Něhdźe 1 600 dźěći ptači kwas dožiwiło

Mittwoch, 05. Februar 2020 geschrieben von:
Dohromady 1 600 wopytowarjow je wčera we Wojerowskej Łužiskej hali na dwěmaj předstajenjomaj dźěćacy ptači kwas Serbskeho ludoweho ansambla dožiwiło. Předstajenje su woni přewšo napjeće sćěhowali a so jara wjeselili, zo móžachu ptački na kóncu tola hišće kwasować. Nałožk dźě běchu dźěći minjene tydźenje same tež pěstowali, a tak jón wotpowědnje derje znaja. Radźeny ptačokwasny program spisała bě Jěwa-Marja Čornakec,­ Conni Wolf bě hudźbu z trochu južnym přizynkom skomponowała. Finale­ tworjachu wčera mali wopytowarjo a su sej pěseń wo ptačim kwasu­ zhromadnje zaspěwali. Foto: Jost Schmidtchen

Za digitalizaciju kubłanišćow

Dienstag, 04. Februar 2020 geschrieben von:

Wojerecy/Drježdźany (SN/at). Wosom Wojerowskich šulow móže so na spěchowanske srědki wjeselić, kotrež móža za digitalne wuhotowanje swojeho kubła­nišća wužiwać. Kaž sakske kultusowe ministerstwo zdźěli, přepoda statny sekretar Herbert Wolff symboliski šek 1,5 milionow eurow z digitalneho pakta wyšemu měšćanosće Stefanej Skorje (CDU) zajutřišim we Wojerecach.

Ministerstwu předleži nastupajo di­gitalny wutwar tuchwilu 30 próstwow šulskich nošerjow we wobjimje 20,8 milionow eurow. 18 próstwow ze sumu 8,4 milionow eurow su hižo přizwolili. Próstwy nastupaja dotal 49 šulow. Hač do lěta 2024 přewostaja Zwjazk 225 milionow eurow a po połojcy swobodny stat a šulscy nošerjo 25 milionow eurow za digitalne wuhotowanje.

Potom móža zakładne šule Při Wo­rjole „Handrij Zejler“, „Při parku“, „Při Halštrowje“, 4. zakładna šula „Lipowa šula“­, wyšej šuli „Na kromje města“ a „Při planetariju“ kaž tež Lessingowy a Léona Foucaultowy gymnazij započeć swój koncept wo medijowym kubłanju a medijowy wuwićowy plan zeskutkownjeć.

Do studija na akademiji počuchać

Montag, 03. Februar 2020 geschrieben von:

Sakske powołanske akademije reaguja ze swojimi poskitkami jara fleksibelnje na potrjebu hospodarstwa. Tak su wone atraktiwne młodym ludźom kaž tež předewzaćam samym.

Drježdźany/Budyšin (SN/MiR). Budyska powołanska akademija wabi nětko nowych studentow. Wot 17. do 21. februara móžeš tam do studija takrjec počuchać. Naprawa to, kotraž bě hižo loni dobry wothłós žnjała. Młodostni móža sej w tym času labory na campusu spři­stupnić. Zdobom maja składnosć zwěsćić, kotry studijny směr móhł zakład jich powołanskeje karjery być. Tak móža so wobhonić wo hospodarskim inže­­njerstwje, wo elektrotechnice, medicinskej technice, hospodarskej informatice a wo managemenće zawodnych resursow resp. public managemenće. Akademija skići informaciske a wuwučowanske zarjadowanja kaž tež pospyty a zwučowanja. Pod móža so zajimcy přizjewić.

Wulki zajim za Nawi přichoda knježił

Montag, 03. Februar 2020 geschrieben von:

Budyšin (CS/SN). Wobšěrny přehlad wo wukubłanju a studiju w regionje skićeše sobotu Nawi přichoda na Budyskej studijnej akademiji. Nimo akademije předstajichu tam tež Powołanskošulske centrumy Budyšin, Kamjenc a Radeberg. Mjez sto wustajerjemi běchu zastupjerjo rjemjesła, strowotnistwa, socialnistwa, wikowanja, gastronomije a wěstoty kaž tež z industrije a ratarstwa.

Serbsko-němski swět

Montag, 03. Februar 2020 geschrieben von:
Budyska powołanska akademija (BA) wabi studentow z wosebitym poskitkom, z dualnym studijom. To rěka: Na akademiji móža sej studowacy teoretisku wědu přiswojić a w zawodźe praktiske nazhonjenja zběrać. Tak su po wuspěšnym zakónčenju z wotzamknjenjom bachelora derje na powołanski swět přihotowani, njerozsudźa-li so na wysokej šuli ze studijom pokročować. Dotal je na Budyskej BA zas a zaso tež zajimcow serbskeho pochada ze serbskim předewzaćom abo instituciju za studijneho partnera. Mjeztym skutkuja woni we Łužicy, po wšej Němskej abo we wukraju. Škoda tuž, zo njeje akademija jako kubłanišćo do swojeho wabjenja tež serbsku rěč zapřijała, kaž bě to před lětami při předstajenju noweje prezentacije připowědźiła. Jendźelskorěčne wobsahi maja, štož mam za prawe. To je rěč swěta. Přiwšěm, naš łužiski swět je swojorazny jónkrótny – wón je serbsko-němski a mjezynarodny. Milenka Rječcyna

Tiket ma přińć

Freitag, 31. Januar 2020 geschrieben von:

Drježdźany (SN). W nowym šulskim lěće 2020/2021 chcedźa w Sakskej kubłanski tike­t zawjesć. Tak znajmjeńša je stare sakske knježerstwo do wólbow přizje­wiło. Koalicija pak so rozsudow dla dliji, byrnjež sej frakcija Lěwicy w krajnym sejmje srjedu žadała spěšnje postupować. Frakcije CDU, Zelenych a SPD pak pře­ćiwo próstwje hłosowachu.

Rěčnik Lěwicy za mobilitu Marco Böhme rozjasni: „Njejsmy jeničcy, kotřiž sej po cyłej Sakskej jednotny, přez cyłe lěto płaćiwy a w kóštach přihódny tiket za šulerjow žadaja. W lěće 2014 běštej CDU a SPD w koaliciskim zrěčenju přilubiłoj, za to namjet hač do kónca lěta 2015 před­po­łožić. To pak so stało njeje. Njepomha tež ničo, zo bu krótko do wólbow krajneho sejma šulerski tiket za wólny čas zawjedźeny, kotryž hakle wot 14 hodź. płaći.“

Wulka chwalba a dźak!

Freitag, 31. Januar 2020 geschrieben von:
Wobhladaš-li sej dźensniši Dźěćiznak z ptačokwasnymi hosćinami pěstowarnjow je widźeć, zo je nałožk wjeršk lěta. Přikładnje a jara dostojnje su dźěći a kubłarjo kwasne ćahi a programy přihotowali. Hač we Wotrowje, Kulowje, Rakecach, Radworju, haj samo w Drježdźanach su dźěći w serbskich narodnych drastach­ rejowali, spěwali a hrónčka přednjesli. Kóžde lěto znowa pisany program na nohi stajić je kubłarkam a kubłarjam wužadanje. Tohorunja přihotuja narodne drasty a je dźěćom zwoblěkaja, za čož je wjele přihotow a pilnych pomocnikow trěbnych. Na tymle městnje wuprajam tuž chwalbu a dźak wšěm tym, kiž nam kóžde lěto wuběrne ptačokwasne programy wobradźeja a nałožk pěstuja. W přichodnymaj Dźěćiznakomaj chcemy hišće dalše ptačokwasne ćahi kaž na přikład Ralbičanski, Ćišćanski abo Malešanski pokazać, a tak pilne dźěło dźěći a kubłarjow počesćić. Bianka Šeferowa

Stipendije za rěčny kurs w Čěskej

Dienstag, 28. Januar 2020 geschrieben von:

Budyšin (SN). Čěske knježerstwo přewostaja zajimowanym Serbam tež lětsa stipendije za wobdźělenje na intensiwnym rěčnym kursu čěšćiny, a to w Praze wot 24. julija do 21. awgusta a w Českich Budějovicach wot 16. awgusta do 7. sep­tembra. Sposrědkowanje stipendijow ma na starosći Rěčny centrum WITAJ (tel. 03591/ 550 400, ). Zajimcy njech tu hač do 15. měrca swoje podłožki wotedadźa. K tomu słušatej nimo wupjelnjeneho přizjewjenskeho formulara krótki žiwjenjoběh (čěsce abo jendźelsce) a krótka argumentacija, čehodla so wo stipendij požadaja. Ličba stipendijow je wobmjezowana. Dokładniše informacije nańdu zajimcy pod www.witaj-sprachzentrum.de.

Intensiwny rěčny kurs čěšćiny wopři­jima wot póndźele do pjatka w dopoł­­dnišich a zažnych popołdnišich hodźinach wučbu čěšćiny na rozdźělnych rěčnych niwowach wotpowědnje zamóžnosćam wobdźělnikow kaž tež přednoški wo čěskich stawiznach a kulturje w jendźelšćinje a čěšćinje.

Kulturno-zabawny ramikowy program je fakultatiwny – su to poskitki čěskich filmow a koncertow, zhromadne wopyty muzejow, wulěty a dalše.

Kwasuja po cyłej Łužicy

Montag, 27. Januar 2020 geschrieben von:

Dźěći na mnohich městnach ptačokwasne programy pokazali

Budyšin (SN/BŠe). Po cyłej Łužicy předstajeja dźěći tele dny ptačokwasne programy, kotrež běchu minjene tydźenje pilnje nazwučowali. Hižo štwórtk su hortowe dźěći Slepjanskeje pěstowarnje „Pfiffikus“ kwasowali. Witaj-skupina chowancow AWO-pěstowarnje Budyskeje Strowotneje studnje dojědźe sej pjatk dopołdnja do hladarnje starych „Sonnenhof“ na Tuchorskej, hdźež su so wobydlerjo jara nad jich wopytom a ptačokwasnym programom wjeselili.

Radworski dźěćacy dom „Alojs Andricki“ je pjatk prěni raz ptači kwas w hosćencu „Meja“ pokazał. Tam maja jewišćo a wjele městna za přihladowarjow, kotřiž běchu we wulkej ličbje přitomni. Nimo staršich, dźědow a wowkow a zdźěla tež kmótow dźěći su tež wuměnkarjo wosady přišli a sej spodobny program lubić dali. Na čole ćaha steješe lětsa braška Quentin Kral, kiž witaše hosći w mjenje njewjesty Milenki Eiseltec a nawoženje Janeka Měrćinka.

Domyswjećenje z hudźbu

Montag, 27. Januar 2020 geschrieben von:
Runje tak kaž duchowni w serbskich katolskich wosadach domy a bydlenja wěriwych swjeća, činja to hižo něšto lět w internaće Budyskeho Serbskeho gymnazija. Tam bě tele dny Budyski tachantski farar Wito Sćapan (prědku) na wopyće. Z nim su młodźi wobydlerjo zhromadnje modlili a młodźinske kěrluše spěwali. Wuprosychu sej tak žohnowanje za dom a za wšitkich, kotřiž tam bydla. W próstwach skedźbnjachu šulerjo tež na to, zo jich wšědny wobswět a jich derjeměće samozrozumliwej njejstej a zo so za to dźakuja. Greta (prěčna pišćałka), Jakub (keyboard) a Antonijo (husle) su kěrluš šulerjow a kubłarjow na swojich instrumentach přewodźeli. Foto: Weronika Cyžowa

Anzeige

  • Serbski komponist, hudźbnik a spěwar Měrćin Weclich je minjenu sobotu a njedźelu w Budyskim Kamjentnym domje přewšo wuspěšnje koncertował. Přeprosył bě sej za to mnohimi hosći kaž tež młodych talentow, kotřiž z nim zhromadnje na jewišću publikum zaho
  • Měrćin Weclich a Serbski młodźinski oktet - Martin Wetzlich und das Sorbische Jugendoktett
  • Měrćin Weclich a dźěćaca spěwna skupina Šumlabrum - Martin Wetzlich und die sorbischer Kindergesangsgruppe Schumlabrumm
  • Šumlabrum - Schumlabrumm
  • Šumlabrum - Schumlabrumm
  • Měrćin Weclich a młody hudźbnik Chrystof Mikławšk (wotprawa) – Martin Wetzlich und Christoph Mikwauschk (von rechts)
  • Jamila Hórnikec - Jamila Hornig
  • Matteo Hórnik - Matteo Hornig
  • Rejwarki a rejwarjo Serbskeho folklorneho ansambla Wudwor – Tänzerinnen und Tänzer des Sorbischen Folkloreensembles Wudwor
  • Live-hudźba je najlěpša - Live-Musik ist die allerbeste
  • Walentin Bjedrich při pianje - Valentin Bedrich am Piano
  • Kapała pod nawodom Malty Rogackeho (2. wotprawa) je live hudźiła - Malte Rogacki (2. von rechts) und Band spielten live
  • Měrćin Weclich a Měrko Brankačk (wotlěwa) – Martin Wetzlich und Mirko Brankatschk (von links)
  • Poradźenej kocnertaj - Zwei wirklich gelungene Konzerte