčku sekta. Nakup a wuhotowanje taflički bě jenož z podpěru sponsorow móžne. Kaž Elke Jäckel rjekny, njesymbolizuje lipa jenož­ serbskosć na kubłanišću, ale tež kajkosće, kotrež měł kubłar abo kubłarka měć. Přetož štom a tež kubłarjo měli měć korjenje, dyrbja sylne być a druhich škitać. Štom sadźiło bě přede­wzaće, kotrež bě so tež wo wuhotowanje cyłeje wonkowneje přestrjenje Powołanskošul­skeho centruma starało. Mjeztym lipa tam hižo poł lěta steji a so derje wuwiła.

Do šulskeje wučby počuchali

Donnerstag, 30. November 2017 geschrieben von:
Na Kulowskej wyšej šuli „Korla Awgust Kocor“ witachu tele dny wjace hač 50 holcow a hólcow z Kulowskeje Krabatoweje šule, z Wojerowskeje zakładneje šule „Handrij Zejler“ a z Wulkoždźarowskeje zakładneje šule. W pjeć skupinach woni do šulskeje wučby počuchachu a zeznajomichu so na te wašnje z wučbu serbšćiny, geografije a hudźby a smědźachu so tohorunja na kompjuteru pospytać. Tele wašnje wabjenja je so minjenej lěće pozitiwnje na ličbu přizjewjenych šulerjow na kubłanišću wuskutkowało. Spočatk noweho lěta změja dźeń wotewrjenych duri. Foto: Achim Nowak

Wulki zajim za Pawołsku šulu był

Montag, 27. November 2017 geschrieben von:
Wjele zajimcow je sobotu do Rakečanskeje ewangelskeje Pawołskeje šule załožiło, zo bychu sej tam na dnju wotewrjenych duri najwšelakoriše poskitki šulerjow a wučerjow wobhladali. To běchu přewažnje projekty, kotrež holcy a hólcy we wobłuku wučby ze swojimi kubłarjemi přewjeduja. Z wulkej prócu bě 5. lětnik pod nawodom Norberta Bindera musical „Zachäus“ nastudował. 9. lětnik pak měješe cocktailowu baru spřihotowanu. Tež serbska drasta w nowej interpretaciji steješe w srjedźišću. Nic naposledk běchu tohorunja pospyty wučerki za chemiju Susanny Liebsch a šu­lerja Lennarda Lehmanna mnohim wosebite dožiwjenje. Foto: Feliks Haza

Z nowymi medijemi so rozestajeli

Donnerstag, 23. November 2017 geschrieben von:
4. lětnik Šule Ćišinskeho Pančicy-Kukow je so na projektnym dnju z nowymi medijemi rozestajał. Předwčerawšim wopytachu šulerjo w třoch skupinach wjacore serbske institucije w Budyšinje. Mjez druhim wobhonichu so wo dźěle dźěćaceho časopisa Płomjo, kotryž njesměrnje lubuja, wobhladachu sej, kak w studiju Serbskeho rozhłosa z nowymi medijemi dźěłaja, a wopytachu Smolerjec kniharnju, hdźež předstaji Annett­ Šołćic (nalěwo) mjez druhim rjadowni 4a1 (na wobrazu) nimo Rozhlada­ a Noweho Casnika tež Serbske Nowiny. Wjacori Pančičanscy šulerjo naš wječornik tež roznošuja abo čitaja jón ze staršimi jako online-wudaće pod www.serbske-nowiny.de. Foto: Janek Wowčer

Cyłodnjowske poskitki rozšěrić

Montag, 20. November 2017 geschrieben von:

Drježdźany (SN/MiR). Sakska chce kwa­litu cyłodnjowskich poskitkow na šulach rozšěrić. Za to ma so spěchowanje dale optiměrować. We wuskim zhromadnym dźěle z Techniskej uniwersitu Drježdźany su w sakskim ministerstwje za kultus zdźěłali kwalitnu předłohu ze specifi­skimi indikatorami a kriterijemi, kotrež hodźa so přepruwować k wuwiću dobrych cyłodnjowskich poskitkow. Naćisk tuchwilu w ramiku modeloweho pospyta z 20 šulemi posudźuja.

Po nowym šulskim zakonju maja cyłodnjowske poskitki wot 1. awgusta 2018 za powšitkownokubłace šule zasadnje winowatostne być, při čimž je Sakska za sobufinancowanje. Hižo nětko poskićeja mjez 1 300 šulemi w swobodnym staće nimale wšitke powšitkownokubłace šule tajke poskitki. Jako dobre je so wopokazało, zo kubłanišća wašnje a wobsah swojich cyłodnjowskich poskitkow samostatnje a z partnerami na městnje, kaž ze zwjazkami, kulturnymi, sporto­wymi a młodźinskimi towarstwami po potrjebje a šulerjam wotpowědnje zwoprawdźeja.

Je a wostanje ćežko

Montag, 20. November 2017 geschrieben von:
Zdobyć sej fachowy dorost za zamołwite a žiwjenje wupjelnjace dźěło njeje dźensa ćežko, płaći-li so za to dobra mzda abo honorar a je-li dosć zajimcow za wotpowědne powołanje. Što pak je z čestnohamtskim, njepłaćenym skutkowanjom? Tam skerje klaca. Tych ludźi je bohužel dźeń a mjenje. Přičin je dosć. Přetož zwonka swojeho wšědneho dźěła so angažować rěka: čas, kotryž móhł za hobbyje wužiwać, na dobro zhromadnosće zasadźić. A to dźensa husto na prěnim městnje žiwjenskich planow njesteji. Tež Serbske šulske towarstwo je minjene lěta wojować měło, dokelž nochcychu narěčani nadawk přewzać a w předsydstwje sobu skutkować. Nětko pak je so nowy, młody zajimc za to wuprajił, sobu dźěłać chcyć. Derje tak! Za njeho to woznamjenja swoje zaměry sćěhować a zwoprawdźić. Za to přejemy mustwu­ wokoło dotalneje a noweje předsydki dołhi dych. Milenka Rječcyna

Na dnju wotewrjenych duri na medicinskej šuli Carla Thiemoweho klinikuma w Choćebuzu móžachu so zajimcy wčera popoł­dnju wo wukubłanskich powołanjach we wobłukach hladanje chorych a dźěći, hladanje w starobje, baby/porodni hladarjo, medicinskotechniska­ radiologijowa asistenca a fyzioterapija wobhonić. Wučerjo a wučomnicy wotmołwjachu na prašenja hosći.­ Na kubłanišću wuknje něhdźe 500 młodych ludźi, 400 wučerjow jich wuwučuje. Foto: Michael Helbig

Přirodoškitna krajina z mnohimi překwapjenkami

Mittwoch, 15. November 2017 geschrieben von:

Přirodoškitna krajina „Słomjeńska hola“ je 303,64 hektarow wulka. Na wuchodźe wobmjezuje ju železniska čara Choćebuz-Zhorjelc, na zapadnym Sprjewja. Sewjerojužne rozšěrjenje saha wot Grodkowskeho kanuwoweho domu hač k Sprjejčanskej niwje. Tam zapołoženy je něhdźe 20 hektarow wulki přirodoškitny teren „Slamener Kuthen“. W nim maja hišće wulki wobstatk niwoweho lěsa kaž tež mnohe rědke rostliny a zwěrjata. Prěnje wozjewjene přinoški wo kónčinje su z lěta 1879. W lěće 1900 bu region prěni króć kartěrowany. Ale hakle 1974 započachu so intensiwnišo z wuslědźenjom Słomjeńskeje hole zaběrać. Překwapjeni běchu tehdy wo bohatosći orchidejow, kotrež tam rosćechu. Prjedy wšak wužiwachu ležownosć tež jako wočerstwjenišćo. Tak mějachu tam w zymje sněhakowarsku čaru a móžnosće sankowanja. Drětwja (Zerre) wabješe w 1960tych lětach ludźi do přirodneho kupanišća při Sprjewi. W bliskosći zaměstnichu we wili jednoho něhdyšeho Grodkowskeho předewzaćela hač do lěta 1968 pěstowarnju za dźěći dźěławych Dubrawskeje (Trattendorf) milinarnje, a něhdyši SED-šef z płunokombinata natwari sej w holi swoju daču.

Anzeige