Što je słowo hódne?

Freitag, 18. Januar 2019 geschrieben von:
Wobydlerjo gmejny Ralbicy-Róžant drje budu přichodny čas někotrym politikarjam jara dokładnje na porsty hladać a słuchać, što woni praja. Z rjanymi słowami dźě běchu ministerski prezident Michael­ Kretschmer, krajny rada Michael Harig a jeho zastupjer Udo Wićaz (wšitcy CDU) připowědźili, zo chcedźa gmejnu w prócowanju podpěrać, w Ralbicach nowu pěstowarnju natwarić. Hižo nětko pak jewi so wulki problem, zo dyrbja planowanje a twarske dźěła po wšej Europje wupisać. To stej komuna kaž tež zarjadniski zwjazk Při Klóšterskej wodźe prosće přećeženej. Nětko budźe tuž zajimawe wobkedźbować, hač woprawdźe něchtó komunje pomha. Tak so potom tež pokaza, kelko hódne słowo politikarjow je. Runočasnje wšak so trochu dźiwam, zo je europske wupisanje nadobo tajke proble­ma­tiske. Hižo loni 30. awgusta dźě su to na posedźenju delanskeje gmejnskeje rady zdźělili. Marian Wjeńka

Nopawy Wojerowskeho zwěrjenca su wčera do swojeho ponowjeneho domicila přećahnyli. W domje hnydom při zachodźe zatwarichu­­ nowu přewětrjensku připrawu a někotre nowe wokna. Dohromady inwestowachu něhdźe 40 000 eurow. Zo maja nopawy nětko lěpše wuměnjenja, wo tym přeswědčištaj so šef zwěrjenca Eugène Bruins a Carolin Adler. Foto: Stefanie Jürß

Přepytuja přećiwo njeznatym

Freitag, 18. Januar 2019 geschrieben von:

Poprawom su Wadecy w Kubšiskej gmejnje wuchodnje Budyšina měrna wjes. Idylka pak je zdźěla mylena, dokelž­ su tam po zdaću wjackróć we wjesnym­ haće wopłóčki wuhladali.

Wadecy (UM/SN). Zanjerodźenja we Wadečanskim wjesnym haće wostawaja dale mysteriozne. Kaž z wotmołwy sakskeho wobswětoweho ministra Thomasa Schmidta (CDU) na naprašowanje zapósłanca Sakskeho krajneho sejma Wolframa Günthera (Zeleni) wuchadźa, nje­móžachu za to dotal žanu jasnu přičinu zwěsćić.

Žadaja sej pomoc politikarjow

Freitag, 18. Januar 2019 geschrieben von:

Gmejna Ralbicy-Róžant w přihotach noweje pěstowarnje přežadana

Róžant (JK/SN). Nowu Ralbičansku pěstowarnju njebudu tak bórze twarić započeć móc. Kaž wjesnjanosta Hubertus Ryćer (CDU) na wčerawšim posedźenju gmejnskeje rady zdźěli, ma gmejna sama z twarskim zarjadom zarjadniskeho zwjazka Při Klóšterskej wodźe přihotować cyłoeuropske wupisanje projekta. To zhoni wjesnjanosta wčera z krajnoradneho zarjada. Z přihotami na tajke wupi­sanje je komuna přežadana. Nima ani facho­wu ani personalnu kompetencu, wužadacy nadawk w poměrnje krótkim času zwoprawdźić. Radźićelow je wčera­wša informacija wulce znjeměrniła. Loni poskićena pomoc krajneho rady Michaela Hariga a jeho přirjadnika Uda Wićaza (wobaj CDU), gmejnu w přihotach twara pěstowarnje podpěrać, wopokazuje so dotal jako hołe słowo. Tež přilubjena podpěra ministerskeho prezidenta Michaela Kretschmera (CDU) njebě dotal pytnyć. Chceli gmejna w přewidnym času pěstowarnju zwoprawdźić, je pomoc politikarjow nuznje trěbna.

Krótkopowěsće (18.01.19)

Freitag, 18. Januar 2019 geschrieben von:

„Rewolucija a demokratija“

Drježdźany. Před pozadkom 30. róčnicy měrniweje rewolucije a prěnjeho załoženja swobodneho stata před sto lětami je sakska statna kenclija spěchowanski program „Rewolucija a demokratija“ wuwołała. Lětsa a klětu hodźa so z nim projek­ty spěchować, kotrež na historiske podawki a na natwar demokratije dopominaja a swoju hódnotu do fokusa zjawnosće stajeja. Próstwy přijimać budźe wot 31. januara Sakska natwarna banka.

Změna w zastojnstwje

Lipsk. Sakski justicny minister Sebastian Gemkow (CDU) je wčera Martinu Gerhardt jako nowu prezidentku Sak­skeho financneho sudnistwa zapokazał a jeje předchadnika dr. Jürgena Rühmanna ze zastojnstwa rozžohnował. Rühmann dźakowaše so sudnicam, sudnikam a předewšěm njesudniskemu personalej, kotryž ze swojim dźěłom skutkowanje sudnikow hakle zmóžnja.

Dwě jězbje do Ruskeje

Policija (18.01.19)

Freitag, 18. Januar 2019 geschrieben von:

Při awtomaće pjenjezy zabył

Biskopicy. Třicyfrowu sumu pjenjez je muž zawčerawšim při pjenježnym awtomaće w Biskopicach wotzběhnył, zaby pak bankowki wućahnyć. Poprawom so fašk po wěstym času wotsamo začini. Njeznata wosoba bě po wšěm zdaću spěšniša a je pjenjezy sobu wzała.

Wuměłstwo při skale

Freitag, 18. Januar 2019 geschrieben von:

Miłoćicy. Mjezynarodny dźeń wuměłstwa přewjedźe towarstwo Kamjenjak jutře wot 17 hodź. a njedźelu wot 10 hodź. při Miłočanskej skale. Z hosćom budu tam Krabatowy wuměłc Jörg Tausch, Krabatowy slědźer Hans-Jürgen Schröter, wuměłcy rězbarskeje dźěłarnički a čłonojo towarstwa. Při wohenju, zapyrjenej pjecy a w tepjenych rumnosćach změja zajimcy składnosć k bjesadźe. Wo ćělne derjeměće budźe postarane.

„Ćěkancy a my“

Chrósćicy. Propst Clemens Hrjehor ma wotewrjenu wutrobu za nuzu ćerpjacych. Tak je jako Radworski farar přiwzał swójbu ćěkancow z Bosniskeje, jako wona před wójnu na Balkanje wućek pytaše. Na swojim nowym skutkowanišću w Kamjenicy je farski dom swójbje muslimskich migrantow wotewrěł. Čehodla je to činił? Što je při tym dožiwił a hišće dožiwja, runje w měsće, hdźež je po smjertnej nožowej atace na wobydlerja k protestam přećiwo migrantam dóšło? Wo tym porěči propst Clemens Hrjehor njedźelu, 20. januara, w Chróšćanskej putniskej hospodźe. Wječor na temu „Ćěkancy a my – nazhonjenja fararja“ započnje so w 19 hodź. Wšitcy zajimcy su wutrobnje přeprošeni.

Serbšćina a pólšćina na kubłanišću chcytej

Donnerstag, 17. Januar 2019 geschrieben von:

Hamor (AK/SN). Statna zakładna šula a Swobodna wyša šula w Hamorje zaměrnje wažne kubłanske dźěło wuko­njatej. Na to skedźbništej na njedawnej gmejnskej radźe rozprawje wobeju šulskeju nawodow. „Štož našej šuli zdokonjatej, je wšeje česće hódne a zasłuža sej połnu podpěru“, podšmórny gmejnski radźićel Horst Jannack.

Zakładna šula Hamor w nošerstwje gmejny ma tuchwilu 138 wuknjacych we wosom rjadownjach. Kubłanišćo je zdobom šula z rěčnej inkluziju, štož wo­znamjenja, zo integruja zaměrnje dźěći, kotrež rěčnje a socialnje napadnu. Wulku wažnosć kładu tam na tradicije. Tak tež kóžde lěto campruja. W Swobodnej šuli Hamor, kotraž je w zamołwitosći šulskeho nošerskeho towarstwa, wuknu 103 dźěći. Najwjetša starosć, kotruž tam maja,­ je, zo njemóža „pobrachowacych financow dla žanoho šulskeh­o social­neho dźěła­ćerja přistajić“, wuswětli direktor Ralph Berthold w swojej rozprawje. „Swobodny stat nam při tym njepomha“, rjekny wón gmejnskej radźe. Wažnosć kładźe kubłanišćo na to, přihotować šulerjow na powołanje, čehoždla z domoródnymi za­wo­dami wusko hromadźe dźěła.

W rostlinarni Hamorskeho zahrodniskeho předewzaća GBT su minjene dny prěnje kórkowe rostliny sadźili. Na bujnej zeleni łopjenow­ je widźeć, zo klima pod škleńcu rostlinam tyje. Dohromady plahuja tam 14 000 zelenych kórkow a 17 000 tak mje­nowanych minikórkow. Prěnje płody chcedźa hižo za měsac žnjeć. Foto: Joachim Rjela

Lětsa sej tójšto předewzali

Donnerstag, 17. Januar 2019 geschrieben von:

Rakečanska gmejna hospodari dale z wurunanym etatom

Rakecy (JK/SN). Swoje lětuše wulke předewzaća móže Rakečanska gmejna wotnětka na wobkrućeny hospodarski plan złožować. Na wčerawšim posedźenju je wjetšina gmejnskich radźićelow lětušemu etatej přihłosowała. Z jenož dwěmaj napřećiwnymaj hłosomaj je wón tuž płaćiwy. Hižo loni w nowembru běchu prěni naćisk rozjimali a jón spočatk lěta zjawnje wupołožili. Hač do wčerawšeho njeje žanych dodawkow abo namjetow ke korekturam abo wudospołnjenjam dóšło.

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019