Eksotika rěče so pozhubja

Mittwoch, 10. Mai 2017 geschrieben von:

Čłonka předsydstwa Serbskeho šulskeho towarstwa Margot Hašcyna z Delnjeje Łužicy wot lěta 1992 olympiadu serbskeje rěče aktiwnje přewodźa. Milenka Rječcyna je so z wučerku na wuměnku rozmołwjała.

Lětsa bě wobdźělenje šulerjow z Delnjeje Łužicy, kotrychž sće z referendarku na Choćebuskim Delnjoserbskim gymnaziju Jenifer Dünnbierowej přewodźała, wo­sebje wulka. Hdźe su za to přičiny?

M. Hašcyna: Je tomu woprawdźe tak, mějachmy lětsa wjace wobdźělnikow hač hdy prjedy. Z Delnjoserbskeho gymnazija je wosom šulerjow sobu jěło, z Brjazynskeje zakładneje šule „Mato Kosyk“ běchu to šesćo, z Janšojskeje zakładneje šule „Krabat“ štyrjo a ze Žylowskeje zakładneje šule, kotraž změje bórze mjeno „Lutki“, sedmjo. Přičiny njeznaju, móžu sej je jenož předstajić. Na jednym boku wojujemy w Delnjej Łužicy wo zachowanje wučby serbšćiny na našich šulach, za čož so cyłe swójby zasadźeja. Na tamnym boku powědaja dotalni olympionicy serbšćinarjam swojeje šule wo jich dožiwjenjach na olympiadźe. Tele pozitiwne argumenty přeswědčeja.

Fachowe wurazy wužiwali

Mittwoch, 10. Mai 2017 geschrieben von:

Personalny trenar z Lipska Clemens Eckert,­ dźiwadźelnik z Budyšina Měrko Brankačk a Tomaš Lukaš, kuchar Budyskeho­ „Wjelbika“, su na lětušej olympiadźe serbskeje rěče wosebite kursy poskićeli.

Pola Clemensa Eckerta mějachu šulerjo 6. lětnika sportować a pytnychu, kotre myški njeběchu dotal dosć trenowali. Měrko Brankačk animěrowaše w nich wosebje dušine začuća při hraću wšelkich situacijow. A Tomaš Lukaš jich namołwješe na słód na jazyku dźiwać. Jenož tak bě móžno wosebity lód krěrować.

Predikat „z wuznamjenjenjom“: Sarah Hančikec, Serbski gymnazij Budyšin; Leonard Nowak, Zakładna šula Žylow; Daniel Šołta, Johanneum Wojerecy

predikat „jara derje“: Rebecca Čórlichec, Serbska wyša šula Ralbicy; Anton Piatza, Serbski gymnazij Budyšin; Janek Bramberg, Johanneum Wojerecy; Annett Düring, Serbska wyša šula Budyšin

predikat „derje“: Kathalin Wornarjec a Janika Koberec, Serbski gymnazij Budyšin; Luisa Korchec, Serbska wyša šula Ralbicy; Emilia Döringec, Serbska wyša šula „Dr. Marja Grólmusec“ Radwor; Mara­ C. Krječmarjec, Serbski gymnazij Budyšin; Alexa Mäckelburg, Wyša šula „Dr. Marja Grólmusec“ Slepo; Jakob Böttcher, Serbski gymnazij Budyšin; Simon Schierack, Lessingowy gymnazij Wojerecy; Thalea Reuter, Wyša šula „Dr. Marja Grólmusec“ Slepo

Olympiada je wosebity rěčny rum

Mittwoch, 10. Mai 2017 geschrieben von:

Olympiada serbšćiny je składnosć sej wosebitu serbsku zhromadnosć wotkryć“, měni Beatrice Weclichec z Nuknicy, kotraž pyta „stajnje za serbskorěčnymi rumami“. Jako něhdyša praktikantka na Ralbičanskej zakładnej šuli, hdźež serbšćinu wšědnje nałožuja, je tajki dožiwiła. Trochu hinak bě to na Budyskej šuli.­ Tam je rěčny wobswět skerje němski, a tak maš so bóle prócować. Wona sej přeje, zo dóstanje po studiju wučerstwa w lěću šansu na referendariat a pozdźiše přistajenje w Ralbicach. Do studija dźěłaše we wobłuku dobrowólneho socialneho lěta w tamnišej pěstowarni, kotraž je w nošerstwje Serbskeho šulskeho towarstwa. Tam běštej so jej woči za powołanje na polu kubłanja wotewrěłoj.

Nowy kompjuterowy kabinet su wčera na Kulowskej wyšej šuli „Korla Awgust Kocor“ přepodali. Dohromady nałožichu za njón 20 000 eurow. Połojcu z toho je město zapłaćiło, tamnu połojcu nazběra spěchowanske towarstwo kubłanišća z darami mnohich sponsorow a dobroćelow. Nad nowym kabinetom wjesela so tule šulerjo rjadownje 5a ze zastupowacej šulskej nawodnicu a wučerku za informatiku Kerstin Streit. Foto: Ulrike Herzger

Šulerjam so z darikom za prócu dźakowali

Mittwoch, 10. Mai 2017 geschrieben von:

Dźěći Kulowskeje Krabatoweje šule běchu so na kreatiwnym wubědźowanju wobdźělili. Wčera wopytachu wone Wojerowski Domowinski dom, hdźež bě za nje dźakne zarjadowanje za jich basnje a molowanki.

Wojerecy (SiR/SN). Poprjancy ze šokolodu, brěčka, serbska dźěćaca kniha, luboznje kryta kofejowa tafla a čerwjene powětrowe balonki při durjach će witaja. Regionalna rěčnica Domowiny za teritorij župy „Handrij Zejler“ Christina Šołćina strowi šulerjow na trochu hinašu wučbu serbšćiny hač w šuli.

Nětko je wažne sej zaměr šule wuwědomić

Dienstag, 09. Mai 2017 geschrieben von:

Njebjelčicy (JK/SN). Čłonojo dźěłoweje skupiny, kotraž je sej zaměr stajiła w Njebjelčicach załožić zakładnu šulu w swobodnym nošerstwje, zetkachu so wčera w Njebjelčanskim gmejnskim zarjedźe. Nastork, wo tajkej šuli přemyslować, stej tuchwilna situacija w sakskim šulstwje kaž tež próstwa Worklečanskeje šule, w Njebjelčicach šulski hort zarjadować.

Njeparujomna to institucija

Dienstag, 09. Mai 2017 geschrieben von:

25lětne wobstaće dźěłanišća ABC potwjerdźa jeho wulku skutkownosć

Choćebuz (SN/MiR). Dźěłanišćo za serbske kubłanske wuwiwanje (ABC) w Choćebuzu ma perspektiwu. To bě cyle jasne dopóznaće wčerawšeho jubileja k 25lětnemu wobstaću zarjadnišća, kotrež kraj Braniborska cyły čas spěchuje, w klubowni serbskeho internata w delnjołužiskej metropoli. Nawodnica dźěłanišća dr. Christiana Piniekowa witaše na wšě połsta gratulantow z Hornjeje a Delnjeje Łužicy. Wšitcy skedźbnichu na wulku skutkownosć jónkrótneje serbskeje wědomostneje institucije. Předsyda Rady za serbske naležnosće Braniborskeje Torsten Mak wuzběhny jeje kubłansku a politisku dimensiju. „Tule dźěła horstka přewšo angažowanych ludźi, zo bychu kładli fundament za posrědkowanje delnjoserbšćiny“, rjekny předsyda Domowiny Dawid Statnik. Kaž Ana Kosacojc-Kozelowa, społnomócnjena za serbske naležnosće města Choćebuza, potwjerdźi, „participuje město ze skutkowanja ABC“.

Swěčki zaswěćić

Dienstag, 09. Mai 2017 geschrieben von:
Pukačec mandźelskaj Lubina a Jaroslav zanjeseštaj wčera w Choćebuzu serbski spěwny chaos. Připosłucharjo pak spěšnje zwěsćichu, zo hornjoserbske „Jank pod hajkom woraše“ a delnjoserbske „Za našymi gumnami“ jako kwodlibet cyle derje hromadźe klinčitej. Runje tak je to we wuwiću Choćebuskeho Dźěłanišća za serbske kubłanske wužiwanje (ABC). Knježeše-li před 25 lětami hišće chaos při załoženju institucije, je so ta w běhu lět dale a bóle do kanona serbskich a němskich zarjadnišćow w Delnjej Łužicy zarjadowała. Nic jenož to, wona žněje dźeń a wjace při­póznaća. Bjez njeje njeńdźe! Štó hewak by zestajał ramikowe wučbne plany, z partnerami nowe wučbnicy a dźěłowe materialije za wučbu delnjoserbšćiny zdźěłał, wučerki a kubłarki do dźěła pohonjał?­ Zaswěćmy tuž hižo nětko dalše 25 swěčkow abo hišće wjac za přichodne jubileje. Milenka Rječcyna

Ze sobu rěčeli

Freitag, 05. Mai 2017 geschrieben von:

Bórkowy (SN/MiR). „Chcemy, zo so serbšćina bjez wobmjezowanja ličby šulerjow dale wuwučuje“, měni Kathleen Komolka ze staršiskeje iniciatiwy wo zachowanje serbšćiny w Delnjej Łužicy. Ministerstwo je drje minimalnu ličbu skupiny wot dwanaće na pjeć pomjeńšiło. To pak wočakowanje iniciatiwnikow njespjelnja. Dźens dopołdnja su to braniborskemu ministrej za kubłanje, młodźinu a sport Günterej Baasce (SPD) wosobinsce rjekli. Na přeprošenje iniciatiwy wopyta minister Bórkowsku zakładnu šulu, hdźež so 130 šulerjow na Witaj- abo bilingualnej wučbje wobdźěla. Tam móžeše sej cyle praktiski dohlad wo wuwučowanju delnjoserbšćiny tworić. „Serbske šulske postajenje jako referentowy naćisk předleži. Tak su změny móžne“, wón zwěsći. Budu tuž na žadanja iniciatiwy reagować.

Wučer Uwe Gutšmidt je ze šěsć šulerjemi 4. lětnika ze wšelakorymi rěčnymi znajomosćemi wučbu matematiki delnjoserbsce předstajił. Šulerjo rěčachu z ministrom Baasku, dalše koło zjednoći staršich, šulerjow, kubłarki a wučerjow. Tam stejachu w fokusu předmjety, wosebje pak lětniki přesahowaca wučba.

Anzeige