Labor přepodali

Donnerstag, 12. Januar 2017 geschrieben von:
Zhorjelc (SN). Wysoka šula Žitawa-Zhorjelc a Fraunhoferski institut za optroniku, systemowu techniku a wuhódnoćenje wobrazow chcetej swoju wědu we wobłuku IT-wěstota we wuknjenskim laborje přichodnje hromadu wjesć. Tak poskići Zhorjelc na praksu wusměrjene dalekubłanje hladajo na realne wohroženske scenarije w zwisku z internetnej kriminalitu. Na swjatočnym přepodaću labora wčera, na kotrymž so tež zwjazkowa ministerka za kubłanje a slědźenje prof. dr. Johanna Wanka wobdźěli, wu­zběhny sakski ministerski prezident Stanisław Tilich (wobaj CDU): „Digitalizacija je ta wulka tema našeho časa, a Sakska je ze swojimi ekscelentnymi wysokimi šulemi a slědźenišćemi derje nastajena, zo by w tymle procesu wažne impulsy dawała. IT-wěstota ma při tym wosebity wuznam – za hospodarstwo a politiku. Zhromadny projekt w Zhorjelcu je dalši krok, kotryž město jako studijnu městnosć a stejnišćo slědźenja a wuwučowanja atraktiwniše sčini.“ Zaměr zwjazkoweho programa „Dalekubłanje IT-wěstota“ je, kwalifikować fachowe a nawodne mocy z industrije a zjawneho zarjadnistwa.

Swójbne mjena lětušich róčnicarjow

Mittwoch, 11. Januar 2017 geschrieben von:

Swójbne mjena su přeco zaso zajimawe swědčenja rěče našich prjedownikow. W serbšćinje maja wone wosebitu hódnotu, dokelž pochadźeja z časa, z kotrehož hišće žane pisomne pomniki njewobsedźimy. Kak su naši prjedownicy před wjele lětstotkami myslili a so rěčnje zwuraznili, wo tym nam wone mjena znajmjeńša něšto přeradźeja.

Chcemy so zaso wěnować někotrym serbskim prócowarjam zańdźenosće, kotřiž maja lětsa kulojtu abo połkulojtu róčnicu narodnin abo posmjertnin, a so zamyslić do jich mjenow. Swójbne mjena nastachu často z mjenow powołanjow, kotrež běchu prěni nošerjo mjenow wukonjeli. Tak je to na přikład pola Šewčika, takrjec „małeho šewca“. Jakub Šewčik, rodźeny w Baćonju a farar mjez druhim w Chrósćicach, wěsty čas předsyda Domowiny, předewšěm pak awtor basnjow patriotiskeho charaktera, změje 6. septembra 150. róčnicu narodnin.

Korla Awgust­ Fiedler, znaty hudźbnik a sobuwuhotowar spěwanskich swjedźenjow, zemrě 16. meje 1917. Swójbne mjeno Fiedler pochadźa tohorunja z mjena powołanja; w tym padźe wšak je wone němskeho pochada, měnjeny je wězo­ „husler“.

Maja dobrych partnerow

Mittwoch, 11. Januar 2017 geschrieben von:

Sakske ministerstwo za wobswět a ratarstwo (SMUL) namołwja hižo wjele lět, na nalětnich pućowanjach so wobdźělić. Hač do 3. februara je składnosć, so za lětuši rjad přizjewić.

Miłoćicy (SN/MiR). Zhromadnje z hajnikom so ze žiwym lěsom zaběrać, z ornitologu na ptački słuchać, zela zběrać a je předźěłać – to su jenož někotre móžnosće, spjelnić zaměr sakskeho ministerstwa za wobswět a ratarstwo a sej pućujo domiznu wotkryć. Z idejow, kotrež dóstawa SMUL kóžde lěto wot poskićerjow z cyłeje Sakskeje, zestaja wone programowy zešiwk. Tón předleži najpozdźišo wot měrca w ćišćanej formje a hodźi so internetnje wotwołać. Wot apryla hač do junija přewjeduja tam mjenowane pućowanja, na kotrychž móža so nimo iniciatorow dalši zajimcy wobdźělić.

Won, won do přirody

Mittwoch, 11. Januar 2017 geschrieben von:

Tuchwilu drje je ćežko wěrić, zo změjemy bórze nalěćo. Ptački pak nam pokazuja, zo so miły čas hižo zaso bliži. Wšojedne, kak kruty zmjerzk je, ptački hotuja so na kwas a na tak wožiwjacy so swět. Tak změje so to nadźijomnje bórze tež zaso z ludźimi. Ručež budźe ćoplišo, wabi miłe słónco do přirody. Potom sej mnozy praja „won, ničo druhe hač won“. Snano pak so zdobom prašeja „a dokal?“ Wot apryla přeprošeja regionalni poskićerjo po wšej Sakskej a we Łužicy na pućowanja, ke kotrymž namołwja statne ministerstwo za kultus. Zo by poskitk dale rostł, su trěbni mnozy wobdźělnicy a nowe ideje. Kubłanišća Miłočanskeho Křesćansko-socialneho kubłanskeho skutka su hižo dawno rozumili, zo móža dźěćom na te wašnje dobry poměr k domiznje posrědkować.

Hač tež dalši nošerjo tajkich zarjadnišćow tule šansu zapřimnu? Njech to přichod pokaza. Milenka Rječcyna

Kwalita, wjeselo a motiwacija wažne

Montag, 09. Januar 2017 geschrieben von:

Wojerowski křesćanski gymnazij Johanneum kładźe tež přichodnje wulku wažnosć na serbšćinu a rušćinu. To je sobotu 25. dźeń wotewrjenych duri pokazał.

Wojerecy (AK/SN). Serbšćinu jako dobrowólny poskitk kóždu wutoru wot šesteje do wosmeje hodźiny wuwučuje Andreja Ryćerjowa. Angelika Czapik ju w projektach podpěruje. Tuchwilu wuknu rěč štyrjo šulerjo z 5., pjećo z 6. a třo ze 7. a 8. lětnika. „Njeje rozsudne, kelko šulerjow je. Wažne su kwalita, wjeselo a motiwacija“, podšmórny Andreja Ryćerjowa, kotraž skutkuje wot časa załoženja Johanneuma 1992 tam jako wučerka serbšćiny. „Spěwamy wjele a zeznawamy mnohe rěčne hry“, powěda Kulowski šuler Daniel Šołta z rjadownje 6a. Zhromadnje ze sobušulerjemi je wón dźeń wotewrjenych duri přihotował a hosći z tombolu, přikuskom, geografiskim kwisom a ze serbskimi taflemi zawjeselił.

Internetnje wuspěšni

Mittwoch, 04. Januar 2017 geschrieben von:
Takle abo tež hinak móhło rěkać, hdyž čitamy dźensa často wo crowdfunding-projektach. Nó haj w tym padźe je wšojedne, w kotrej rěči wo pjenjezy wabja – hač serbsce, němsce abo jendźelsce. Wažne skónčnje je, trěbne srědki nazběrać a ideju zwoprawdźić. Skerje prawje, zo činja to jendźelsce – tak móža zajimcy po wšěm swěće zhonić, wo čim sej ludźo hłójčku łamaja. Prawje tuž, zo je so Kulowska Wyša šula „Korla Awgust Kocor“ na te wašnje zmužiła nowy kompjuterowy kabinet sobu financować. Wuspěchej dopomhała je bjezdwěla internetna strona www.99funken.de. Z njej wšak su wosebje na jednotliwy region wusměrjene ideje a jich iniciatorow narěčeli. A tak žnějachu wuspěch. Mjez 127 podpěraćelemi bě něhdyši šuler, kiž je 500 eurow přepokazał. Akciju podpěrali su tež mnozy, kotřiž hižo we Łužicy njebydla. A to dźakowano crowdfundingej. Derje­ tak! Milenka Rječcyna

Na olympiadu

Freitag, 30. Dezember 2016 geschrieben von:
Drježdźany (SN/MiR). Na finalu lětušeje šulerskeje olympiady geografije wobdźěla so šulerjo 7. a 10. lětnika Wyšeje šule Łaz, Ewangelskeje wyšeje šule Bukecy, Scultetusoweje wyšeje šule Zhorjelc a 1. wyšeje šule Kamjenc. Tole zdźěli rěčnica regionalneho zarjada Sakskeje kubłanskeje agentury Budyšin Angela Ruscher na naprašowanje SN. Wubědźowanje zhladuje lětsa na rekord. W jeho wobłuku zličichu 18 855 wobdźělnikow z 229 wyšich šulow. Po tradiciji je prěni štwórtk noweho lěta finale. 30 najlěpšich šulerjow zetka so tuž 5. januara 2017 w rumnosćach Drježdźanskeje Industrijoweje a wikowanskeje komory. Na najlěpšich šesćoch čakaja atraktiwne myta, zdźěli Sakske ministerstwo za kultus. Šulerjo maja dopokazać kompleksnu geografisku wědu, topografiske znajomosće a powšitkownu wědu wo geografiji. Prěni schodźenk wotmě so w lěću pod nawodom fachowych wučerjow na wotpowědnych kubłanišćach a nazymu na regionalnej runinje. Přichodny štwórtk zetkaja so nětko najlěpši z agenturow Drježdźany, Budyšin, Lipsk, Kamjenica a Šwikawa k 4. schodźenkej olympiady.

Z widom na stawizny do přichoda hladać

Donnerstag, 29. Dezember 2016 geschrieben von:

Choćebuz (SN/MiR). Nawodnica Šule za delnjoserbsku­ rěč a kulturu Choćebuz Marja Elikowska-Winklerowa chce stawizny kursow delnjoserbšćiny za dorosćenych dale přeslědźić. Před 65 lětmi bě so prěni tajki kurs wotměł, wot 12. do 18. februara 1951 w błótowskich Bórkowach. „Mam tónle jubilej, kotryž smy mjeńšeho razu w Choćebuzu woswjećili, za wosebity“, rjekny Elikowska-Winklerowa na naprašowanje Serbskich Nowin. „Při wuwiwanju wosebiteho dźěłoweho materiala móžach nazhonić, zo wobsteji dale zajim na kursach­ del­njoserbskeje rěče, tež mjez młodymi dorosćenymi.“­ Přichodnje chce wona w rozmołwach z ludźimi na wsach dalše zajimawostki wo stawiznach wuwučo­wanja delnjoserbšćiny w tym wobłuku wuslědźić­ a dokumentować.

Wutrajnosć prašana

Donnerstag, 29. Dezember 2016 geschrieben von:
Angažement so wudani. Derje tuž, zo zhladuje nawodnica Choćebuskeje Šule za Delnjoserbsku rěč a kulturu Marja Elikowska-Winklerowa na pozitiwne wuwiće, wosebje nastupajo financielne wuhotowanje zarjadowanjow a projektow kubłanišća. Wosebje dźakowano jeje wobstajnemu wabjenju ma kubłanišćo spě- chowarjow, kotřiž rěčnu šulu swěru podpěruja. Na jednym boku su to zarjady a towarstwa, mjez nimi Załožba za serbski lud a Domowina, kotrež personalne kóšty a wudawki, kaž honorary za referentow zarunaja. Na tamnym boku so ludźo, kotřiž na kursach a na ekskursijach wobdźěleja abo z dobrej radu resp. z kreatiwnymi namjetami poskitk kubłanišća woboha­ćeja. Facit: Štóž chce podpěru měć, zo by swoje ideje zwoprawdźić móhł, njesmě we wabjenju za nje popušćić, tež hdyž so kóžde durje hnydom njewotewru. Prašana je wutrajnosć. Milenka Rječcyna

Dźak za wotmołwy

Freitag, 23. Dezember 2016 geschrieben von:
Skónčnje je zaso tak daloko. Skónčnje swjećimy hody. W kruhu swójby a přećelow budźe chwile wróćo zhladować a nowe ideje rodźić. Jako redaktorojo našeho wječornika dopominamy so runje tele dny do hód na lěto 2016, na mnohe terminy, rozmołwy a zetkanja z našimi čitarjemi a partnerami. Wosebje wažne nam bě runje zašłe dny zhonić wot institucijow, zarjadnišćow, předewzaćow a towarstwow, što su wone w nachilacym so lěće docpěli, kotre přeća su so jim spjelnili, ale tež, hdźe su prašenja njewotmołwjene wostali. Smy naprašowanja rozesłali a wjele telefonowali. Zdobom chcychmy zhonić, kotre mysle přewodźeja ludźi do noweho lěta. Tym, kotřiž su w dohodownym času wotmoł­wili, słuša tule wosebity dźak. Runje w adwen­tnym času dźě je derje, měć chwile za druhich. A tajku su sej mnozy naši partnerojo brali, na kóncu za was, lubi čitarjo SN. Milenka Rječcyna

Anzeige

  • Serbski komponist, hudźbnik a spěwar Měrćin Weclich je minjenu sobotu a njedźelu w Budyskim Kamjentnym domje přewšo wuspěšnje koncertował. Přeprosył bě sej za to mnohimi hosći kaž tež młodych talentow, kotřiž z nim zhromadnje na jewišću publikum zaho
  • Měrćin Weclich a Serbski młodźinski oktet - Martin Wetzlich und das Sorbische Jugendoktett
  • Měrćin Weclich a dźěćaca spěwna skupina Šumlabrum - Martin Wetzlich und die sorbischer Kindergesangsgruppe Schumlabrumm
  • Šumlabrum - Schumlabrumm
  • Šumlabrum - Schumlabrumm
  • Měrćin Weclich a młody hudźbnik Chrystof Mikławšk (wotprawa) – Martin Wetzlich und Christoph Mikwauschk (von rechts)
  • Jamila Hórnikec - Jamila Hornig
  • Matteo Hórnik - Matteo Hornig
  • Rejwarki a rejwarjo Serbskeho folklorneho ansambla Wudwor – Tänzerinnen und Tänzer des Sorbischen Folkloreensembles Wudwor
  • Live-hudźba je najlěpša - Live-Musik ist die allerbeste
  • Walentin Bjedrich při pianje - Valentin Bedrich am Piano
  • Kapała pod nawodom Malty Rogackeho (2. wotprawa) je live hudźiła - Malte Rogacki (2. von rechts) und Band spielten live
  • Měrćin Weclich a Měrko Brankačk (wotlěwa) – Martin Wetzlich und Mirko Brankatschk (von links)
  • Poradźenej kocnertaj - Zwei wirklich gelungene Konzerte