Jednora wěc

Mittwoch, 14. November 2018 geschrieben von:
Skónčnje su tež gmejnscy radźićeljo w Njeswačidle dowidźeli, zo njeje trjeba, kóžde pomjenowanje dwurěčnje wužiwać. W Dobrošicach su so wjesnjenjo wědomje rozsudźili, pomjenować pućej Janska a Lipa. Serbsce a tež němsce wužiwajomne pomjenowanje z historiskim pozadkom a zwučenosću njeje ničo dospoł- nje nowe, ale skerje wužadanje, wo tym rozmyslować, što to abo tamne zjednori. Zdobom bě namjet wjesnjanow wuža­danje za Njeswačanskich gmejnskich radźićelow, sej mysle činić wo dwurěčnosći w swojej gmejnje. Pomjenowanja kaž nětko­ w Dobrošicach mnoho zjednorjeja a na kóncu su samo tuńše. Njeje trjeba, zo ma wšitko swój adekwatny němski přełožk měć. Wažne je, zo su ći spokojom, kotřiž­ su z adresu pod nowym mjenom docpějomni a tam derje bydlić móža. W Dobrošicach tomu tak je. A tež wob­myslenja, zo maja druzy z tym problemy, su často njetrjebawše. Jan Kral

Wot spočatka měsaca přetwarjeja prěni poschod bywšeje Chróšćanskeje srjedźneje šule na nowy gmejnski zarjad a towarstwowe rumnosće. Wčera staj tam Andrej Měrćink a Jurij Šiman (wotlěwa) konstrukciju natwariłoj, kotraž ma hort na delnim poschodźe před prochom a haru škitać. Přetwar šule płaći 260 000 eurow. Z toho dóstanu 200 000 eurow přez program Leader spěchowane. Planowane je, zo Chróšćanski gmejnski zarjad klětu spočatk meje do nowych rumnosćow zaćehnje. Foto: Feliks Haza

„To so nam hižo ženje stać njesmě“

Mittwoch, 14. November 2018 geschrieben von:

22. oktobra wupadnjene posedźenje Trjebinskeje gmejnskeje rady postaja přeco hišće diskusije mjez radźićelemi. Nětko pytaja čłonojo parlamenta takrjec za nowej zhromadnosću.

Trjebin (AK/SN). Zadźerženski a čestny kodeks předčita Norbert Struck na zašłym regularnym posedźenju Trjebinskeje gmejnskeje rady. „Při tym dźe wo zamołwitosć napřećo wobydlerjam. Tež w Žitawje, Zhorjelcu a Budyšinje je tajki kodeks w radnicy wupowěsnjeny“, roz­łoži Trjebinski gmejnski radźićel. Mjez druhim wón citowaše: „Podrjaduj swoje starosće gmejnskim.“ Tole, tak Norbert Struck podšmórny, měł sej kóždy w gmejnskej radźe k wutrobje brać. Při­čina bě njewšědny podawk. 22. oktobra měješe Trjebinska gmejnska rada zakładnemu zrěčenju wo přesydlenju Miłoraza přihłosować. Dokelž pak bě přemało radźićelow­ přišło, njebě gmejnska rada wobzamknjenjakmana. 5. nowembra swoje posedźenje wospjetowachu a zrěčenju jednohłósnje a bjez diskusije přihłosowachu.

Rozsud wuspěšnje přesadźili

Mittwoch, 14. November 2018 geschrieben von:

W Dobrošicach smědźa so pućej po woli wobydlerjow pomjenować

Njeswačidło (JK/SN). Hižo wjacore razy su Njeswačanscy gmejnscy radźićeljo wo noworjadowanju pućow a domowych čisłow w Dobrošicach wuradźowali. Na wčerawšim posedźenju nětko chcychu so doskónčnje rozsudźić a nowe pomjenowanja dróhow wobzamknyć. Do toho běchu wobydlersku zhromadźiznu w Dobrošicach přewjedli a wjesnjenjo móžachu namjetować, kak so puće we wsy pomjenuja. Při tym je gmejnsku radu zdźěla znjeměrniło, zo rozsudźichu so Dobroščenjo za pomjenowani Janska a Lipa za pućej, kotrejž hižo zdawna pod tutymaj mjenomaj wužiwaja. Namjetaj mjenow pak někotrym gmejnskim radźićelam njesłodźeštej. Njemóžachu dowidźeć, zo hodźi so puć we woběmaj rěčomaj z jednym zapřijećom pomjenować a wobstachu na tym, zo so alternatiwy we woběmaj rěčomaj namakaja. To pak wjes­njenjo nochcychu, přeswědčiwje měnjo, zo stej pomjenowani jasnej a matej ze serbskeho a historiskeho wida woprawnjenje.

Krótkopowěsće (14.11.18)

Mittwoch, 14. November 2018 geschrieben von:

Myto pěstowarni

Bórkowy/Budyšin. 24. nowembra přepoda zamołwita za naležnosće Serbow w Braniborskej, statna sekretarka Ulrike Gutheil w błótowskich Bórkowach prěni króć myto „Mina Witkojc“. Žylowsku pěstowarnju „Mato Rizo“, kotraž je w nošerstwje Serbskeho šulskeho towarstwa, z nim počesća. W tymle kubłanišću je měł před 20 lětami modelowy projekt Witaj swoju kolebku.

Hilse we fokusu Statneho škita

Berlin. Statny škit zaběra so z Karstenom Hilse (AfD). Wobdźěliwši so na njedawnej demonstraciji je Budyski zapósłanc Zwjazkoweho sejma pječa spěw sobu spěwał, w kotrymž namołwja so k namocy přećiwo kanclerce Angeli Merkel (CDU). W interneće kursěruje wotpowědne widejo, rěka ze stron sakskeje policije.

Doba za próstwy podlěšena

Policija (14.11.18)

Mittwoch, 14. November 2018 geschrieben von:

Žonu mortwu namakali

Hodźij/Čornecy. Wot póndźele dopoł­dnja pytaše policija 58lětnu žonu z Hodźija. Wona bě rano z kolesom wotjěła a so hižo domoj njenawróćiła. Wjacore wobsadki policajskich awtow hač do nocy žonu pytachu. Při tym běštej tohorunja policajski psyk a helikopter zasadźenej. Hakle wčera rano wobydler žonu nježiwu w Čornecach namaka. Přiwołany nuzowy lěkar móžeše jenož hišće smjerć 58lětneje zwěsćić. Kriminalna policija nětko přepytuje, kak je Hodźijčanka zemrěła.

Ministerskeho prezidenta wopytali

Mittwoch, 14. November 2018 geschrieben von:

Kulow. Šulerjo 10. lětnika Kulowskeje wyšeje šule „Korla Awgust Kocor“ běchu spočatk tydźenja trochu njesćerpni. Woni so hižo wjeselachu na zajězd do statneje kenclije w Drježdźanach. Kak je k tomu dóšło? Lětsa 4. meje přewjedźechu na šuli „europski dźeń“. Tón dźeń witachu w šuli sakskeho ministerskeho prezidenta Michaela Kretschmera (CDU) jako rozmołwneho partnera. Na kóncu přeprosy wón jich, tehdom šulerjo 9. lětnika, na wopyt do statneje kenclije.

Korjenje znać

Dienstag, 13. November 2018 geschrieben von:
Škoda, zo je z 30 wopytowarjemi jenož něhdźe stoty dźěl wšitkich wobydlerjow Hodźijskeje gmejny minjenu sobotu zarjadowanje wo pochadźe swojich wjesnych mjenow dožiwił. To bě dobra składnosć, něšto wo swójskich korjenjach zhonić, a to dźě njemóže ženje na škodu być. Hdyž so domizniskemu towarstwu z jeho předsydu Peterom Beerom poradźi, prof. dr. Bernda Koenitza jako woprawdźiteho fachowca na polu wjesnych mjenow za tajki přednošk zdobyć, by sej tele popoł­dnjo poprawom wjace kedźbnosće za­słužiło. Kaž bě wočakować, móžeše přednošowar dopokazać, zo ma wulki dźěl dźensnišich wjesnych mjenow Hodźijskeje gmejny słowjanski pochad. A Hodźij samy měješe něhdy wulki wuznam při šěrjenju křesćanstwa w našich kónčinach. Njeby na škodu było, tajki přednošk tež na dalšich městnach přewjesć, zo bychu ludźo swoje korjenje bliže zeznali a sej wuwědomili, zwotkel su. Marian Wjeńka

Židźa integrowani njeběchu

We wčerawšej rozprawje wo 100. róčnicy znowadocpěća statneje njewotwisnosće Pólskeje „2. republika wuspěšna“ je so zmylk stał. Sada „We Waršawje bydleše 300 000 Židow, kotřiž pólsce njerěčachu.“ wobsahuje w pódlanskej sadźe wopačne wuprajenje. Prawje ma rěkać „We Waršawje bydleše 300 000 Židow, kotřiž integrowani njeběchu.“ Prosymy zmylk zamołwić. Redakcija SN

Dźeń pozdźišo hač zwučene je w Radworju wčera lampionowy ćah na swj. Měrćina z přewodom dujerjow po wsy ćahnył. Po nyš­porje staj najprjedy Pětr Hantuš jako swj. Měrćin a Kajus Wićaz jako prošer znatu scenu dźělenja płašća předstajiłoj. Po lampionowym ćahu zhromadźichu so dźěći a starši na farskej zahrodźe při wohenju a ćopłym čaju. Foto: Bosćij Handrik

Anzeige