Drježdźany (SN/bn). Sakske knježerstwo je nowe postajenje statneho ministerstwa za kultus wo wobmjezowanjach za pě­stowarnje a šule wobzamknyło. Wo­stawa-li „regionalna incidenca sydom dnjow za sobu stabilnje pod 35“, njeje škitny nahubnik w šulskich twarjenjach wjace obligatoriski, rěka we wčera wozjewjenej nowinarskej zdźělence ministerstwa. Nimo toho wukaz předpisuje, zo „wostawaja dźěćace dnjowe přebywanišća a šule regularnje přistupne, dołhož incidenca hódnotu 100 njepřekroči. Šulerski wobchad ke kubłanišćam je pod samsnymi wuměnjenjemi zaso móžny.“ Winowatosć, so dwójce wob tydźeń na koronawirus testować, pak njewotwisnje wot wuwića incidency dale wobsteji. Nowe­ postajenje bě trěbne, dokelž wukaz dotal za škitne naprawy zamołwiteho statneho ministerstwa za socialne a towaršnostnu zwjazanosć postupowanje na kubłanišćach hižo njerjaduje, a płaći wot 14. do 30. junija.

Radwor (SN/MiR). Na serbskich a serb­šćinu podawacych šulach wotwěra so přidatny personalny problem. Na ku­błanišćach njepobrachuja jenož wučerjo, mjeztym pytaja tež fachowcow na druhich runinach. W Radworju na přikład maja na zakładnej šuli „Dr. Marja ­Grólmusec“ městno šulsko-zarjadni­skeho asistenta/asistentki wupisane. Kaž nawodnica kubłanišća Angela ­Rynčowa informuje, chcedźa městno wot 1. septembra wobsadźić. „Jenož hišće hač do 15. junija je móžno so za nje požadać“, wona rozłožuje. „Wobsah dźěławosće je ze skutkowanjom nawod­nistwa a wučerskim teamom wusko zwjazany.“

Z horinami a dolinami so Rejzka Šěnowa wuznawa. A to nic jenož, dokelž rady pućuje. We wichorojtym času přewróta je aktiwnje w Serbskej narodnej zhromadźiznje sobu skutkowała, hdźež su wjele wo změnach w serbskim šulstwje diskutowali. W lěće 1992 přewza wona wjednistwo Serbskeho gymnazija Budyšin a je nowotarske kreatiwne puće kročiła. Wužadacy bě tehdy natwar kursoweho systema w sekundarnym schodźenku. Zesylnić prestiž serbskeje rěče bě jej přeco bytostna a wutrobna naležnosć. Wona docpě, zo so serbšćina němčinje runohódnje jako maturitny předmjet připó­znawa. Zdobom zwoprawdźi projekt cyłodnjowskeje šule. Zaměrnje staraše so wo serbski wučerski dorost. Za kulisami bě to spore njesprócniwe dźěło.